ထိုင်းနိုင်ငံ ဒီမိုကရက်ပါတီ၏ ၇ ဦးမြောက်ပါတီခေါင်းဆောင်ဖြစ်သူ ထိုင်းနိုင်ငံ ၀န်ကြီးချုပ်ဟောင်း အဘီစစ်ဝေ့ချာချီဝ သည်ပါတီခေါင်းဆောင်အဖြစ်မှ အနားယူကြောင်း ပြောရေးဆိုခွင့်ရှိသူ မစ္စတာ ရာမေတ့် ရတန ဆဝိုင် က အောက်တိုဘာလ ၃ ရက်နေ့မနက်ပိုင်းက ကြေငြာလိုက်သည်။

လက်ရှိတွင် ပါတီ၏ ဒုတိယခေါင်းဆောင် မစ္စတာ ဆုရင်း လတ်ဆနာ ၀ိဆစ် အား ပါတီတာဝန်များကို မစ္စတာ အဘီစစ်မှ ခေတ္တ အပ်နှင်းထားပြီး ပါတီခေါင်းဆောင်အသစ် အဖြစ် အရွေးချယ်ခံရန် ၀င်ရောက်ယှဉ်ပြိုင်မည့်သူများ အောက်တိုဘာလ ၈ ရက်နေ့မှ ၁၅ ရက်နေ့အထိ အမည်စာရင်းပေးသွင်းနိုင်ကြောင်း ကြေငြာထားသည်။

ထိုင်းဘာသာဖြင့် ပရချာထိပတ် ဟုခေါ်သည့် ဒီမိုကရက်ပါတီအား ၁၉၄၆ ခုနှစ်က မစ္စတာ ခုန်း အဖိုင်းဝုန်း က စတင်တည်ထောင်ခဲ့သည်။ ၁၉၄၈ ခုနှစ် ပါတီစုံဒီမိုကရေစီရွေးကောက်ပွဲတွင် မဲအများဆုံးဖြင့်အနိုင်ရရှိကာ ပထမဆုံးအကြိမ် ထိုင်းနိုင်ငံအစိုးရ ဖြစ်ခွင့်ရခဲ့ပြီး ကနေ့အထိ ထိုင်းအစိုးရ ၆ ကြိမ်၊ အစိုးရနှင့်ပူးပေါင်းခွင့် ၄ ကြိမ် ၊ ၀န်ကြီးချုပ်အဖြစ် မစ္စတာအဘီစစ်အပါအဝင် ၄ ဦး ရရှိခဲ့ဖူးသည်။ ထို ၄ ဦးအနက် ပါတီတည်ထောင်သူ မစ္စတာ ခုန်း အဖိုင်းဝုန်း နှင့် မစ္စတာ ချွန် လစ်ပိုင်တို့မှာ ၀န်ကြီးချုပ်သက်တမ်း ၂ ကြိမ်ဆက်တိုက်စီ (တဦးလျှင် ၈ နှစ်စီ) နေရာရရှိခဲ့ဖူးသည့် နာမည်ကြီး ထိုင်းဝန်ကြီးချုပ်များ ဖြစ်ကြသည်။

ပါတီသက်တမ်း ၇၂ နှစ်ရှိ ပရချာထိပတ်ခေါ် ဒီမိုကရက်ပါတီသည် ထိုင်းနိုင်ငံတွင် သက်တမ်းအရင့်ဆုံးနှင့် ပါတီဝင် ၂ သန်းကျော်အထိရှိသော ပါတီဝင်အများဆုံး ပါတီတခုဖြစ်ကြောင်း သိရသည်။