NCA လက်မှတ်ရေးထိုးထားသည့် အပစ်ရပ်တိုင်းရင်းသားလက်နက်ကိုင်တပ်ဖွဲ့ EAOs ၏ ၂၄ ကြိမ်မြောက်အစည်းအဝေးကို စက်တင်ဘာလ ၆ ရက်နေ့က ထိုင်းနိုင်ငံမြောက်ပိုင်းချင်းမိုင်မြို့တွင် တွေ့ဆုံဆွေးနွေးကြသည်ဟုတွေ့ရသည်။

၂၁ ရာစုပင်လုံညီလာခံတတိယအကြိမ်အစည်းအဝေးပြီးနောက်ပိုင်း လုပ်ငန်းစဉ်များပြန်လည်ဆွေးနွေး သုံးသပ်ခြင်းများပြုလုပ်ခဲ့ခြင်းဖြစ်ကြောင်းသိရသည်။ ထိုင်းနိုင်ငံချင်းမိုင်မြို့ ခုမ့်ဖူးခမ်းဟိုတယ် တွင်ပြုလုပ်ခဲ့ခြင်းဖြစ်သည်။

ကရင် KNU အမျိုးသားအစည်းအရုံး ဥက္ကဌ ဗိုလ်ချုပ်ကြီးစောမူတူးဆေးဖိုးက – “ပြောချင်တာက ဒီနေ့ ကျနော်တို့  NCA လက်မှတ်ထိုးတဲ့အဖွဲ့တွေက ယူဆချက်တွေဟာ ကွာဟနေတဲ့ အခြေအနေ တချို့ရှိနေတဲ့အပေါ် ဒီကွာဟမှုတွေကို ကျနော်တို့ တိုင်တိုင်ပင်ပင် ညှိနှိုင်းသွားကြဖို့ လိုပါတယ်။ အနာဂတ်ဖယ်ဒရယ် ပြည်ထောင်စု တည်ဆောက်ဖို့အတွက် ရည်မှန်းချက်ဆိုတာ ကျနော်တို့အားလုုံးရဲ့ ဘုံရည်မှန်းချက် ဘုံစံနှုန်းတွေကို ရအောင် ညှိနှိုင်းသွားကြရမှာ။ “– ဟု အစည်းအဝေးအဖွင့်မိန့်ခွန်းတွင်ပြောကြားသည်။

စက်တင်ဘာလ ၆ ရက်နှင့် ရ ရက်နေ့တို့တွင် ၂ ရက်ကြာကျင်းပသည့် အစည်းအဝေးတွင် ပြည်ထောင်စု ငြိမ်းချမ်းရေး ညီလာခံ ၂၁ ရာစု ပင်လုံ တတိယ အကြိမ် အစည်းအဝေး၏ ဆွေးနွေးမှုမှ ရရှိလာသည့် အချက်များအား ပြန်လည်တင်ပြသုံးသပ်၍ လုပ်ငန်းအဖွဲ့အလိုက် ဆောင်ရွက်မှုများ၊ JMC ဆိုင်ရာ ကိစ္စများကို ဆွေးနွေး သုံးသပ်သည့်အပြင် EAOs ညီလာခံ ကြီးလည်းဆက်လက်ကျင်းပသွားမည့်အကြောင်း သဘောတူကြသည်ဟုသိရသည်။

အဆိုပါအစည်းအဝေးသို့ ကရင်မျိုးသား အစည်းအရုံး KNU ဥက္ကဌ ဗိုလ်ချုပ်ကြီး မူတူးစေးဖိုး၊ သျှမ်းပြည်ပြန် လည် ထူထောင်ရေးကောင်စီ RCSS/SSA ဥက္ကဌ ဗိုလ်ချုပ်ကြီး ယွက်ဆစ်၊ ချင်းအမျိုးသားတပ်ဦး CNF ဥက္ကဌ ပူးဇင်ကျံုး၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး ABSDF ဥက္ကဌ ရဲဘော် သံခဲ၊ ပအိုဝ်း အမျိုးသား လွတ်မြောက်ရေး အဖွဲ့ချုပ် PNLO ဒုဥက္ကဌ ခွန်မြင့်ထွန်း၊ ရခိုင်ပြည်လွတ်မြောက်ရေးပါတီ ALP ဒုဥက္ကဌ ၁ ဦးခိုင်စိုးနိုင်အောင်၊ ဒီမိုကရေစီ အကျိုးပြု တပ်မတော် DKBA စစ်ဦးစီးချုပ် ဗိုလ်ချုပ်ကြီး စောမူချေး၊ ကရင် ငြိမ်းချမ်းရေးကောင်စီ KNLA/PC အထွေထွေအတွင်းရေးမှူး ဒေါက်တာ နော်ကပေါ်ထူး၊ လားဟူဒီမိုကရက်တစ်အစည်းအရုံး LDU ဒုဥက္ကဌ ကြာဟား တို့ အပါအဝင် ခေါင်းဆောင်ကိုယ်စားလှယ် ၃၀ နီးပါး တက်ရောက်ခဲ့ကြောင်းသိရပါသည်။