TNLA ဖမ်းထားသည့် ကလေးသုံးယောက်အမေ နန်းမိုဟွမ် လွတ်မြောက်ရေးအတွက် နမ့်ခမ်းမြို့ခံ ၂ သောင်းကျော်က ယနေ့နံနက်ပိုင်းတွင် ငြိမ်းချမ်းစွာ စီတန်းလှည့်လည်ဆန္ဒပြတောင်းဆိုကြသည်။

 စက်တင်ဘာလ ၁၇ ရက် ယနေ့မနက်ပိုင်း ၈ နာရီအချိန်က နန်းမိုဟွမ် ဖမ်းဆီးခြင်းတလ ပြည့်အနေဖြင့် ၄င်းလွတ်မြောက်ရေးအတွက် နမ့်ခမ်းမြို့လယ်အား တပတ်ပတ်ပြီး ငြိမ်းချမ်းစွာ ဆန္ဒပြတောင်း ဆိုကြသည်။

 ဆန္ဒပြမှုတွင်ဦးဆောင်ပါ၀င်ခဲ့သည့် နမ့်ခမ်းလူငယ် စိုင်းအိုက်ခေးက – “ဒေသခံလူထုကို ဖမ်းဆီးတာမျိုး ဘယ်လက်နက်ကိုင်ကိုမဆိုကျနော်တို့ဆန့်ကျင်တယ်။ လက်နက်ကိုင်ဆိုတာ လူထုကို အကာအကွယ်ပေးဖို့ဖြစ်တယ်။ ဒါကြောင့် ဒေသခံပြည်သူလူထုတယောက်ဖြစ်တဲ့ နန်းမိုဟွမ်ကို အမြန်ဆုံးပြန်လွှတ်ပေးဖို့ TNLA  ကို တောင်းဆိုပါတယ်။ အခုလို နမ့်ခမ်းဒေသခံ တရပ်လုံးက တောင်းဆို နေတာတောင်  နန်းမိုဟွမ်ကို ပြန်မလွှတ်ပေးသေးဘူးဆိုရင် အနာဂတ်မှာ  နမ့်ခမ်းမှာနေထိုင်တဲ့ သျှမ်းနဲ့တအာင်းလူထုကြား ချစ်ကြည်ရင်းနှီးမှုပြိုကွဲသွားမှာကိုစိုးရိမ်တယ်။ ဒါကြောင့်အမြန်ဆုံးလွှတ်ပေးဖို့ တောင်းဆိုပါတယ် ”– ဟုပြောသည်။

 နမ့်ခမ်းမြို့နယ် ဒေသခံလူထုသည် – “TNLA မှဖမ်းဆီးသွားသောနန်းမိုဟွမ်အား -ချက်ချင်းလွှတ် ချက်ချင်းလွှတ်”၊”မတရားဆက်ကြေးကောက်ခြင်း အား -ချက်ချင်းရပ် ချက်ချင်းရပ်”၊ “အကြမ်းဖက်ဝါဒတိုက်ဖျက်ရေး  – ဒို့အရေး ဒို့အရေး”၊ “တရားဥပဒေ စိုးမိုးရေး  – ဒို့အရေး ဒို့အရေး” အစရှိကြွေးကြော်ပြီး နမ့်ခမ်းမြို့လယ်အား တပတ်ပတ်ကာ ဆန္ဒပြခဲ့ကြသည်။

လက်နက်မဲ့  ဒေသခံလူထုအား TNLA  မှဖမ်းဆီးသည်မှာ ယခုပထမဆုံးအကြိမ် မဟုတ်တော့ကြောင်း၊ ယခင်ကလည်း ဖမ်းဆီးသွားခဲ့သည်များရှိခဲ့ဖူးကြောင်း၊ နှစ်ပေါင်းကြာလာသည့်တိုင်အောင် သတင်းမကြားဘဲရှိနေသဖြင့် အဖမ်းခံရသူများ၏ မိသားစုဝင်များ က စိုးရိမ်ပူပန်နေကြကြောင်း ဆန္ဒပြမှုတွင်ပါ၀င်သည့် မိသားစုဝင်များကပြောသည်။

