ကြားဖြတ်ရွေးကောက်ပွဲအတွက် မန္တလေးတိုင်းဒေသကြီး ပြင်ဦးလွင်မြို့နယ်အတွင်း သျှမ်းတိုင်းရင်းသားများ ဒီမိုကရေစီအဖွဲ့ချုပ်မှ စည်းရုံးရေးဆင်းရာတွင် ရပ်ကွက်အုပ်ချုပ်ရေးမှူးမှ ဟန့်တားမှုပြုခဲ့သည်ဟု သိရှိရသည်။

စက်တင်ဘာလ ၂၁ ရက် SNLD ကျားခေါင်းပါတီ ကား ၆ စီးခန့်ရှိ စည်းရုံးရေးအဖွဲ့ က ပြင်ဦးလွင်မြို့ ရပ်ကွက် ကြီး ၂၀ နောင်ခမ်းကြီးကျေးရွာသို့ရောက်ရှိစဉ် – ရပ်ကွက်အုပ်ချုပ်ရေးမှူးမှ အိုးစည်ပုံမောင်း မတီးရန် တားမြစ် ခြင်း၊ စည်းရုံးရေးဆင်းနေစဉ် ဟောပြောနေသူ၊ နားထောင်နေသူဒေသခံများ အား ခွင့်ပြုချက်မတောင်းဘဲ ဓါတ်ပုံ ရိုက်ခြင်း၊ စည်းရုံးရေးဆင်းပြီးနောက် SNLD အားလက်ခံကြိုဆိုသည့် အိမ်ရှင်အားဖုန်းဆက် ခေါ်ယူကာ ခွင့်ပြုချက်မတောင်းဘဲ အိုးစည်ဗုံမောင်းတီးကြိုဆိုမှုပြုခြင်းသည် ရပ်ရွာလူကြီးအား မထေမဲ့မြင်ပြုလုပ်သည် ဟုဆိုကာ ခြိမ်းခြောက်ဟန့်တားမှုများ ပြုလုပ်ခဲ့ကြောင်းသိရသည်။

SNLD ကျားခေါင်းပါတီ ပြောခွင့်ရ စိုင်းလိတ်က –  “အန်အယ်ဒီပါတီ ကော ကြံ့ခိုင်ရေးပါတီကော စည်းရုံးရေးဆင်းပြီးသွားပြီ။ သူတို့အလှည့်တုန်းကလည်း ရွာသားတွေက အိုးစည်ဗုံမောင်းတီးပြီးတော့မှ ကြိုဆိုတယ်။ ဘာမှပြသနာမရှိဘူး။ အခု ကျနော်တို့ သွားတဲ့ အလှည့်ကျမှဘဲ အိုးစည်ဗုံမောင်းတီးခွင့်မရှိဘူးလို့ကန့်သတ်ချက်ထွက်လာတော့ ဒါမဲဆန္ဒရှင်ကိုတဖက်လှည့် ခြိမ်းခြောက်တာဘဲ။ တရားမဲ့ပြုကျင့်တာဘဲလို့ကျနော်တို့ယူဆတယ်။ ဒါကြောင့်ကျနော်တို့လုံးဝ ကန့်ကွက်တယ်။ နောက်နောင် ဒီလိုအလားသဏ္ဍာန်ထပ်ပေါ်ပေါက်ရင် လိုအပ်ရင် ယူအီးစီအထိ တိုင်ကြားသင့်ရင် တိုင်ကြားသွားမယ်လို့ ကျနော်တို့ ပြောချင်ပါတယ်။ “- ဟု သျှမ်းသံတော်ဆင့်အား ပြောပြသည်။

