သျှမ်းပြည်မြောက်ပိုင်း နမ့်ခမ်းမြို့နယ်တွင် ရက် ၂၀ ကျော်ကြာ TNLA တအာင်းတပ်ဖွဲ့ မှ ဖမ်းဆီးထားသော နမ့်ခမ်းမြို့သူ နန်းမိုဟွမ်အား ပြန်လွှတ်ပေးရန် မိသားစုဝင်များက ယနေ့မနက်ပိုင်းက နမ့်ခမ်းမြို့လယ်ခေါင် ပန်ပွဲကွင်းတွင် ဆန္ဒထုတ်ဖော်ခဲ့ကြသည်။

စက်တင်ဘာလ ရ ရက်နေ့ မနက်ပိုင်း နံနက် ၉ နာရီမှ ၁၁ နာရီအထိ နန်းမိုဟွမ်၏ မိသားစုဝင်များက ဆိုင်းဘုတ်များကိုင်ဆောင်ကာ ငြိမ်းချမ်းစွာ ဆန္ဒထုတ်ဖော်ခဲ့ကြခြင်းဖြစ်ပါသည်။

“ကျမတို့ညီမ နန်းမိုဟွမ် ဘာအပြစ်မှမရှိဘူး။ ဘယ်နိုင်ငံရေးနဲ့မှမပတ်သက်ဘူး။ ဘယ်လက်နက်ကိုင်အဖွဲ့အစည်းနဲ့မှလည်း မပတ်သက်ဘူး။ ဖမ်းသွားတာ ရက် ၂၀ ကျော်ပြီ။ ပြန်မလွှတ်ပေးသေးဘူး။ ကြာပြီဆိုတော့သူ့ကျန်းမာရေးကို စိုးရိမ်ရပါတယ်။ သူ့သားသမီးတွေလည်း ငယ်နေသေးတော့ စိတ်ဒဏ်ရာရမှာကိုစိုးရိမ်မိပါတယ်။ ကျမတို့တမိသားစုလုံးက စိတ်မကောင်းဖြစ်ရပါတယ်။ အမြန်ဆုံးပြန်လွှတ်ပေးစေချင်ပါတယ်။ အခုက မိသားစုဝင်တွေကိုတွေ့ခွင့်လည်းမပေးဘူး။ ”- ဟု နန်းမိုဟွမ်၏ အမ ဖြစ်သူ နန်းမိုခမ်းက ပြောသည်။

အဆိုပါ ဆန္ဒထုတ်ဖော်ပွဲတွင် နန်းမိုဟွမ်၏ မိသားစုဝင်များအား နမ့်ခမ်းဒေသခံ တထောင်ကျော်က ၀န်းရံအားပေးကြပြီး နမ့်ခမ်းမြို့လူငယ်အဖွဲ့၊ သွေးစည်းညီညွတ်ရေး UP ၊ နိုင်ငံရေးပါတီ၊ ပြည်သူ့ရဲ တပ်ဖွဲ့ တို့က လုံခြုံရေးယူပေးခဲ့သည်။

“သမီးမေမေကိုအမြန်ဆုံးပြန်လွှတ်ပေးပါ ”- ဟု ၉ နှစ်အရွယ်ရှိ သမီးဖြစ်သူက ပြောသည်။

မိသားစုဝင်များသည် – အပြစ်မဲ့သော နန်းမိုဟွမ် အမြန်လွှတ်မြောက်လာနိုင်ရေးအတွက် သက်ဆိုင်ရာတာဝန်ရှိသော အစိုးရအဖွဲ့အစည်းများမှ ထိရောက်စွာကူညီဆောင်ရွက်ပေးရန်၊ PSLF/TNLA မှဖမ်းဆီးထားသော အပြစ်မဲ့ နန်းမိုဟွမ်အား အမြန်ဆုံးပြန်လွှတ်ပေးရန် ၊ သားနှင့်သမီးတို့၏ အပြစ်မဲ့မေမေကို အမြန်ဆုံးလွှတ်ပေးရန် – အစရှိ ဗီနိုင်း ဆိုင်းဘုတ်များ ကိုင်ဆောင်ကာ ဆန္ဒထုတ်ဖော်ခဲ့ကြသည်။

