သျှမ်းပြည်ညီညွတ်ရေးကော်မတီ (CSSU) သည် လုပ်ငန်းအကောင်အထည်ဖော်ဆောင်ရာမှာ ထိုက်သင့်သလောက် တိုးတက်မှုမရရှိခဲ့သဖြင့် RCSS အနေဖြင့် ခေတ္တဆိုင်းငံမည်ဖြစ်ကြောင်း ယနေ့ (ဖေဖော်ဝါရီ ၂၆)ရက်စွဲဖြင့် ထုတ်ပြန်ချက်တစ်စောင် ထုတ်ခဲ့သည်။

သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော်သည် (RCSS/SSA) သည် CSSU ကို ဦးဆောင်ဖွဲ့စည်းခဲ့သည့် အဖွဲ့တစ်ဖွဲ့ဖြစ်သည်။

CSSU ၏ ရည်မှန်းချက်ဖြစ်သည့် သျှမ်းတိုင်းရင်းသားများအကြား ညီညွတ်ရေးမှသည် သျှမ်းပြည် တိုင်းရင်းသားများအားလုံးညီညွတ်ရေးသို့ ဦးတည်ရန်အတွက် တိုးတက်မှုမရှိသလောက်နည်းပါးသည့် အပြင် သျှမ်းပြည်အတွက် ရှင်းလင်းတိကျသည့် နိုင်ငံရေး ရည်မှန်းချက်များ မချမှတ်နိုင်ခဲ့ကြောင်း ထုတ်ပြန်ချက်တွင် ရေးသားထားသည်။

ထို့အပြင် ပါတီ နှစ်ပါတီအကြား ညှိနှိုင်းဆောင်ရွက်မှုများမလုပ်ဆောင်နိုင်ခဲ့ခြင်း၊ သျှမ်းတပ် (၂)တပ်ကြား ထိတွေ့မှုများကို CSSU မှ မဖြေရှင်းပေးနိုင်ခြင်း စသည့်အချက်များကိုပါ RCSSထုတ်ပြန်ချက်တွင် ဖော်ပြထားသည်။

ရည်မှန်းချက်များအတိုင်း အဖွဲ့ဝင်များအကြား ပူးပေါင်းလက်တွဲပြီး ရှေ့ခရီးကို အတူတကွ ချီတက်ရန် ခက်ခဲခြင်း၊ လက်ရှိပြဿနာများ ဖြေရှင်းနိုင်ရန် ၊ ကော်မတီ၏ စည်းမျဉ်းစည်းကမ်းနှင့် လုပ်ထုံးလုပ်နည်းများ ပြန်လည်သုံးသပ်ပြင်ဆင်ရန် လိုအပ်ခြင်းတို့ကြောင့် RCSSမှ CSSU ၏ လုပ်ငန်းစဉ်များ ခေတ္တဆိုင်းငံ့ထားသင့်ကြောင်း ထုတ်ပြန်ချက် ကြေညာထားသည်။

CSSU သည် နိုင်ငံရေး ပြဿနာကို နိုင်ငံရေးနည်းလမ်းဖြင့် ပူးပေါင်းဖြေရှင်းနိုင်ရေး၊ သျှမ်းပြည်တိုင်းရင်းသားပေါင်းစုံ စည်းလုံးညီညွှတ်ရေး၊ ငြိမ်းချမ်းစွာ အေးအတူပူအမျှ အတူယှဉ်တွဲနေထိုင်ရေးတို့ကို ဦးတည်ပြီး နိုင်ငံရေးပါတီများ၊ လက်နက်ကိုင်တော်လှန်ရေးအဖွဲ့အစည်းများ အရပ်ဖက်လူမှုအဖွဲ့အစည်းများဖြင့် (၂၀၁၃) ခုနှစ် အောက်တိုဘာ (၁၇) ရက်မှာ ဖွဲ့စည်းခဲ့သည်။