သျှမ်းပြည်နယ် မြောက်ပိုင်း နမ္မတူ မြို့နယ် ပန်လုံကျေးရွာ တွင် သျှမ်းပြည်ပြန်လည်ထူထောင်ရေး ကောင်စီ (RCSS/SSA) နှင့် တအာင်း (ပလောင်) အမျိုးသားလွတ်မြောက်ရေး တပ်မတော် TNLA တို့ တိုက်ပွဲဖြစ်ပွား မှုကြောင့် ပန်လုံကျေးရွာ ဒေသခံ ၂ ဦး ကျည်ဆံထိမှန်ကာ သီပေါမြို့ ဆေးရုံတွင် ဆေးကုသမှုခံယူနေရကြောင်း သိရသည်။

၂၀၁၈ ခု စက်တင်ဘာ ၃ ရက်နေ့က RCSS နှင့် TNLA တပ်ဖွဲ့တို့ တိုက်ပွဲဖြစ်ပွားမှုကြောင့် သေနတ်ထိမှန်သည့် ပန်လုံကျေးရွာ ဒေသခံ ၂ ဦးသည် နေအိမ်မှထွက်ပြေးရန် ပြင်နေစဉ်တွင် သေနတ်ကျည်ထိမှန်သွားကြောင်း၊ အသက် ၅၀ ကျော် အမျိုးသားတဦးသည် ရင်ဘတ် ဒဏ်ရာ ရရှိပြီး၊ အသက် ၂၅ နှစ်ကျော် အမျိုးသားတဦးမှာ လက်မောင်း ဒဏ်ရာရရှိကြောင်း သီပေါမြို့ နယ်စည်း မခြား ပရဟိတအဖွဲ့ ဥက္ကဌမှ ကိုမျိုးက ပြောသည်။

“ရွာအနီးမှာ တိုက်ပွဲဖြစ်တော့ နေအိမ်ခြံဝန်းထဲကနေ ထွက်မယ့်အချိန် သေနတ်ထိမှန်တာ။ လက်မောင်း ထိမှန် တဲ့သူကိုတော့ကျည်ထုတ်ပြီးပြီ၊ ရင်ဘတ် ထိတဲ့သူက ဒီနေ့ထိ ကျည်မထုတ်ရသေးဘူး” – ဟု ကိုမျိုးက ပြောသည်။

ရင်ဘတ် ဒဏ်ရာ ထိမှန်ထားသည့် အမျိုးသား တဦးကို ယနေ့အချိန်ထိ ကျည်မထုတ်ပေးနိုင်သေးကြောင်း၊ မန္တ လေး ဆေးရုံသို့ လွှဲပေးရန် ဆောင်ရွက်ပေးနေကြောင်း၊ အသက်အန္တရာယ် စိုးရိမ်စရာ မရှိကြောင်းလည်း ကိုမျိုး က ထပ်လောင်းပြောပြသည်။

အဆိုပါ တိုက်ပွဲကြောင့် ပန်လုံကျေးရွာ သားများ အားလုံး သီပေါမြို့ပေါ်သို့ ရွာလုံးကျွတ် ထွက်ပြေးတိမ်းရှောင် နေကြကြောင်းသိရသည်။

သျှမ်းပြည်နယ် မြောက်ပိုင်း နမ္မတူမြို့နယ် အတွင်း ယခုရက်ပိုင်း မြောက်ပိုင်း မဟာမိတ် တပ်မတော် နှင့် RCSS/SSA တို့ မကြာခဏ တိုက်ပွဲဖြစ်ပွားနေသည်။ အဆိုပါ မြောက်ပိုင်း မဟာမိတ်တပ်ဖွဲ့တွင် သျှမ်းပြည် တိုးတက်ရေးပါတီ SSPP တပ်ဖွဲ့ဝင်များ ပါ၀င်တိုက်ခိုက်နေသည်ဟု PSLF/TNLA တို့၏ ပြန်ကြားရေးဌာန နေ့စဉ်နှင့်အမျှ သတင်းထုတ်ပြန်နေသော်လည်း SSPP တပ်ဘက်မှ သီးခြားအတည်ပြုချက်မပေးပေ။