သျှမ်းပြည် ကျောက်မဲခရိုင်၊ နမ္မတူမြို့နယ်အတွင်း အာဏာသိမ်း စစ်ကောင်စီ တပ်နှင့် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တို့ တိုက်ပွဲဖြစ်ပွားမှုကြောင့် ဒေသခံများက စစ်ရှောင် ထွက်ပြေး နေရကကြောင်း စုံစမ်းသိရသည်။
ယမန်နေ့ (ဒီဇင်ဘာလ ၂၀) ရက် ညနေပိုင်း ၅ နာရီဝန်းကျင် မှစတင်ကာ နမ္မတူမြို့နယ်၊ စစ်ကောင်စီတပ် ခမရ ၃၂၄ ကို ဝိုင်းရံတပ်စွဲနေယူထားသည့် တအာင်းတပ် TNLA နှင့် စစ်ကောင်စီ ခြေမြန်တပ်ရင်း တပ်အမှတ် ၃၂၄ တို့က လက်နက်ကြီးဖြင့် အပြန်အလှန် ပစ်ခတ်မှု ဖြစ်ပွားခဲ့ကြောင်း အသက် (၄၀) ဝန်းကျင် အမျိုးသားက သျှမ်းသံတော်ဆင့်ကို ပြောသည်။
“မနေ့ညသန်းခေါင်အထိ လက်နက်ကြီးနဲ့ အပြန်အလှန်ပစ်ကြတာ။ ဒီနေ့မနက် အာရုဏ်တက်ချိန် ကနေစပြီး မနက်မိုးလင်းတဲ့အချိန်ထိလည်း ၁၀ လုံးလောက် ပစ်ခဲ့ကြသေးတယ်။ ရွာသားတချို့ကတော့ မနေ့က တည်းက ထွက်ပြေးကြတာ။ တချို့ကလည်း ဒီနေ့မနက်မှ ထွက်ပြေးကြတာလည်း ရှိတယ်” ဟု နမ္မတူမြို့ခံ အသက် (၄၀) ဝန်းကျင်အမျိုးသား တစ်ဦးက သျှမ်းသံတော်ဆင့်ကို ပြောသည်။
စစ်ကောင်စီ နှင့် TNLA တပ်တို့ လက်နက်ကြီးဖြင့် အပြန်အလှန် ပစ်ခတ်မှုများကြောင့် ဆိုင်းခေါင်ကျေးရွာ အုပ်စုမှ ဆိုင်ဂျာကျေးရွာ (ဝၢၼ်ႈသႅင်ႇၸႃႇ)၊ မန်ဖွေးကျေးရွာ (ဝၢၼ်ႈၽုၺ်း) ၊ ကောင်းဆာကျေးရွာ (ဝၢၼ်ႈၵွင်းသႃႇ)၊ ဟတ်လင်ကျေးရွာ (ဝၢၼ်ႈႁၢတ်ႇလႅင်) ၊ ပိန်းလောင်းရွာ (ဝၢၼ်ႈပဵင်းလွင်း)၊ မြန်မာရွာ (ဝၢၼ်ႈပၢင်မၢၼ်ႈ) ၊ နမ့်ကန်ကျေးရွာ (ဝၢၼ်ႈၼမ်ႉၵၢၼ်ႇ) ၊ ဆိုင်းခေါင်ကျေးရွာ (ဝၢၼ်ႈသၢႆးၶၢဝ်) ၊ နမ့်မိုင်းဆော့ကျေးရွာ (ဝၢၼ်ႈၼမ်ႉ မႅင်းသေႃႉ) ၊ ပန်ဝိုးကျေးရွာ (ဝၢၼ်ႈပၢင်ဝူဝ်း) စသည့် ကျေးရွာအပါအဝင် ကျေးရွာပေါင်း ၂၀ နီးပါးက ဒေသခံများ စစ်ရှောင်ထွက်ပြေးနေရသည်။