 ၂၀၁၆ ခုနှစ်ကတည်းက သားဖြစ်သူ စိုင်းယီ့ဆိုင်မိန်းအား TNLA မှ ဖမ်းဆီးသွားခဲ့ပြီးယနေ့တိုင် ပြန်မလွှတ်ပေးသေးသည့်အပေါ်အဖမ်းခံရသူ၏ ဖခင်ဖြစ်သူ စိုင်းလိန်ဆိုင် က- “ဖမ်းသွားကတည်းက ခုချိန်ထိဘာသတင်းမှမကြားရဘူး။ သေလားရှင်လားလည်းမသိဘူး။ ကျနော်တို့ မိဘဖြစ်သူ၊ ဆွေးမျိုးဖြစ်သူတွေက နေ့တိုင်းဘဲစိတ်သောက ရောက်နေရတယ်။ သူခိုးဆိုရင်  သူလိုတာဘဲသူယူသွားမယ်။ ပြန်ပေးဆွဲ သူဆိုရင်လည်း အနည်းဆုံး မိဘဆွေမျိုးတွေကိုတော့ အသိပေးပါလိမ့်မယ်။ အခုက အဲဒါတွေထက်ပိုဆိုးနေတယ်။ ဒါမျိုးတွေ ဆက်မဖြစ်စေချင်ဘူး။ ကျနော့သားလိုမျိုး နန်းမိုဟွမ်လိုမျိုး ထပ်မလုပ်ဖို့ TNLA ကိုတောင်းဆိုချင်တယ်။ အခုလိုလူထုရဲ့ဆန္ဒကိုသိရပြီဖြစ်လို့ TNLA ကနေ ကိုယ်ချင်းစာတရားရှေ့ထားပြီး  ပြန်လွှတ်ပေးပါလိမ့်မယ်လို့ မျှော်လင့်ပါတယ်။” – ဟုပြောသည်။

အဖမ်းခံရသူ  နန်းမိုဟွမ်၏ အမဖြစ်သူ နန်းမိုခမ်းကလည်း ညီမဖြစ်သူအမြန်ဆုံးပြန်လည်လွှတ်မြောက်ရေးအတွက်ပါ၀င်ကူညီခဲ့သည့် နမ့်ခမ်းဒေသခံများအား  ကျေးဇူးတင်ကြောင်း၊ နမ့်ခမ်းလူထုဆန္ဒအား သိမြင်ကာ ညီမဖြစ်သူအား အမြန်ဆုံးပြန်လွှတ်ပေးဖို့ TNLA  အား တောင်းဆိုကြောင်း ပြောဆိုသည်။

 “မိသားစုအလိုက်ဆန္ဒုပြခဲ့ပြီးနောက်ပိုင်း ခုချိန်အထိ ဘာသတင်းမှမကြားရ ဘာမှမပြောလာဘူး။ မိသားစုအနေနဲ့လည်းစိတ်ပူတယ်။ ကျန်းမာရေး လုံခြုံရေးအခြေအနေအစစအရာရာ စိုးရိမ်တယ်။ သားသမီးတွေလည်း အရမ်းကိုငယ်ပါသေးတယ်။သူတို့ကိုပြုစုစောင့်ရှောက်ဖို့ သူတို့ရဲ့မိခင် လိုအပ်နေပါတယ်။ အမြန်ဆုံးပြန်လွှတ်ပေးဖို့ တအာင်းတပ်ဖွဲ့ကို တောင်းဆိုပါတယ်။ ပါ၀င်ကူညီမှုပေးတဲ့နမ့်ခမ်းဒေသခံလူထုတရပ်လုံးကို ကျေးဇူးအထူးတင်ရှိပါတယ်။ ”– ဟုပြောသည်။

 မိသားစုအနေဖြင့်လည်း နန်းမိုဟွမ်ပြန်လည်လွှတ်မြောက်ရေးအတွက် စက်တင်ဘာလ ရ ရက်နေ့က နမ့်ခမ်းမြို့နယ်တွင် ဆန္ဒထုတ်ဖော်ခဲ့ပြီး ဖြစ်သည်။

 သြဂုတ်လ ၁၇ ရက်နေ့က နမ့်ခမ်းမြို့ ဟိုနောင်ရပ်ကွက်နေ နောင်မောဝ် အိမ်ဆောက်ပစ္စည်းရောင်းဝယ်ရေးအိမ် ဆိုင်မှ နန်းမိုဟွမ်သည်  ကလေးအားထမင်းခွံ့ကျွေးနေစဉ် တအာင်းတပ်ဖွဲ့ဝင် တပ်သား ၅ ဦးက သေနတ်တေ့ချိန်ကာ ကားပေါ်ဆွဲတင်ဖမ်းဆီးသွားခဲ့သည်။ ယမန်နှစ်က ၄င်းတို့ဆိုင်မှ ဆက်ကြေးကောက်ပြီးပြန်လာသည့် တအာင်းတပ်သား ၂ ဦးလမ်းတွင် အစိုးရတပ်မှ စောင့်ပစ်ခတ်ကာ ၁ ဦးသေ တဦးဖမ်းဆီးခံရမှုမှာ- နန်းမိုဟွမ်မှ အစိုးရတပ်ထံသတင်းပေးမှုကြောင့် ဟုစွပ်စွဲကာ ဖမ်းဆီးသွားခြင်းဖြစ်ကြောင်း ၊ တအာင်းတပ်ဖွဲ့မှ ထုတ်ပြန်သောကြေငြာချက်တွင်ဖော်ပြထားသည်။