တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ် (NCA) ကို ရည်မှန်းထားသည့်အတိုင်း မဆောင်ရွက်နိုင်ခဲ့ခြင်းသည် နှစ်ဦးနှစ်ဖက်အကြား ယုံကြည်မှုမတည်ဆောက်နိုင်ခြင်းကြောင့် RCSS က ပြောဆိုလိုက်သည်။

၂၀၁၅ ခုနှစ် အောက်တိုဘာလ ၁၅ ရက်နေ့က ဦးသိန်းစိန် ဦးဆောင်သည့် အရပ်သားတစ်ပိုင်း အစိုးရနှင့် တိုင်းရင်းသား လက်နက်ကိုင် အဖွဲ့အစည်းများအကြား လက်မှတ်ရေးထိုးခဲ့သည့် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် NCA သည် ယမန်နေ့တွင် (၁၀) နှစ်ပြည်ခဲ့ပြီး ဖြစ်သည်။

လွန်ခဲ့သည့် ၁၀ နှစ်တာကာလအတွင်း NCA အကောင်အထည်ဖော်ခြင်းကို ရည်မှန်းထားသည့်အတိုင်း မဆောင်ရွက်နိုင်ခဲ့ခြင်းသည် နှစ်ဦးနှစ်ဖက်အကြား ယုံကြည်မှုမတည်ဆောက်နိုင်ခြင်းကြောင့် ဖြစ်သည်ဟု သျှမ်းပြည်ပြန်လည်ထူထောင်ရေးကောင်စီ (RCSS) က ယနေ့ အောက်တိုဘာလ ၁၆ ရက်နေ့တွင် သတင်းထုတ်ပြန်သည်။

ထို့ပြင် နှစ်ဦးနှစ်ဖက်လက်မှတ်ရေးထိုးထားသည့် သဘောစာချုပ်အတိုင်း အကောင်အထည် မဖော်နိုင်ခြင်း၊ ၂၀၀၈ ဖွဲ့စည်းပုံအခြေခံ ဥပဒေအောက်ရောက်ရှိရေးအတွက် အစိုးရက EAOs များအား ဖိအားပေး၍ လုပ်ဆောင်စေခြင်း၊ တိုင်းပြည်ပြုပြင်ပြောင်လဲရေးအတွက် အစိုးရအနေဖြင့် စိတ်အားထက်သန်မှုနည်းပါးခြင်း နှင့် စစ်ကော်မရှင်တပ်က တိုင်းပြည်အာဏာအား ထိန်းချုပ်လိုက်သည့်အတွက် ငြိမ်းချမ်းရေး လုပ်ငန်းစဉ်ကို ရပ်တန့်သွားစေခဲ့ခြင်းဖြစ်ကြောင်း RCSS က ဆိုထားသည်။

ထို့ကြောင့် အနာဂတ် ငြိမ်းချမ်းရေးလုပ်ငန်းစဉ် အောင်မြင်ရေးအတွက် စစ်ကော်မရှင်တပ်အနေဖြင့် EAOs များနှင့် ယုံကြည်မှုတည်ဆောက်ရန် လိုအပ်ကြောင်း ဆိုသည်။

သို့သော် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) သည် ပြန်သုံး၍ မရတော့ဘဲ ပျက်စီးသွားပြီဖြစ်ကြောင်း မြန်မာ့ငြိမ်းချမ်းရေးလုပ်ငန်းစဉ်တွင် ဦးဆောင်ကူညီပံ့ပိုးပေးခဲ့သူ စဝ်ဟန်ဟောင်ဟွေက သျှမ်းသံတော်ဆင့်နှင့် သီးသန့်တွေ့ဆုံမေးမြန်းခန်းတွင် ပြောဆိုခဲ့ဖူးသည်။

NCA ၏ အဓိကရည်ရွယ်ချက်မှာ စစ်ပွဲရပ်ဖို့မဟုတ်ဘဲ အပစ်ရပ်ပြီးလျှင် နိုင်ငံရေးစကားဝိုင်းတွင် တွေ့ဆုံဆွေးနွေးရမည်၊ နိုင်ငံရေးနည်းလမ်းဖြင့် ဖြေရှင်းရမည် ဖြစ်ကြောင်း ၎င်းက ပြောသည်။

စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ၎င်းတပ်နှင့် လက်မတွဲလိုသူများရှိသော်လည်း တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးသဘောတူစာချုပ် (NCA) ပါ အချက်များအား လာမည့်လွှတ်တော်တွင် ဆက်လက်လုပ်ဆောင်သွားမည်ဖြစ်ကြောင်း အောက်တိုဘာလ ၁၅ ရက်နေ့က ကျင်းပသည့် NCA (၁၀) နှစ်ပြည့် အခမ်းအနားတွင် ပြောကြားခဲ့သည်။

NCA တွင် ၎င်းကိုယ်တိုင် လက်မှတ်ရေးထိုထားသည့်အတွက် ကတိဖျက်မည်မဟုတ်ကြောင်းနှင့် သဘောတူညီချက်များ အကောင်အထည်ဖော်ရန် နောက်ကျနေပြီဖြစ်ကြောင်းလည်း ၎င်းက ပြောသည်။

တိုင်းရင်းသားများအနေဖြင့် လိုလားချက်များအား လက်နက်ကိုင်တောင်းဆိုခြင်းထက် နိုင်ငံရေးစင်မြင့် ဖြစ်သော လွှတ်တော်တွင်သာ တောင်းဆိုသင့်ကြောင်းလည်း စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က ပြောသည်။

သို့သော် စစ်အာဏာသိမ်းမှုသည် NCA စာချုပ်၏ အနှစ်သာရ၊ အခြေခံမူနှင့် ရည်မှန်းချက်များအား ပြောင်ပြောင်တင်းတင်း ဖျက်ဆီးလိုက်ပြီဖြစ်ပြီး NCA အကောင်အထည်ဖော်မှု လုပ်ငန်းစဉ်လည်း ရပ်ဆိုင်းသွားကာ စက္ကူစုတ်တစ်ခုအဖြစ် ရောက်ရှိသွားပြီဖြစ်ကြောင်း တိုင်းရင်းသားလက်နက်ကိုင် ၆ ဖွဲ့က အောက်တိုဘာလ ၁၃ ရက်တွင် ပူးတွဲကြေညာချက် ထုတ်ပြန်ခဲ့သည်။

ထိုတိုင်းရင်းသားလက်နက်ကိုင် ၆ ဖွဲ့တွင် ကရင်အမျိုးသားအစည်းအရုံး (KNU)၊ ချင်းအမျိုးသားတပ်ဦး (CNF)၊ ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO)၊ မြန်မာနိုင်ငံလုံးဆိုင်ရာ ကျောင်းသားများဒီမိုကရက်တစ်တပ်ဦး (ABSDF)၊ မွန်ပြည်သစ်ပါတီ (NMSP-AD)နှင့် လားဟူ ဒီမိုကရက်တစ်အစည်းအရုံး (LDU) တို့ ပါဝင်သည်။

စစ်ကော်မရှင်တပ်၏ NCA အမည်ခံ လုပ်ဆောင်မှုများသည် ဟန်ပြသာဖြစ်သလို ၂၀၀၈ အခြေခံဥပဒေသည်လည်း ပျက်ပြယ်သွားပြီဖြစ်ကြောင်း ထို ၆ ဖွဲ့က ပြောထားသည်။