SNLD ပါတီမှ ရပ်ကွက်ကြီး ၂၀ နောင်ခမ်းကြီးကျေးရွာ သားများနှင့် တွေ့ဆုံစည်းရုံးဟောပြောသည့်နေရာမှာ ပါနန်းကျောင်းအိမ် တို့၏အိမ်ဖြစ်ပြီး စည်းရုံးဟောပြောမှုပြုနေစဉ် ခွင့်ပြုချက်မတောင်းဘဲ အထက်လူကြီးအမိန့် အရ ဟုဆိုကာ ဓါတ်ပုံဝင်ရိုက်သူမှာ ရာအိမ်မှူး ကိုနိုင် ဆိုသူဖြစ်ကြောင်း ၊ အိမ်ရှင်အပါအဝင် ရပ်မိရပ်ဖ စိုင်းချစ်ဦး နှင့် စိုင်းအောင်ကြီးတို့အား ဖုန်းဆက်ဆင့်ခေါ်သူမှာ အုပ်ချုပ်ရေးမှူး အောင်ဇော်မြင့် ဆိုသူဖြစ်ကြောင်း လည်း စည်းရုံးရေးခရီးစဉ်တွင်လိုက်ပါသည့် SNLD ပါတီဝင်လူငယ်တဦးက သျှမ်းသံတော်ဆင့်အား ပြောပြသည်။

“ ဒီကိစ္စက ကျနော်တို့ခရိုင်ကော်မတီကို ဖုန်းဆက်ပြောပြီးပြီ။ ခရိုင်ကော်မတီဆီမှာခွင့်တောင်းထားပါလျှက်နဲ့ အခုလိုခြိမ်းခြောက်နှောင့်ယှက်တာမျိုးတော့မဖြစ်သင့်ဘူး။ ပြင်ဦးလွင် မြို့နယ်အုပ်ချုပ်ရေးမှူးကိုလည်း ကျနော်တို့ လွှတ်တော်ကိုယ်စားလှယ်တွေကနေ ဖုန်းဆက်တယ်။ မြို့နယ်အုပ်ချုပ်ရေးမှူးကလည်း ဒီကိစ္စ စီစစ်ပြီးတော့ ဆောင်ရွက်ပေးပါမယ်လို့ပြောတယ်။ ” – ဟု သျှမ်းပြည်မြောက်ပိုင်း SNLD ပါတီအတွင်းရေးမှူးလည်းဖြစ်သည့် အမျိုးသားလွှတ်တော်ကိုယ်စားလှယ် စိုင်းဝမ်းလျန်းခမ်း ကပြောသည်။

ပြင်ဦးလွင်မြို့နယ် နောင်ခမ်းကြီးကျေးရွာအုပ်စု ရပ်ကွက်ကြီး ၂၀ တွင် သျှမ်းလူမျိုး လူဦးရေ ၅၀၀ ကျော် အိမ်ခြေ ၁၅၀ ကျော်ရှိကြောင်း သိရသည်။ ၂၀၁၅ အထွေထွေရွေးကောက်ပွဲတွင် ဗမာအမျိုးသား ဦးကျော်ဇော က အမျိုးသားဒီမိုကရေစီအဖွဲ့ချုပ်မှ ၀င်ရောက်ယှဉ်ပြိုင်ပြီး မန္တလေးတိုင်းဒေသကြီး သျှမ်းတိုင်းရင်းသားရေး ရာဝန်ကြီးဖြစ်လာသည်။ သို့သော် ၂၀၁၈ ယခုနှစ်ဦးပိုင်းက ၄င်းကွယ်လွန်သွားသောကြောင့် သျှမ်းတိုင်းရင်း သား ရေးရာဝန်ကြီး နေရာလစ်လပ်လာခြင်းဖြစ်သည်။

မန္တလေးတိုင်းတွင် သျှမ်းတိုင်းရင်းသားရေးရာကိုယ်စားလှယ်အတွက် NLD ပါတီ ၊ ကြံ့ခိုင်ရေးပါတီ နှင့် SNLD ပါတီတို့အပြင် တသီးပုဂ္ဂလများလည်း ယှဉ်ပြိုင်မည်ဖြစ်ရာ ကျားခေါင်းပါတီမှ နန်းထွေးမှုံက ၀င်ရောက်ယှဉ်ပြိုင်မည်ဖြစ်ကြောင်းသိရသည်။ ယှဉ်ပြိုင်မည့်သူအားလုံးနီးပါးမှာ သျှမ်းတိုင်းရင်းသားများသာဖြစ်ကြောင်းလည်းသိရသည်။

ကြားဖြတ်ရွေးကောက်ပွဲကို ယခုနှစ် နို၀င်ဘာလခန့်တွင်ကျင်းပမည်ဖြစ်ကြောင်းသိရသည်။