တရုတ်-မြန်မာနယ်စပ်ရွှေလီမြစ်ဝှမ်းဒေသတွင် အခြေစိုက်လှုပ်ရှားသည့် တပ်မဟာ ၇၀၁ ၏ ယခင်က တပ်မဟာမှူး ဒု ဗိုလ်မှူးကြီး စွမ်မိန်းသည် သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA နှင့်ပူးပေါင်းလိုက်ပြီဖြစ်ကြောင်း ကြေငြာချက်ထုတ်ပြန်လိုက်သည်။
စက်တင်ဘာလ ၃၀ ရက်နေ့ရက်စွဲဖြင့် အမှတ် ၇၀၁ စစ်ဒေသမှူးဟောင်း ဒု ဗိုလ်မှူးကြီး စွမ်မိန်း လက်မှတ် ရေးထိုးကာ “ သျှမ်းပြည်အမျိုးသားရေးအတွက် အကောင်းဆုံးဖြစ်အောင်ပြုလုပ်ချိန်တန်ပြီဖြစ်လို့ ၊ တယောက်နဲ့တယောက် ပြစ်တင်ပြောဆိုမှုတွေပြောနေဖို့မလိုတော့ဘူး။ ဒါကြောင့် ကျနော် တပ်မဟာ ၇၀၁ ကိုဦးဆောင်တဲ့ ဒုဗိုလ်မှူးကြီး စွမ်မိန်း အနေနဲ့ စဝ်ပန်ဖှ ဦးဆောင်တဲ့ သျှမ်းပြည်တိုးတက်ရေးပါတီ သျှမ်းပြည်တပ်မတော်ထံ ပူးပေါင်းလိုက်ပြီဖြစ်ကြောင်း ကြေငြာချက် လိုက်ပါတယ် ”- ဟု တစောင် ထုတ်ပြန်ခဲ့သည်။
၄င်းအနေဖြင့် SSPP/SSA မူဝါဒကိုလက်ခံကြောင်း၊ ထို့အတွက် ၇၀၁ တပ်မဟာရှိ ကေဒါတပ်သားများအား လုံးကိုလည်း လာရောက်ပူးပေါင်းရန် တိုက်တွန်းကြောင်း၊ အမျိုးသားရေးလုပ်ငန်းစဉ် အပေါ် နားလည် သဘောပေါက်စေလိုကြောင်း ကြေငြာချက်တွင်ရေးသားဖော်ပြထားသည်။
အမှတ် ၇၀၁ စစ်ဒေသသည် RCSS/SSA ၏ စစ်ဒေသတခုဖြစ်သည်။ ၂၀၁၅ ခုနှစ်အထိ ဒု ဗိုလ်မှူးကြီး စွမ်မိန်း က ဦးဆောင်ခဲ့သည်။ ထိုနောက်ပိုင်း ဒု ဗိုလ်မှူးကြီး စွမ်မိန်း အား RCSS/SSA မှ အလုပ်မှထုတ်ပယ်ရပ်နားထားခိုင်းလိုက်သည်။
“အမှတ် ၇၀၁ စစ်ဒေသမှူး ဒု ဗိုလ်မှူးကြီး စွမ်မိန်း မှလက်မှတ်ရေးထိုးထားသည့်ကြေငြာချက်နှင့်ပတ်သက်ပြီး RCSS/SSA ၏ ပြောရေးဆိုခွင့်ရှိသူ ဗိုလ်မှူးကြီးစိုင်းဦးက – စဝ်စွမ်မိန်းက အလုပ်ကနားထားတာ ၅ နှစ် ၆ နှစ်ရှိပြီ။ အခု SSPP/SSA နဲ့ပူးပေါင်းလာတယ်ဆိုတာ သူ့ပုဂ္ဂိုလ်ရေးအရ တဦးတည်းအနေနဲ့ဘဲ လာပြီးပူးပေါင်းလာတာနေပါမယ်။ အခုက တပ်မဟာ ၇၀၁ ခေါင်းဆောင်က သူ မဟုတ်တော့ဘူးလေ။ တခြားတယောက်ဖြစ်သွားပြီကော် ” – ဟု သျှမ်းသံတော်ဆင့်အားအတည်ပြုပြောဆိုသည်။
လက်ရှိတွင် တပ်မဟာ ၇၀၁ သည် တရုတ်မြန်မာနယ်စပ်တလျှောက်တွင် လှုပ်ရှားသွားလာနေကြောင်းလည်း သိရပါသည်။
