မိုင်းရှူးမြို့နယ်၊ မိုင်းစံဒေသအတွက် ထိရောက်သောကျန်းမာရေး ဝန်ဆောင်မှုများလိုအပ်ကြောင်း မိုင်းရှုးမြို့နယ် မဲဆန္ဒနယ်အမှတ် ၁ လွှတ်တော်အမတ် စိုင်းလင်းမြတ်က သျှမ်းပြည်နယ်လွှတ်တော်အစည်းအဝေးတွင် ကြယ်ပွင့်ပြမေးခွန်းမေးခဲ့သည်။
သျှမ်းပြည်နယ်တောင်ပိုင်း တောင်ကြီးမြို့ ဒုတိယအကြိမ် သျှမ်းပြည်နယ်လွှတ်တော်(၁၁) ကြိမ်မြောက်ပုံမှန်အစည်းအဝေး ပြန်လည်စတင်သော စက်တင်ဘာ ၁၇ နေ့ တွင်ထိုသို့မေးမြန်းခဲ့ခြင်းဖြစ်သည်။
“မိုင်းစံမှာ တိုက်နယ်ဆေးရုံရှိတယ်။ အဲ့ဆေးရုံက စဆောက်ကတည်းက ပိတ်ထားတယ် ။ မိုင်းစံမြို့နဲ့ ဘေးပတ်ဝန်းကျင်မှာ လူဦးရေတစ်သောင်းဝန်းကျင်လောက်ရှိတယ်။ မိုင်းစံမြို့မှာ သားဖွားဆရာမတစ်ယောက် ရယ်၊ ကြီးကြပ်တစ်ယောက်ရယ် ရှိတယ်။ သားဖွားဆရာမက သင်တန်းတက်နေတယ် ကြီးကြပ်နဲ့ပဲသွားနေရတယ်။ ရပ်ရွာတွေမှာဆို နိုင်ငံခြား အင်္ဂလိပ်ဆေး တွေမသုံးရဘူး ခုချိန်ထိ။ သစ်ဥသစ်ဖုနဲ့ပဲ ကုနေရတဲ့အခြေနေရှိတယ်။ မိုင်းစံမှာ ကျန်းမာရေးဌာနခွဲပဲရှိတယ် self-center မရှိဘူး ။အဲ့ဒါကို ကျန်းမာရေးဌာနကြီးဖြစ်အောင် တောင်းခဲ့တယ် ဒါပေပမဲ့ထူးခြားမှုမရှိဘူးဟု” မိုင်းရှုးမြို့နယ် မဲဆန္ဒနယ်အမှတ် ၁ လွှတ်တော်အမတ် စိုင်းလင်းမြတ်က ပြောကြားခဲ့ပါသည်။
၄င်းနှင့်ပတ်သက်ပြီး ၀န်ကြီးက နေပြည်တော်သို့တင်ပြထားကြောင်း ပြောဆိုသည်ဟု သိရသည်။
“အရင်ကတခါမေးဖူးတယ် ။နေပြည်တော်ကိုတင်ထားတယ်ဘဲပြောတယ်။အခုလည်းအဲလိုဘဲပြောပါတယ်” -ဟု စိုင်းလင်းမြတ်ကပြောသည်။
၎င်းအစည်းအဝေးကို ပြည်နယ်လွှတ်တော် ဥက္ကဌ ပြည်နယ်လွှတ်တော်ကိုယ်စားလှယ်များ စုစုပေါင်း ၁၂၅ ဦး တက်ရောက်ခဲ့ပြီး ခွင့်ပန်ကြားထားသူ ၁၈ ဦးရှိကြောင်းသိရပါသည်။
မိုင်းစံအုပ်စုသည်မိုင်းရှူးမြို့ တောင်ဘက်တွင်တည်ရှိပြီးလက်ရှိတွင် သွားလက်ဆက်သွယ်မှုလွယ်ကူနေပြီဖြစ်ကြောင်း သို့သော် ကျန်းမာရေးဝန်ဆောင်မှုအတွက်ခက်ခဲနေဆဲဖြစ်ပြီး ဒေသခံများသည် မိုင်းရှူးဆေးရုံသို့ သာသွားရောက်ကုသမှုခံယူနေရဆဲဖြစ်ကြောင်းသိရသည်။
Leave a Comments