တိုင်းရင်းသားလူမျိုးများ ၏ရိုးရာယဉ်ကျေးမှုဓလေ့ထုံးတမ်း အစဉ်အလာ ကို ပိုမိုထိရောက်သော အကာ အကွယ်ပေးရေးနှင့် တိုင်းရင်းသားများ၏အခြေချရာနေရာများသို့ တာဝန်ရှိသူအသီးသီးက စဉ်ဆက်မပြတ် ထိတွေ့ကွင်းဆင်း ဆောင်ရွက်ပေးနိုင်ရေး အတွက် နမ့်စန်မြို့နယ် ပြည်နယ်လွှတ်တော်အမတ်က အဆိုတင်သွင်းရာ ပြည်နယ်လွှတ်တော်က အတည်ပြုခဲ့ကြောင်းသိရသည်။

သျှမ်းပြည်တောင်ပိုင်း လွယ်လင်ခရိုင် နမ့်စန်မြို့နယ်အတွင်း တအာင်းတိုင်းရင်းသားများအား ကြတ်များဟု ဆိုကာ Social Media တွင် ပျံ့နေသည့်ကိစ္စပေါ်အခြေခံပြီး တိုင်းရင်းသားများ၏ ရိုးရာယဉ်ကျေးမှု အကာ အကွယ်ပေးရေးအတွက် နမ့်စန်မြို့နယ် ပြည်နယ်လွှတ်တော်အမှတ် ၁ မဲဆန္ဒနယ်မှ ဦးလင်းအောင်ဆွေ က ပြည်နယ်လွှတ်တော် ပထမရက် စက်တင်ဘာလ ၁၃ ရက်နေ့တွင်အဆိုတင်သွင်းခဲ့ပြီး ၄င်းအဆိုကို လွှတ်တော် ဒုတိယနေ့ စက်တင်ဘာ ၁၄ ရက်တွင်အတည်ပြုကြောင်း ပြည်နယ်လွှတ်တော်က ပြန်လည်ဖြေကြားခဲ့ပါသည်။

နမ့်စန်မြို့နယ် ပြည်နယ်လွှတ်တော်ကိုယ်စားလှယ် USDP ပါတီမှ ဦးလင်းအောင်ဆွေ က “သျှမ်းပြည်နယ်မှာ ရှိတဲ့ တိုင်းရင်းသားလူမျိုးစုတွေရဲ့ရိုးရာ ယဉ်ကျေးမှု မထိခိုက်အောင် သျှမ်းပြည်မှာနေထိုင်တဲ့ တိုင်းရင်းသားလူမျိုးစုငယ်တွေရဲ့ ယဉ်ကျေးမှု ကို မြှင့်တင်ပြီး ပိုမိုတိုးတက်မြင့်မားလာအောင်ဆိုပြီးတော့ ကျနော်တို့ကို ကိုယ်စားပြုပေးဖို့ဒီနေရာကို တွန်းပို့ပေးခဲ့တဲ့ တိုင်းရင်းသားပြည်သူလူထု အတွက် ရည်ရွယ်ပြီး ဒီအဆိုကို တင်သွင်းလိုက်ခြင်းဖြစ်ပါတယ်” ဟု ပြောကြားခဲ့ပါသည်။

သျှမ်းပြည်နယ်အစိုးရ ဘဏ္ဍရေးဝန်ကြီး ဗမာတိုင်းရင်းသားရေးရာဝန်ကြီး ဒေါက်တာအောင်သန်းမောင် ကလည်း တိုင်းရင်းသားလူမျိုးစု၏ ရိုးရာယဉ်ကျေးမှု ဓလေ့ထုံးတမ်းအစဉ်အလာတွေကို လုံးဝမထိခိုက်အောင် ဆောင်ရွက်ပေးဖို့ ဥပဒေ၊နည်းဥပဒေနဲ့ Cyber ဥပဒေ အစ အတိအကျရှင်းလင်းဖော်ပြ ပေးသွားကြောင်း သိရသည်။

“ ကျနော့်နယ်ကတိုင်းရင်းသားတစ်စုကို Facebook Media ပေါ်မှာ သူတို့ကို မဟုတ်မမှန်တွေလုပ် လိုက်တဲ့ အတွက် ကျနော်လုံး ၀ မကျေနပ် ဘူး ။ လူမျိုးစု နဲ့ တိုင်းရင်းသားတွေအပေါ် မည်သူ့ကိုမှ ထိခိုက်မခံချင်တဲ့ စိတ်နဲ့သူတို့ကို ကာကွယ်ပေးဖို့ ပါပဲ” ဟု ဦးလင်းအောင်ဆွေ ကပြော သည်။

၄င်းအစည်းအဝေးကို ပြည်နယ်လွှတ်တော် ဥက္ကဌပြည်နယ်လွှတ်တော်ကိုယ်စားလှယ်များ စုစုပေါင်း ၁၂၀ ကျော်တက်ရောက်ခဲ့သည်။ အဆိုပါအဆိုအား ပြည်နယ်လွှတ်တော်ကိုယ်စားလှယ် သုံးဦး ကလည်း ထောက်ခံဆွေးနွေးရာ လွှတ်တော်ကိုယ်စားလှယ်များအားလုံး သဘောတူထောက်ခံချက်ပေးသဖြင့် အဆိုအားအတည်ပြုသွားခဲ့ကြောင်းလည်းသိရပါသည်။