သျှမ်းပြည်တောင်ပိုင်း နမ့်စန်မြို့တွင် ထိန်းသိမ်းခံထားရသည့် အွန်လိုင်းကျားဖြန့် ငွေလိမ်ဂိုဏ်းများအတွက် ပြည်သူမှ အခမဲ့ ဝေပေးသည့် ထမင်းထုပ်များကို လူဝင်မှုကြီးကြပ်ရေး လဝကရုံး ဝန်ထမ်းများက ပြန်ရောင်းစားနေကြောင်း စုံစမ်းသိရသည်။

ပြီးခဲ့သည့် မတ်လ ၂၂ ရက်တွင် စစ်ကောင်စီတပ်ဖွဲ့မှ ကျေးသီး၊ နမ့်စန်၊ ခိုလမ်နှင့် လဲချားမြို့နယ်အတွင်း ဖမ်းဆီးရမိခဲ့သည့် ကျားဖြန့်လုပ်ကိုင်သူ (၇၀၀)ကျော်ကို နမ့်စန်မြို့ ရပ်ကွက် (၅) ရှိ အားကစားရုံတွင် ထိန်းသိမ်းထားပြီး၊ ၎င်းတို့ စားသောက်ရန်အတွက် မြို့ပေါ် ရပ်ကွက် (၅) ခုမှ တစ်ရပ်ကွက်လျှင် ထမင်းထုပ် ၁၅၀ ထုပ်စီ လဝကရုံးတွင် သွားပေးထားရသည်။

ပြည်သူများမှ အခမဲ့ ပေးလိုက်သည့် ထမင်းထုပ်များကို လဝကရုံးဝန်ထမ်းများမှ ထမင်းတစ်ထုပ်လျှင် ကျပ်ငွေ နှစ်သောင်းမှ သုံးသောင်းအထိ ‌ဈေးတင်ပြီး ဖမ်းဆီးခံထားရသည့် ၎င်းကျားဖြန့်လုပ်ကိုင်သူများကို ပြန်လည်ရောင်းချကြောင်း နမ့်စန်ဒေသခံတစ်ဦးက သျှမ်းသံတော်ဆင့်ကို ပြောသည်။

“လဝကရုံးကနေ ဖမ်းထားတဲ့ ကျားဖြန့်အတွက် ထမင်းထုပ်ကို မဖြစ်မနေ ပေးခိုင်းတယ်။ တကယ်တမ်း သူတို့က ကျားဖြန့်တွေကို ပြန်ရောင်းစားကြတာ။ ထမင်းတစ်ထုပ်ဆို ၂ သောင်း ၃သောင်း၊ ရေတစ်ကဒ်ဆို ၂ သောင်း အဲလိုတွေ ပြန်ရောင်းတာ။ သူတို့ဆီကနေ ရွှေတွေ ဖုန်းတွေလည်း အများကြီးရတယ်။ ပိုက်ဆံဆို တစ်ယောက်ကို ၁၀ သိန်းကျော် အနည်းဆုံးရတာပဲ”ဟု ဖြစ်စဉ်သိရှိသူ ၎င်းဒေသခံက ပြောသည်။

ထို့အပြင် စစ်ကောင်စီတပ်သည် ကျားဖြန့်လုပ်ကိုင်သူများထံမှ သိမ်းဆည်းထားသည့် ဖုန်းနှင့် ကွန်ပျူတာများကိုလည်း မြို့အတွင်း၌ ပြန်လည်ရောင်းချမှု ပြုလုပ်နေကြောင်း အသက် ၂၅ နှစ် အရွယ်ရှိ လူငယ်အမျိုးသားတစ်ဦးက ပြောသည်။

“လဝက ရုံးက ဒုတိယ ကျားဖြန့်နေရာလို ဖြစ်နေတယ်၊ ပြည်သူတွေကိုလည်း ပေါ်တင်ကြီး လိမ်နေတယ်။ ပြီးတော့ ကျားဖြန့်ဆီက သိမ်းထားတဲ့ ဖုန်းတွေ ကွန်ပျူတာတွေဆို ပြန်ရောင်းနေတာ။ ကျားဖြန့်တွေကို ဘာလို့အကြာကြီး ထားနေလဲ၊ မြန်မြန် ပြန်ပို့ပေးစေချင်ပြီ”ဟု ၎င်းလူငယ် အမျိုးသားက သျှမ်းသံတော်ဆင့်ကို ပြောသည်။

မတ်လ တတိယပတ်မှ စတင်ပြီး သျှမ်းပြည်တောင်ပိုင်းတကြောရှိ အွန်လိုင်းကျားဖြန့် ငွေလိမ်ဂိုဏ်းများကို စစ်ကောင်စီမှ အသည်းအသန် ရှာဖွေဖမ်းဆီးမှုများ ပြုလုပ်လျက်ရှိရာ ဖမ်းဆီးရမိသည့် တရုတ်နိုင်ငံသားများကို စစ်ကောင်စီက နမ့်စန်မြို့သို့ ခေါ်ဆောင်လာခြင်းကြောင့် ပြည်သူများအတွက် ဝန်ထုပ်ဝန်ပိုး ဖြစ်နေကြောင်း ဒေသခံများက ပြောဆိုသည်။

လက်ရှိတွင် နမ့်စန်မြို့သို့ ဖမ်းဆီးခေါ်ဆောင်လာသည့် ကျားဖြန့်လုပ်ကိုင်သူ (၇၂၃) ဦးထဲတွင် တရုတ်နိုင်ငံသား အများအပြား ပါဝင်ပြီး စစ်ကောင်စီက ၎င်းတို့၏ နိုင်ငံသို့ ပြန်လွှဲပြောင်းရန် စီစဉ်နေကြောင်း သိရသည်။