အစိုးရခွင့်မပြုလျှင် ပြသနာဖြစ်လာနိုင်သည့်အတွက် ကျင်းပမည့် CSSU အစည်းအဝေးများ ကျင်းပ တော့မည် မဟုတ်ဟု အလှည့်ကျ သဘာပတိ ကျားဖြူပါတီ ဥက္ကဌ ဦးစိုင်းအိုင်ပေါင်း က သျှမ်းသံတော်ဆင့်သို့ပြောသည်။
၂၀၁၈ စက်တင်ဘာလဆန်းပိုင်းအတွင်း ကျင်းပရန်ပြင်ဆင်ထားသည့် CSSU အစည်းအဝေးအား အစိုးရက ကျင်းပခွင့်မပေးသည့်အတွက် မကျင်းပခဲ့ကြောင်း၊ အစိုးရခွင့်မပြုလျှင် နောက်နောင်တွင်လည်း အစည်းအဝေးကျင်းပတော့မည်ဟုတ်ကြောင်း စိုင်းအိုက်ပေါင်းက ပြောသည်။
ကျနော်တို့ အစည်းအဝေးလုပ်မယ်ဆိုရင်တော့ သူတို့ဆီကိုအကြောင်းကြားမှာပါ။ သူတို့ကအစိုးရကိုး။ ကျနော်တို့က ခွင့်ပြုချက်မတောင်းရင်အရင်တုန်းကကြုံခဲ့ဖူးတာကိုး။ အကြိမ်ကြိမ်တားမြစ်ခံရတယ်လေ။ ကျနော်တို့အတွက်လည်းမကောင်းဘူး။ သူတို့အတွက်လဲမကောင်းဘူး။ ဒါ့ကြောင့် ခွင့်ပြုချက်မရရင်တော့ မလုပ်တော့ဘူး – စိုင်းအိုက်ပေါင်းက သျှမ်းသံတော်ဆင့်သို့ပြောသည်။
လမ်းပမ်းဆက်သွယ်ရေးခက်ခဲ့သည့်အတွက် လွယ်တိုင်းလျဲန်းတွင်လည်း သွားရောက်ကျင်းပမည် မဟုတ်ကြောင်း၊ CSSU တွင် တနိုင်ငံလုံးအပစ်အခတ်ရပ်စဲစာချုပ် လက်မှတ်ရေးထိုးခြင်း မရှိသေးသည့်အဖွဲ့ပါ၀င်နေသည့်အတွက် မည်သို့ပင်ဆိုစေ အစိုးရထံခွင့်ပြုချက်တောင်းရမည်ဖြစ်ကြောင်း၊ အစိုးရခွင့်မပြုရင်ကျင်းပမည်မဟုတ်တော့ ကြောင်းလည်းစိုင်းအိုက်ပေါင်းကပြောသည်။
သျှမ်းပြည်ညီညွတ်ရေးကော်မတီ CSSU သည် စက်တင်ဘာ ၃ – ၄ ရက်နေ့အထိ သျှမ်းပြည်မြို့တော် တောင်ကြီးတွင် အစည်းအဝေး ကျင်းပရန်စီစဉ်ထားသော်လည်း အစိုးရ က ခွင့်မပြုသောကြောင့် ဟော်တယ်၊ အစည်းအဝေးခန်ပြင်ဆင်ထားမှုအားလုံး ဖျက်သိမ်းလိုက်ရသည်။ လူထုရွေးကောက်တင်မြှောက်ထားသည့် NLD အစိုးရ လက်ထက်တွင် သျှမ်းအမျိုးသားတို့၏ အမြင့်ဆုံးအစည်းအဝေးဖြစ်သည့် CSSU အစည်းအဝေးအား ရန်ကုန်တွင်တကြိမ်၊ ထိုင်းနိုင်ငံချင်းမိုင်မြို့တွင်တကြိမ် အစိုးရမှ ပိတ်ပင်တားမြစ်ခဲ့သည်။ ၂၁ ရာစု ပင်လုံညီလာခံကြီးအတွက် လူထု ဆနကောက်ယူရာတွင်လည်း အစိုးရတပ်မတော်မှ အင်အားသုံးကာ ဟန့်တားခဲ့ပါသေးသည်။
