စစ်ကော်မရှင်တပ်သည် နေပြည်တော်တွင် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် NCA (၁၀)နှစ်ပြည့် နှစ်ပတ်လည်အခမ်းအနား ကျင်းပနေချိန် TNLA ထိန်းချုပ်ထားသည့် သီပေါမြို့နယ်အတွင်း လေကြောင်းဗုံးကြဲတိုက်ခိုက်မှု ဆက်တိုက် ပြုလုပ်နေကြောင်း သတင်းရရှိသည်။

တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် တရုတ်-မြန်မာ ကုန်သွယ်ရေးလမ်းကြောင်းအတွက် အရေးပါသော သီပေါမြို့ကို စစ်ကော်မရှင်တပ်က ပြန်လည်ထိန်းချုပ်နိုင်ရန် အောက်တိုဘာလဆန်းပိုင်းတွင် ကျောက်မဲမြို့ဘက်မှ အပြင်းအထန် ထိုးစစ်ဆင်ခဲ့ရာ ယနေ့ (အောက်တိုဘာ ၁၅ ရက်) တွင် သီပေါမြို့နှင့် အနီးပတ်ဝန်းကျင် မန်ဟဲကျေးရွာအုပ်စုထဲသို့ လေကြောင်းတိုက်ခိုက်မှု ဆက်တိုက် ပြုလုပ်နေကြောင်း ဒေသခံများက ပြောသည်။

“အခု ရွာတွေမှာက စစ်တပ်တွေ အကုန်ရောက်နေပြီ၊ ပလောင်စစ်သားတွေ မရှိတော့ဘူး။ ခုနကတော့ ဂေါ်ဒန်နဲ့ နမ့်ဟူးနွဲ့ရွာထဲက ပါရမီတံတားတွေဘက်မှာ လိုက်ပစ်နေကြတာ။ ဂေါ်ဒန်သတ္တုတွင်းနားနဲ့ တွန်ခေါ့ရွာတွေမှာတော့ မီးလောင်နေတယ်” ဟု သီပေါမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အလားတူ ယမန်နေ့ (အောက်တိုဘာ ၁၄ ရက်) ညနေပိုင်းတွင်လည်း သီပေါမြို့ အနီးတဝိုက်ကို စစ်ကော်မရှင်တပ်က လေကြောင်းဖြင့် အဆက်မပြတ် ဗုံးကြဲခဲ့ပြီး အရပ်သားနေအိမ်နှင့် သီလရှင်ကျောင်းဆောင်များလည်း ပျက်စီးခဲ့ကြောင်း ဒေသခံများပြောပြချက်အရသိရသည်။

စစ်ကော်မရှင်တပ်သည် အောက်တိုဘာ ၁၃ ရက်တွင် သီပေါမြို့နှင့် ၆ မိုင်ခန့် ကွာဝေးသည့် ဘော်ကြိုကျေးရွာကို စတင်ဝင်ရောက်လာခဲ့ကြောင်း သိရပြီး သမိုင်းဝင် ဘော်ကြိုဘုရားအနီး တိုက်ပွဲဖော်ဆောင်ခြင်း မပြုလုပ်ရန် ဒေသခံများက နှစ်ဖက်တပ်ဖွဲ့ထံ မေတ္တာရပ်ခံကြောင်း ပိတ်စပေါ်တွင် စာရေးသားချိတ်ဆွဲကာ တောင်းဆိုခဲ့ရကြောင်း သိရသည်။

လက်ရှိတွင်လည်း စစ်ကော်မရှင်တပ်က သီပေါမြို့တွင်းသို့ ဝင်ရောက်နိုင်ရန် ပြည်ထောင်စုလမ်းမကြီးဘေးရှိ တွန်ခေါ့ကျေးရွာ၊ နားခဲကျေးရွာ၊ နမ့်ဟူးနွဲကျေးရွာဘက်တွင် TNLA တပ်ဖွဲ့နှင့် မြေပြင်တိုက်ပွဲ အပြင်းအထန် ဖြစ်ပွားနေကြောင်း သီပေါမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“အခုတော့ ကျေးရွာတွေမှာ TNLA က ခံစစ်အနေနဲ့ ဆက်တိုက်နေတဲ့ သဘော။ အဲ့ဘက် ကျေးရွာတွေကနေ TNLA တပ်ဆုတ်သွားပြီဆိုရင်တော့ သီပေါကို စစ်တပ်က အေးဆေးပြန်သိမ်းနိုင်မယ့် အခြေအနေ ရောက်သွားနိုင်တယ်” ဟု သီပေါဒေသခံ ၎င်းအမျိုးသားက ဆက်ပြောသည်။

