သျှမ်းပြည်နယ် မြောက်ပိုင်း နမ္မတူမြို့နယ် ပန်လုံကျေးရွာ နှင့် ပန်ကိုင် ကျေးရွာ တိုက်ပွဲများဖြစ်ပွားမှုကြောင့် သွားလာဆက်သွယ်ရေးကားများ ခေတ္တရပ်ဆိုင်းရကြောင်း သတင်းရရှိသည်။

စက်တင်ဘာ ၄ ရက်နေ့ မနက် ၆ နာရီ ဝန်းကျင်က တအာင်း( ပလောင်) လွတ်မြောက်ရေးတပ်မတော် TNLA နှင့် သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည် တပ်မတော် (RCSS/SSA) တို့ကြားတိုက်ပွဲ ဖြစ်ပွား ခဲ့ခြင်းဖြစ်ကြောင်း သိရသည်။

“ဒီမနက် ၆ နာရီလောက် ပန်လုံကျေးရွာ ပန်ကိုင်ကျေးရွာ ဘက်မှာ လက်နက်သံတွေ ကြားရတယ်။ ပန်ကိုင် ကစစ်ရှောင် ၁၅ ဦးကို ကျနော်တို့ အဖွဲ့ သွားခေါ်တယ်။ ကျနော်တို့ စစ်ရှောင်သွားခေါ်တုန်းက ကားတွေ လမ်းပေါ်မှာ ရပ်နေရတယ်” ဟု သီပေါမြို့ နယ်စည်းမခြား လူမှုကူညီရေး အသင်း ဥက္ကဌ ကိုမျိုးက ပြောသည်။

ယခုရက်ပိုင်း တိုက်ပွဲများ ဆက်တိုက်ဖြစ်ပွားလာပြီး စစ်ရှောင်များ တိမ်းရှောင်နေရသည်မှာ စိတ်မကောင်းကြောင်း၊ စိုက်ပျိုးရေးလုပ်ငန်းခွင်ဝင်သည့်ရာသီဖြစ်သည့် အတွက် ကျေးရွာ အနီးတိုက်ပွဲမဖြစ်စေချင်ကြောင်း ကိုမျိုးက ပြောသည်။

“ ဒီနေ့ တိုက်ပွဲကြောင့် မန္တလေး ၊ လားရှိုး၊ သီပေါ ဆင်းမယ့် ကားတွေ လမ်းပိတ်ထားတယ်။ တိုက်ပွဲက သီပေါ နမ့်ဆန်လမ်းပေါ် ကပန်ကိုင် ကျေးရွာ နားမှာဖြစ်တာပါ။ အဲ့ဘက်က သီပေါနဲ့နီးတော့ သီပေါဘက် ထွက်ပြေးသွားကြတယ်” လို့နမ္မတူမြို့ မှ စစ်ရှောင် များကို ကူညီပေးနေသည့် စိုင်းမြင့် က ပြောသည်။

တိုက်ပွဲတွေ ဆက်တိုက်ဖြစ်ပွားမှုကြောင့် ဒေသခံများ လုံခြုံမှု မရှိတော့ဘဲ စိတ်အနှောက်အယှက်များ ဖြစ်ပွားနေကြကြောင်း၊ လက်နက်ကိုင် များ ကြားတွင် နေထိုင်ရသည့်အတွက် စိတ်ပျက်နေကြကြောင်းလည်း စိုင်းမြင့် က ပြောသည်။

တိုက်ပွဲများသည် ဇူလိုင် လလယ်မှစတင်ကာ ဖြစ်ပွားပြီး ယခုထိ ဆက်တိုက်ဖြစ်ပွားနေသဖြင့် နမ္မတူမြိုု့နယ် အတွင်းရှိ ဒေသခံများ မကြာခဏ ထွက်ပြေးတိမ်းရှောင်နေရသဖြင့်စိုက်ပျိုးရေးများ စီးပွားရေးများ ကောင်းမွန်စွာ မလုပ်ဆောင်နိုင်ကြောင်း စိုင်းမြင့် က ထပ်လောင်းပြောသည်။

“ တိုင်းရင်းသား အချင်းချင်း ဖြစ်နေတဲ့တိုက်ပွဲ လူမျိုးရေး ပြသာနာ ကြီးထွားလာတာ ကိုတော့ မတွေ့ရပေမယ့် နည်းနည်းလေးတော့ ခွဲခြား ဆက်ဆံတာရှိတယ်။ ကင်းကင်းရှင်းရှင်းနေကြတာတော့ တွေ့တယ်။ စစ်ဘေးရှောင်ရတာကလည်းဘယ်လူမျိုးဖြစ်ဖြစ် ရှောင်ရတာပဲ။ အခု ဖြစ်နေတဲ့ ပြသာနာကတော့ သူတို့ အချင်းချင်း လက်နက်နဲ့ အကြမ်းဖက်နည်းနဲ့ မဖြေရှင်းပဲ စာပွဲပေါ်မှာ ဖြေရှင်းရင်ပိုကောင်းပါတယ်” စစ်ရှောင် အမျိုးသားတဦးကပြောသည်။

လက်ရှိအချိန်သည် စိုက်ပျိုးရေးရာသီ ချိန်ဖြစ်သဖြင့် ပြည်သူများအလုပ်အကိုင် ပျက်ကာ စီးပွားရေး အခြေအနေ ကျဆင်းမှုကြံုတွေ့နေရသည် ဟု အဆိုပါ အမျိုးသားက ပြောသည်။

ဆက်လက်ပြီး စိုင်းမြင့် က “ ဒီနှစ် ကုန်စျေးနှုန်းက တက်တာ တမျိုး ၊ သဘာဝ ဘေး အန္တရာယ်ကလည်း တမျိုးဖြစ်တော့ ဒီလို စစ်ရေး တင်းမာမှုတွေ ဖြစ်လာတဲ့ အခါ စီးပွားရေးဦးမော့လာအောင်ပဲဖြစ်ဖြစ် ပြည်သူလူထု သူတို့တွေ ကိုယ်ပိုင်ရပ်တည်နိုင်ဖို့တော်တော် ထူထောင်ရမယ်” လို့ ဆိုသည်။

ယခု ၃-၄ လအတွင်း နမ္မတူမြို့နယ်တွင် မြောက်ပိုင်းမဟာမိတ် တပ်ဖွဲ့၊ RCSS/SSA နှင့် မြန်မာတပ်မတော်တို့ အပြန်အလှန် တိုက်ပွဲဖြစ်ပွားနေခြင်းကြောင့် ဒေသခံများလယ်ယာဆင်းချိန်မရဘဲ စစ်ဘေးခေါက်တုန့်ခေါက်ပြန်ရှောင်နေကြရပါသည်။