ထိုင်းနိုင်ငံမြောက်ပိုင်း ချင်းရိုင်းခရိုင် မယ်ကျန်းမြို့နယ် မယ့်ဆလောင်းနှင့် မယ့်ကျန်းကြား ထိုင်းရဲများထောင်ထားသည့်ဂိတ်မှ ယာဘ အပြားပေါင်း ၁၂ သန်းကျော် နှင့် တခြားမူးယစ်ဆေးဝါး တန်ဖိုးပေါင်းမြောက်များစွာ ဖမ်းဆီးရမိရာ မြန်မာနိုင်ငံဘက်ခြမ်း လက်နက်ကိုင်အဖွဲ့အစည်း များနှင့်ပတ်သက်ဆက်နွယ်သည်ဟုပြောဆိုလိုက်သည်။

စက်တင်ဘာလ ၂၅ ရက်နေ့က အဆိုပါမူးယစ်ဆေးများဖမ်းဆီးရမိခြင်းဖြစ်ပြီး စက်တင်ဘာလ ၂၆ ရက်နေ့တွင် သတင်းစာရှင်း လင်း ပွဲတရပ်ပြုလုပ်ရာ ယာဘများမှာ 999 ၊ ကြယ် ၅ လုံးတံဆိပ်များဖြစ်ကြကြောင်း၊ ယာဘ ၁၂ သန်း ၄ သိန်းပြား (၆၅ အိတ်) နှင့် အိုက် ၅၁၂ ကီလိုဂရမ် ၁၃ အိတ်တို့ဖြစ်ကြပြီး မြန်မာနိုင်ငံဘက်ခြမ်း သျှမ်းပြည်အရှေ့ပိုင်း ၀ လက်နက်ကိုင်တပ်ဖွဲ့တို့နှင့် ပတ်သက်ဆက်နွယ်သည့်သူများဖြစ်ကြောင်း ထိုင်းရဲများကပြောဆိုသည်။

ထိုင်းရဲများဘက်က ဒု-ဗိုလ်မှူးကြီး ဖာနုဒိတ် ဖုန်းရွန်း က- ဒီမူးယစ်ဆေးတွေတင်တဲ့ကားမလာခင် ဆိုင်ကယ် စီးလူ ၂ ယောက် ကိုအရင် တားတယ်။ သူတို့နောက်ကနေလိုက်လာတဲ့ ဒီမူးယစ်ဆေးတင်တဲ့ကားက ဂိတ်နားအရောက် ကားပြန်လှည့်ပြီး မောင်း ပြေးတယ်။ ကျနော်တို့ဘက်က လိုက်တယ်။ လမ်းတနေရာမှာကားရပ်ပြီး ကားမောင်းသမားထွက်ပြေးသွားတယ်။ ဆိုင်ကယ်နဲ့လူ ၂ ယောက်ကိုဖမ်းထားတယ်။ ၀ တပ်ဖွဲ့နဲ့ပတ်သက်ဆက်နွယ်နေတယ် – ဟုပြောဆိုသည်။

အဖမ်းခံထားရသူ ၂ ဦးမှာ နယ်စပ်မှ အခကြေးငွေယူပြီး သယ်ဆောင်ပို့ပေးခြင်းဖြစ်ကြောင်း ပိုင်ရှင်မှန်မှာမသိဘဲ သယ်ဆောင် ခအဖြစ် ဘတ်ငွေ ၁ သောင်းရရှိကြောင်း ထိုင်းရဲများထံ ၀န်ခံပြောဆိုသည်ဟု ထိုင်းသတင်းတရပ်တွင် ဖော်ပြထားသည်။

၄င်းနှင့်ပတ်သက်ပြီး လားရှိုးအခြေစိုက် UWSA ၀ တပ်ဖွဲ့ဆက်ဆံရေးရုံးမှအရာရှိ ဦးညီရမ်း က- “ဒီကိစ္စကတော့ ယိုးဒယားကတော့ အမြဲတမ်း စွပ်စွဲနေတာ ကြာလာခဲ့ပြီ။ ဒီလိုဖမ်းမိတာနဲ့ အားလုံးကို ဝ လို့ပဲ လွှဲချနေကြတယ်။ ကျနော်တို့အနေနဲ့ ဒီကိစ္စကို မျက်စိစုံမှိတ်ပြီး ငြင်းနေတာ မဟုတ်ဘူး။ သက်သေအထောက်အထား ပြနိုင်တယ်ဆိုရင် ကျနော်တို့တောင်မှ ကျေးဇူးတင်ရဦးမယ်နော်၊ ပြင်းထန်တဲ့ အရေးယူမှုတွေလုပ်ဖို့ ကျနော်တို့က အဆင်သင့်ပဲ။”- ဟု DVB သတင်းဌာနအား ဖြေကြားသည်။

ဖမ်းဆီးရမိထားသော ဆိုင်ကယ်သမား ၂ ဦးအား ဆက်လက်စစ်ဆေးရန် ထိန်းသိမ်းထားမည်ဖြစ်ကြောင်းထိုင်းရဲ များ ကပြောဆိုပြီး ၊တခြားထိုင်းသတင်းဌာန နောက်တခုကမူ တြိဂံတိုင်းရုံးထိန်းချုပ်နယ်မြေအတွင်းရှိ ပူနားကို လားဟူရွာအခြေစိုက် နယ်ခြားစောင့်တပ်ဖွဲ့နှင့် ပတ်သက်ဆက်နွယ်နေသူများဖြစ်ကြောင်း ဖော်ပြထားသည်။