“နန်းမိုဟွမ်ကို အမြန်ဆုံးပြန်လွှတ်ပေးဖို့ တအာင်းတပ်ဖွဲ့ကို ကျနော်တို့ နမ့်ခမ်းလူငယ်ထုကလည်း တောင်းဆိုချင်ပါတယ်။ သူ့မှာလည်း လူမမယ်အရွယ် ကလေးလေး ၃ ယောက်ရှိနေတယ်။ သူဟာ သာမာန်ပြည်သူတယောက်ဘဲဖြစ်တာမို့ အပြစ်မရှိပါဘူး။ ဆန္ဒထုတ်ဖော်ပွဲမှာပါ၀င်တဲ့ နန်းမိုဟွမ်ရဲ့ တဝမ်းကွဲအစ်မ နန်းကြာအေး မူးလဲတယ်။ စိုးရိမ်ရတဲ့အခြေအနေတော့မရှိပါဘူး။ စိတ်ထိခိုက်တာရယ်၊ နေပူတာရယ် ကြောင့်ပါ ”- ဟု နမ့်ခမ်းမြို့ လူငယ်အဖွဲ့ဝင် အသက် ၃၀ အရွယ် လူငယ်တဦးကလည်းပြောသည်။

သျှမ်းတိုင်းရင်းသားများဒီမိုကရေစီအဖွဲ့ချုပ် ပြောရေးဆိုခွင့်ရှိသူ စိုင်းလိတ်က – တကယ်တော့ ရာဇသတ်ကြီးပုဒ်မ ၃၃၃ ဆိုတာဟာ နိုင်ငံတော်ဝန်ထမ်းကိုထိခိုက်အောင်လုပ်တဲ့သူတွေကိုသာအရေးယူရမယ့် ဥပဒေပုဒ်မဖြစ်တယ်။ NCA လက်မှတ်မထိုးရသေးတဲ့ TNLA လိုမျိုး ဥပဒေပြင်ပအဖွဲ့အစည်းက သုံးခွင့်မရှိပါဘူး။ TNLA ကြေငြာချက်မှာပါတဲ့အတိုင်း တအာင်းတပ်သားတွေကိုသေဆုံးအောင်လုပ်တာဟာအစိုးရရဲ့ တပ်မတော်သာ ဖြစ်တယ်။ ဒါကြောင့်နန်းမိုဟွမ် ကိစ္စမှာ အရေးယူမယ်ဆိုရင် ပြသနာဖြစ်လာတဲ့ဇစ်မြစ်ကိုသေချာပြန်သုံးသပ်ပါ။ သစ်တပင်ကိုသာမကြည့်ဘဲ တတောလုံးကိုတွေ့အောင်ပြန်ကြည့်စေချင်ပါတယ်။ လူမျိုးရေးပြသနာဖြစ်လာ မှာစိုးရပါတယ်- ဟု ပြောသည်။

သြဂုတ်လ ၁၇ ရက်နေ့က နမ့်ခမ်းမြို့ ဟိုနောင်ရပ်ကွက်နေ နောင်မောဝ် အိမ်ဆောက်ပစ္စည်းရောင်းဝယ်ရေးအိမ် ဆိုင်မှ နန်းမိုဟွမ်အား ကလေးထမင်းခွံ့ကျွေးနေစဉ် တအာင်းတပ်ဖွဲ့ဝင် တပ်သား ၅ ဦးက သေနတ်တေ့ချိန်ကာ ကားပေါ်ဆွဲတင်ဖမ်းဆီးသွားခဲ့သည်။ ယမန်နှစ်က ၄င်းတို့ဆိုင်မှ ဆက်ကြေးကောက်ပြီးပြန်လာသည့် တအာင်းတပ်သား ၂ ဦးလမ်းတွင် အစိုးရတပ်မှ စောင့်ပစ်ခတ်ကာ ၁ ဦးသေ တဦးဖမ်းဆီးခံရမှုမှာ- နန်းမိုဟွမ်မှ အစိုးရတပ်ထံသတင်းပေးမှုကြောင့် ဟုစွပ်စွဲကာ ဖမ်းဆီးသွားခြင်းဖြစ်ကြောင်း ၊ တအာင်းတပ်ဖွဲ့မှ ထုတ်ပြန်သောကြေငြာချက်တွင်ဖော်ပြထားသည်။

နန်းမိုဟွမ်ပြန်လည်လွတ်မြောက်ရေးအတွက် ကူညီဆောင်ရွက်ပေးရန် မိသားစုဝင်များအပြင် နမ့်ခမ်းမြို့နေ အဖွဲ့အစည်းအသီးသီးက နိုင်ငံတော်အစိုးရထံ၊ အစိုးရတပ်မတော်ကာကွယ်ရေးဦးစီးချုပ်၊ တအာင်းသံဃာတော်များထံ ၊သက်ဆိုင်ရာအဖွဲ့အစည်းများထံ စာရေးသားပေးပို့ခဲ့သည်။ ရက် ၂၀ ကျော်တိုင် ပြန်မလွတ်မြောက်သေးသဖြင့် မိသားစုဝင်များက ဆန္ဒထုတ်ဖော်တောင်းဆိုရခြင်းဖြစ်ကြောင်းသိရပါသည်။