သျှမ်းပြည်နယ် မြောက်ပိုင်း ကွတ်ခိုင်မြို့နယ် မန့်ပြိန်း ကျေးရွာတွင် မြန်မာတပ်မတော်နှင့် တအာင်း(ပလောင်) အမျိုးသားလွတ်မြောက်ရေး တပ်မတော်(TNLA) တို့ စစ်ရေးတင်းမာမှုကြောင့် ဒေသခံများ တိုက်ပွဲ ဖြစ်ပွားမည်ကို စိုးရိမ်မှုများဖြစ်ပွားနေကြကြောင်းသတင်းရရှိသည်။
စက်တင်ဘာ ၂၉ ရက်နေ့တွင် TNLA တပ်ဖွဲ့သည် မန့်ပြိန်း ကျေးရွာ တွင် ကားဘီးလှိမ့်ခွန် (ဆက်ကြေး) ကောက်ခံ မှုကြောင့် ဒေသခံများ တိုက်ပွဲဖြစ်ပွားမည်ကို စိုးရိမ်ကာ မန့်ပြိန်းကျေးရွာ ဒေသခံ ၂၀၀ ခန့်သည် သိန္နီမြို့ ရပ်ကွက် ၃ ကချင် ဘုရားကျောင်းသို့ လာရောက်တိမ်းရှောင်ကြကြောင်း သိရသည်။
“ သူတို့တွေ က စစ်ပွဲဖြစ်မှာ ကြောက်လို့ ခဏလာရှောင်တာပါ။ မနက်က (အောက်တိုဘာ ၁) ရက်နေ့ မနက် ၉ နာရီတော့ ပြန်သွားကြပြီ။ နယ်မြေကတော့ မငြိမ်းချမ်းတော့ တိုက်ပွဲ တွေ ထပ်ဖြစ်မှာ ကြောက်နေကြတယ် ” ဟု သိန္နီမြို့ နယ် ပြည်နယ် လွှတ်တော်ကိုယ်စာလှယ် အမှတ် ၂ စိုင်းစိန်လူ က သျှမ်းသံတော်ဆင့် သို့ ပြောသည်။
သျှမ်းပြည်နယ် မြောက်ပိုင်းက ယခင်ကဲ့သို့ မငြိမ်းချမ်းတော့ဘဲ တိုက်ပွဲများ မကြာခဏ ထိတွေ့မှုဖြစ်ပွားသဖြင့် ဒေသခံ ပြည်သူများ တိုက်ပွဲဖြစ်ပွားမည်ကိုစိုးရိမ် ထိတ်လန့်မှု ဖြစ်နေကြကြောင်း၊ လယ်ယာ စိုက်ပျိုးရေး ကို အေးချမ်းစွာ မလုပ်ကိုင်နိုင်ကြောင်း လည်း ကွတ်ခိုင်မြို့နယ် ဒေသခံများက ပြောကြသည်။
“ တိုုက်ပွဲက ဘယ်ချိန်ဖြစ်မယ်ဆိုတာ ခန့်မှန်းလို့မရဘူး။ တိုက်ပွဲတွေ ခဏ ခဏဖြစ်တော့ လယ်ယာ လုပ်ရမယ့်ချိန် မလုပ်နိုင်ဘူး။ တိုက်ပွဲတွေ အမြန် ရပ်စေချင်ပြီ” ဟု ကွတ်ခိုင် မှ ဒေသခံ အမျိုးသားတဦးက ပြောသည်။
ကွတ်ခိုင်မြို့ နယ် နှင့် သိန္နီမြို့နယ် အတွင်း တိုင်းရင်းသားလက်နက်ကိုင်များ၊ ပြည်သူ့စစ်များ နှင့် မြန်မာ့တပ်မတေ် တို့ လှုပ်ရှားနေသည့် နေရာ ဖြစ်သည်။
