သျှမ်းတိုင်းရင်းသားများဒီမိုကရက်တစ်ပါတီ (ကျားဖြူပါတီ) SNDP ဥက္ကဌ၊ သျှမ်းပြည်ညီညွတ်ရေးကော်မတီ CSSU အလှည့်ကျဥက္ကဌ စိုင်းအိုက်ပေါင်းက ဖမ်းဆီးထားတဲ့ နမ့်ခမ်းဒေသခံ နန်းမိုဟွမ်ကို အမြန်ဆုံးပြန်လွှတ် ပေးဖို့ တအာင်းပလောင်တပ်ဖွဲ့ TNLA ကိုတောင်းဆိုလိုက်ပါတယ်။
“နန်းမိုဟွမ်ကို အမြန်ဆုံးလွှတ်ပေးဖို့တောင်းဆိုတယ်။ အမျိုးသမီး တယောက်လည်းဖြစ်တယ်။ ကလေး ၃ ယောက်ရဲ့မိခင်လည်းဖြစ်တယ်။ အခုဖမ်းသွားတာတလ တောင်ကြာနေပြီ ။ တကယ်ဆို ဒီလောက်ထိ မဖြစ်သင့်ဘူး။ လက်နက်ကိုင်အဖွဲ့အတွက်လည်းမကောင်းဘူး။ ဒါကြောင့် နန်းမိုဟွမ်ကိုအမြန်ဆုံး လွှတ်ပေးဖို့အလေးအနက်တောင်း ဆိုချင်ပါတယ်။ သူ့ကျန်းမာရေးအခြေအနေကအစ စိုးရိမ်ရပါတယ်”- လို့ စိုင်းအိုက်ပေါင်းကပြောဆိုလိုက်ပါတယ်။
အသက် ၃၀ ကျော်အရွယ် နန်းမိုဟွမ်ဟာ ပြီးခဲ့တဲ့ သြဂုတ်လ ၁၇ ရက်နေ့မနက်ပိုင်းက တအာင်းတပ်ဖွဲ့ကနေလာဖမ်းသွားရာကနေ ကနေ့ဆိုရင် ရက် ၂၀ ကျော်ပြီဖြစ်ပါတယ်။
သျှမ်းပြည်ထဲက နိုင်ငံရေးပါတီ၊ လူမှုအခြေပြုအဖွဲ့အစည်းအသီးအသီးကအပြင် နိုင်ငံတော်အစိုးရ အမျိုးသားပြန်လည်ရင်ကြားစေ့ရေးနဲ့ ငြိမ်းချမ်းရေးဗဟိုဌာန ကလည်း နန်းမိုဟွမ်ကိုပြန်လွှတ်ပေးဖို့ ကြေငြာချက်တွေထုတ်ပြန်တောင်းဆိုခဲ့ပေမယ့် ကနေ့အထိ နန်းမိုဟွမ်ပြန်မလွှတ်မြောက်သေးပါဘူး။
“ရက်တွေကကြာလာပြီလေ။ ကျမညီမ ကျန်းမာရေးအခြေအနေ စိုးရိမ်ရပါတယ်။ ကျမညီမ အပြစ်မရှိပါဘူး။ အမြန်ဆုံးပြန်လွှတ်ပေးစေချင်ပါတယ်။ အမြန်ဆုံးပြန်လွှတ်ပေးဖို့တောင်းဆိုပါတယ်။ သူ့ခလေးတွေ စိတ်ပိုင်းဆိုင်ရာထိခိုက်မှာ စိုးရိမ်ရပါတယ်”- လို့ အမဖြစ်သူ နန်းမိုခမ်းက ပြောပါတယ်။
နန်းမိုဟွမ် ဟာ TNLA အကောက်ခွန်ဦးစီးဌာန မှ အကောက်ခွန်ဝန်ထမ်းများ လုပ်ငန်း တာဝန်ထမ်းဆောင်စဉ် ဝန်ထမ်းများ အားအပြင်းထန် ထိခိုက်သေဆုံးသည့်အထိ တာဝန်ဝတ္တရား နှောင့်ယှက်ခဲ့တဲ့အတွက် ထောင်ဒဏ် ၁၀ နှစ်အထိကျ နိုင်တဲ့ (နိုင်ငံတော်အစိုးရ အသုံးပြုတဲ့ ရာဇာသတ်ကြီး ပုဒ်မ ၃၃၃) အမှု နဲ့ TNLA တရားရုံးမှ နန်းမိုဟွမ်ကို အမှုဖွင့်အရေးယူထားတယ်လို့ စက်တင်ဘာ ၃ ရက်နေ့ ရက်စွဲနဲ့ TNLA မှ ထုတ်ပြန်ကြေညာခဲ့ပါတယ်။
TNLA ဟာ နန်းမိုဟွမ်မိသားစုရဲ့ အိမ်ဆိုင်ကို ၂၀၁၆ ခု က ကျပ်ငွေ ၃ သိန်း၊ ၂၀၁၇ ခု နှစ်က ကျပ်ငွေ ၁၁ သိန်း ၀င်ရောက်ကောက်ခံခဲ့ပါတယ်။ ၂၀၁၇ ခုက ပိုက်ဆံ ကောက်ပြီးအပြန် လမ်းခုလတ်မှာ အစိုးရတပ်မတော် က စောင့်ပစ်တဲ့အတွက်တယောက်သေဆုံးပြီး တယောက်ကိုဒဏ်ရာနဲ့ဖမ်းဆီးသွားပါတယ်။ အဲဒါကို နန်းမိုဟွမ်ကနေ သတင်းပေးလို့ဖြစ်တယ်လို့ TNLA က နန်းမိုဟွမ်ကို စွပ်စွဲပြီး လာရောက် ဖမ်းဆီးသွားတာဖြစ်တယ်လို့ ၄င်းတို့ရဲ့ကြေငြာချက်မှာပါရှိပါတယ်။
Leave a Comments