ယမန်နေ့ (အောက်တိုဘာ ၁၄ ရက်)တွင် စစ်ကော်မရှင်တပ်သည် သီပေါမြို့နှင့် ၃ မိုင်ခန့် အကွာအဝေးတွင် တည်ရှိသည့် ကျေးရွာ ၅ ရွာခန့်ထဲသို့ လေကြောင်းနှင့် ဆက်တိုက်ဗုံးကြဲခဲ့ပြီး ယနေ့ (အောက်တိုဘာ ၁၅ ရက်) တွင် မြေပြင်ထိုးစစ်ဆင်မှုများ ရှေ့တိုးလာခြင်းဖြစ်ကြောင်း ၎င်းအမျိုးသားက ပြောဆိုသည်။

ထိုသို့ လေကြောင်းဗုံးကြဲ တိုက်ခိုက်ခံရမှုကြောင့် သီပေါမြို့နယ် နမ့်ဟူးနွဲ့ကျေးရွာအတွင်း နေအိမ်နှင့် ဘုန်းကြီးကျောင်း ဇရပ်ဆောင်များ ထိခိုက်ပျက်စီးသွားပြီး လူထိခိုက်မှု မရှိကြောင်း ဒေသခံများ ပြောပြချက်အရ သိရသည်။

လက်ရှိ သီပေါမြို့အတွင်း TNLA တပ်သားများ သွားလာလှုပ်ရှားမှု မရှိတော့ဘဲ သီပေါမြို့ အနီးပတ်ဝန်းကျင် ကျေးရွာများတွင် စစ်ကော်မရှင်တပ်နှင့် တိုက်ပွဲပြင်းထန်နေကြောင်း သိရသည်။

ထို့ပြင် TNLA တပ်သားများသည် သီပေါမြို့မှ ထွက်ခွာသွားချိန်တွင်လည်း မြို့တွင်း စာသင်ကျောင်းရှိ စာရေးခုံများ၊ မီးသတ်ကားများနှင့် ရေတိုင်ကီများကို ယူဆောင်သွားကြောင်း မျက်မြင်တွေ့ရှိခဲ့သည့် သီပေါမြို့ ဒေသခံ အမျိုးသမီးတစ်ဦးက ပြောသည်။

“မြို့ထဲက အမက (၁) မူလွန် စာသင်ကျောင်းထဲက ခုံတွေကို သယ်ယူသွားကြတယ်။ မီးသတ်ကားတွေအစ မရှိတော့ဘူး၊ မီးမလောင်ပါစေနဲ့လို့ပဲ ဆုတောင်းရမယ်။ ပြီးတော့ ရေတိုင်ကီတွေ၊ ဆောက်လုပ်ရေးကားတွေကို တစ်စစီ ဖြုတ်ယူသွားကြတာ၊ မြင်လို့ကို မကောင်းဘူး” ဟု မျက်မြင်တွေ့ခဲ့သည့် အဆိုပါအမျိုးသမီးက သျှမ်းသံတော်ဆင့်ကို ပြောသည်။

ပြီးခဲ့သည့် ဩဂုတ်လ ၂၇ ရက်၌ စစ်ကော်မရှင်နှင့် TNLA တို့ တရုတ်နိုင်ငံ ကူမင်းမြို့ တွေ့ဆုံဆွေးနွေးပွဲတွင် TNLA ဘက်က ၎င်းတို့ထိန်းချုပ်ထားနိုင်သည့် ကျောက်မဲနှင့် သီပေါမြို့တို့ကို စစ်ကော်မရှင်ထံ ပြန်လွှဲအပ်ပေးမည်ဟု ကမ်းလှမ်းပြောဆိုခဲ့သော်လည်း စစ်ကော်မရှင်ဘက်က ပြန်လည်တိုက်ယူမည်ဟု သတင်းထွက်ပေါ်ခဲ့သည်။

ယခု အောက်တိုဘာလ ၁ ရက်တွင် စစ်ကော်မရှင်တပ်က ကျောက်မဲမြို့ကို ပြန်လည်ထိန်းချုပ်နိုင်ခဲ့ပြီး TNLA ထိန်းချုပ်ထားသည့် သီပေါမြို့ကို ပြန်သိမ်းပိုက်နိုင်ရန်အတွက် မြေပြင် ထိုးစစ်ဆင်လာသည့်အပြင် နမ္မတူ၊ နမ့်ဆန်နှင့် မန်တုံမြို့နယ်များပါ လေကြောင်းဗုံးကြဲ တိုက်ခိုက်နေသည်။

စစ်ကော်မရှင်သည် လာမည့် ဒီဇင်ဘာလ ၂၈ ရက်တွင် စတင်ကျင်းပမည့် ရွေးကောက်ပွဲအတွက် ၎င်းဆုံးရှုံးလိုက်ရသည့် နယ်မြေများကို ပြန်လည်ရရှိရန် အပြင်းအထန် ထိုးစစ်ဆင် တိုက်ခိုက်နေခြင်းဖြစ်ပြီး အခြားတဘက်မှာလည်း “ငြိမ်းချမ်းရေး”ဟု ပြောဆိုကာ ၎င်းဆုံးရှုံးလိုက်သည့် နယ်မြေများကို လေကြောင်းဗုံးကြဲ တိုက်ခိုက်နေသည်။