ထို့အပြင် မြို့ပေါ်ရပ်ကွက်များဖြစ်ကြသည့် အမှတ် (၁) နှင့် (၈) တို့မှ ဒေသခံများသည်လည်း တအာင်းတပ် (TNLA) နေရာယူထားသည့် နေရာနှင့် နီးစပ်သည့်အတွက် စစ်ရှောင်ထွက်ပြေးရကြောင်း သိရသည်။
ထို့အပြင် လက်နက်ကြီးဖြင့် အပြန်အလှန် ပစ်ခတ်မှု မဖြစ်ခင် မွန်းလွဲပိုင်း အချိန်၌ TNLA တပ်သားများသည် ကျေးရွာအတွင်းသို့ ရောက်လာပြီး ညနေ ၄ နာရီမတိုင်ခင် စစ်ရှောင်သွားကြရန် ညွှန်ကြားမှုပြုသည့်အတွက် တချို့ဒေသခံများက မန်စံကျေးရွာဘက်အထိ စစ်ရှောင်သွားကြကြောင်း အထက်ပါ ဒေသခံက ဆက်ပြောသည်။
“စစ်ရှောင်ရတဲ့ အများစုက ယာခင်းတဲတွေ၊ လယ်တွေထဲမှာ တဲထိုးပြီး စစ်ရှောင်ကြတာပါ။ တချို့ကလည်း စစ်တပ်နဲ့ ဝေးရာ၊ TNLA တပ်နဲ့ ဝေးရာကို စစ်ရှောင်ကြတာ၊ မန်စံ၊ မိုင်းရင် အထိလည်း သွားကြတာ ရှိတယ်။ လောလောဆယ် ခန့်မှန်းချေအရာ စစ်ရှောင်က ရာနဲ့ချီရှိပါတယ်” ဟု အထက်ပါ နမ္မတူမြို့ခံ အမျိုးသားက ဆက်ပြောသည်။
ဒီဇင်ဘာလ ၂၀ ရက်နေ့ ညအချိန်မှ ၂၁ ရက်နေ့ မနက်ပိုင်းအထိ လက်နက်ကြီးဖြင့် အပြန်အလှန် ပစ်ခတ်ကြသည့် အတွက် နှစ်ဖက်တပ်ဖွဲ့၏ ထိခိုက်ကျဆုံးမှုများ၊ ဒေသအတွင်း ထိခိုက်ပျက်စီးမှုများ နှင့် ပတ်သက်ပြီး သျှမ်းသံတော်ဆင့်မှ ဆက်လက်စုံစမ်း အတည်ပြုနေဆဲဖြစ်သည်။
ဒီဇင်ဘာလဆန်းပိုင်းမှ စတင်ပြီး နမ္မတူမြို့နယ်အတွင်း အာဏာသိမ်း စစ်ကောင်စီ နှင့် တအာင်း (ပလောင်) TNLA တပ်တို့ စစ်ရေးတင်းမာမှု ရှိခဲ့ခြင်းဖြစ်ပြီး နမ္မတူအခြေစိုက် ခမရ ၃၂၄ မှ အရာရှိ နှင့် တာဝန်ရှိသူများသည် ၎င်းတို့၏ သားသမီးနှင့် အမျိုးသမီးများကို ရဟတ်ယာဥ်ဖြင့် လားရှိုးမြို့သို့ ပို့ဆောင်ထားပြီး ဖြစ်ကြောင်းလည်း သိရသည်။
လက်ရှိ စစ်ဘေးတိမ်းရှောင်နေရသည့် နမ္မတူမြို့မှ ဒေသခံများသည် အများစုက လယ်ယာစိုက်ခင်း အတွင်းရှိ တဲများ၌သာ ခိုလှုံနေထိုင်ရသည့်အတွက် လေယာဥ်ဖြင့် တိုက်ခိုက်မှု ပြုပါက လက်နက်ကြီး ထိိမည်ကို စိုးရိမ်ရကြောင်း ဒေသခံများက ပြောဆိုသည်။
Leave a Comments