ထိုင်း-မြန်မာနယ်စပ် သျှမ်းပြည်တပ်မတော် RCSS/SSA မှလုံခြုံရေးယူပေးသည့် လွယ်လမ် စစ်ဘေးရှောင်စခန်း နှင့်နီးကပ်စွာအစိုးရတပ်မှ မောင်းသူမဲ့ ဒရုန်းယာဉ် ပျံသန်းသဖြင့် စခန်းတွင်းနေထိုင်သူများ စိုးရိမ်ထိတ် လှန့် မှုများဖြစ်ခဲ့ကြောင်းသိရသည်။

၄င်းနှင့်ပတ်သက်ပြီး နေရပ်မပြန်နိုင်သေးသည့် စစ်ဘေးရှောင်များ နေရပ်မှစွန့်ခွါရသူများအဖို့ ခြိမ်းခြောက် မှုတခု ဖြစ် နေကြောင်း သျှမ်းလူ့အခွင့်အရေးမဏ္ဍိုင်က ကြေငြာချက်တစောင်ထုတ်ပြန်ခဲ့သည်။

“ပြီးခဲ့သည့်စက်တင်ဘာလအတွင်း မိုင်းတော့အခြေစိုက် ခလရ ၂၉၃ တပ်မှ ဒရုန်းယာဉ်ကို ၂ ကြိမ်တိုင်တိုင် မိုင်းတုံမြို့နယ်ခွဲ မိုင်းထား အနီးရှိ လွယ်လမ်စစ်ဘေးရှောင်စခန်းအနီးတွင်ဝဲပျံကြောင်း၊ စက်တင်ဘာလ ၁၆ ရက်က တခါ ၂၃ ရက် တြိဂံတိုင်းမှူး ဗိုလ်မှူးချုပ်ခင်လှိုင် မှ ခလရ ၂၉၃ သို့ရောက်စဉ်ကတခါ ဖြစ်ကြောင်း ၊ လက်ရှိတွင် မိုင်းတော့မှ သံလွင်အနောက်ခြမ်း စကခ ၁၇ အခြေစိုက်ရာ မိုင်းပန်သို့ တိုက်ရိုက်လမ်းဖောက်နေမှု ပြီးစီးခါနီးပြီဖြစ်ကြောင်း၊ တဖက်ကလည်း NCA စာချုပ်အရ မိုင်းတော့ – မိုင်းထားအား RCSS/SSA ထိန်းချုပ်နေရာအဖြစ် ဆွေးနွေးသဘောတူထားကြရာ အဆိုပါဒေသတွ အစိုးရစစ်တပ်ရော တောင်ပိုင်း ၀ တပ်ဖွဲ့ ပါ အားဖြည့်တပ်စွဲထားကြကြောင်း ၊ ၄င်းတို့သည် လွယ်လမ်စစ်ဘေးရှောင်စခန်းမှ စစ်ဘေးရှောင်များ အား စိုးရိမ်ထိတ်လှန့်မှုများဖြစ်စေသည်အချက်များဖြစ်ကြောင်း ” လူ့အခွင့်အရေးမဏ္ဍိုင် ကြေငြာချက်တွင် ဖော်ပြထားသည်။

“လောလောဆယ် အပစ်ရပ်ငြိမ်းချမ်းရေး လက်မှတ်ထိုးထားတယ်ဆိုပေမယ့် တကယ့်ငြိမ်းချမ်းရေးမရသေးဘူး။ ဓါးသွေးပြီး ဓါးအိမ်ထဲပြန်ထည့်ထား တယ်။ ကျည်တောင့်တွေ ပြင်ဆင်ထားတယ် အဲလောက်ဘဲ။ အခုလည်း မိုင်းပန် မိုင်းတော့လမ်းပြီးရင် သူတို့လိုအပ်တဲ့ ကျည်တွေ လက်နက်တွေ ဖြည့်နိုင်ပြီလေ။ ကျနော်တို့ ဒီ လွယ်လမ်စစ်ရှောင်စခန်းမှာရှိတဲ့ စစ်ဘေးရှောင် ၂၀၀ ကျော်က ခုလောလောဆယ် အလှူရှင်တွေကနေ ရိက္ခါဖြတ်တောက်ထားတယ်။ သူတို့က နေရပ်မပြန်နိုင်သေးဘူးလေ။ ဟိုမှာက တိုက်ပွဲက မရပ်သေးဘူး။ ဆိုတော့ ဒီမှာဆက်နေရင် ကိုယ့်ဟာကို စိုက်ပျိုးရမယ်။ ပိုက်ဆံရှာရတော့မယ် ။ လွယ်လမ်မှာက စိုက်ပျိုးမြေက မကောင်းဘူး သီးနှံမဖြစ်ထွန်းဘူး။ ဒါကြောင့် အခု ရိက္ခာအတွက် ပူပန်နေရတဲ့ စစ်ဘေးရှောင်တွေဟာ အခုလို ဒရုန်းတွေလာဝဲတယ်၊ စစ်ရေးပြင်ဆင်မှုတွေလုပ်နေတယ်ဆိုတော့ သူတို့ခမျာတခုပြီးတခု စိုးရိမ်ပူပန်နေ ရတယ်။ အေးချမ်းမှုလုံးဝ မရနိုင်သေးဘူး ”- ဟု သျှမ်းလူ့အခွင့်အရေးမဏ္ဍိုင်၏ ပြောရေးဆိုခွင့်ရှိသူ စိုင်းဟော်ရှဲန် ကသျှမ်းသံတော်ဆင့်အားပြောသည်။

၄င်းနှင့်ပတ်သက်ပြီး ခလရ ၂၉၃ မှ ဒရုန်းဝဲသည်ဆိုသည်မှာ တြိဂံစစ်တိုင်းမှူးမှလာရောက်စစ်ဆေးစဉ်က ၀ဲခြင်းဖြစ်ကြောင်း စစ်တပ်နှင့်နီးစပ်သူ မိုင်းတုံဒေသခံတဦးကလည်းပြောသည်။

ထိုင်း-မြန်မာနယ်စပ်တလျှောက်တွင် သျှမ်းပြည်တွင်းမှ လာရောက်စစ်ဘေးခိုလှုံနေရသော သျှမ်းပြည်သား များ၏စစ်ဘေးရှောင်စခန်း ကုန်းကျော် ၊ လွိုင်တိုင်းလျဲန်း ၊ ကောင်းမုန်မိန်း ၊ လွယ်ဆမ်ဆစ် ၊ လွယ်ကော်ဝမ်း နှင့် လွယ်လမ် အစရှိသည့်   ၆ ခုရှိရာ စစ်ရှောင်လူဦးရေ ၆၀၀၀ ခန့်ရှိနေပါသည်။  ပြည်ပအလှူရှင်များက အဆိုပါစစ်ရှောင်စခန်းများအား စားနပ်ရိက္ခါထောက်ပ့ံပေး နေမှုကို ၂၀၁၇ ခုနှစ်က ဖြတ်တောက်လိုက်သည်ဖြစ်ရာ စစ်ဘေးရှောင်များမှာ နေရပ်ရင်းလည်းမပြန်နိုင် သေးသဖြင့် အခက်အခဲများစွာ ရင်ဆိုင်ကြုံတွေ့နေရကြောင်းသိရသည်။