Thursday, December 1, 2022

မြောက်ပိုင်းမဟာမိတ်တပ်ဖွဲ့နှင့် RCSS/SSA ကြားတိုက်ပွဲများကြောင့် နမ္မတူနှင့်သီပေါသို့ဒေသခံ ၂၀၀၀ ကျော် စစ်ဘေးတိမ်းရှောင်

Must read

သျှမ်းပြည်မြောက်ပိုင်း နမ္မတူမြို့နယ်အတွင်း သျှမ်းပြည်ပြန်လည်ထူထောင်ရေးကောင်စီ RCSS/SSA နှင့် မြောက်ပိုင်းမဟာမိတ်တပ်ဖွဲ့တို့အကြား တိုက်ပွဲများဆက်တိုက် ဖြစ်ပွါးခဲ့ရာ နမ္မတူမြို့နယ် နှင့် သီပေါမြို့နယ်သို့ စစ်ဘေးရှောင် ၂၀၀၀ ကျော်ရောက်ရှိနေကြောင်းသိရသည်။

မြောက်ပိုင်းမဟာမိတ်တပ်ဖွဲ့နှင့် RCSS/SSA ကြားတိုက်ပွဲများကြောင့် နမ္မတူနှင့်သီပေါသို့ဒေသခံ ၂၀၀၀ ကျော် စစ်ဘေးတိမ်းရှောင်

ပန်လုံအုပ်စု နမ့်ဆီလင်းနှင့် မန်မိုင်နောင်ငင်းရွာ၊ လွယ်ပန်ပြည့်ရွာဘက်တွင် RCSS/SSA နှင့် မြောက်ပိုင်းမဟာမိတ်တပ်ဖွဲ့တို့ တိုက်ပွဲဖြစ်ပွါးခဲ့ရာ ပန်လုံအုပ်စုမှဒေသခံများ မန်စံမိုင်းမုအုပ်စုတွင် ၆ နေရာအပြင် သီပေါမြို့နယ် ပန်ဆပေ ၊မန်လီ ၊ အောင်မင်္ဂလာဘိုးတော် ဘုန်းကြီးကျောင်းတို့တွင် ရောက်ရှိစစ်ဘေးခိုလှုံနေကြခြင်းဖြစ်သည်။

“စစ်ဘေးရှောင်တွေက စက်တင်ဘာလ ၁ ရက်နေ့ကတည်းက တဖွဲဖွဲရောက်နေတာ ။ မနေ့ကလည်း တရက်လုံး ဒီနေ့လည်းထပ်ရောက်လာတယ်။ စုစုပေါင်း ၁၀၀၀ ကျော်ပြီ မန်စံနဲ့မိုင်းမု မှာ။ ” – ဟု စစ်ဘေးရှောင်များအား ကျန်းမာရေးအတွက်ကူညီမှုပေးနေသော နမ္မတူဒေသခံ နန်းဆိုင် ကပြောသည်။

မန်စံနှင့်မိုင်းမု တို့တွင် နမ့်ဆီလင်းရွာ၊ မန်မိုင်ရွာ၊ နားပုံရွာ၊ ဆန်ခါရွာ၊ ကောင်းဟုန်းရွာ၊ နားဟုတ်နောင်ငင်းရွာ၊ ပန်လုံ၊ ပန်ဟတ်၊ လုံမိတ်ရွာ၊ မန်စံရွာ မိုင်းမုရွာ တို့မှ ရွာသားများဖြစ်ကြကြောင်း၊ မန်စံ မြောက်ကျောင်းတွင် အိမ်ထောင်စုပေါင်း ၁၃၀၊ မန်စံဘုရားကျောင်းတွင် ၃၉ စု၊ မန်စံကမ္မဌာန်းကျောင်းတွင် ၄၈ စု၊ မန်စံ TEC ဘော်ဒါဆောင်တွင်၃၁ စု၊ မိုင်းမုဘုန်းကြီးကျောင်းတွင် မန်စံ-မိုင်းမုမှ အိမ်ထောင်စု ၃၀၀ ကျော် စုစုပေါင်းလူဦးရေ ၁၀၇၁ ဦးရှိကြောင်း စစ်ရှောင်ကူညီရေးအဖွဲ့များထံမှ သိရဘည်။

“မန်စံနဲ့ မိုင်းမုကိုရောက်လာတဲ့သူတွေ ဘယ်မှ ဆက်မသွားနိုင်ဘူး။ သီပေါဘက်သွားမယ်ဆိုရင်လည်း လမ်းမှာ လက်နက်ကိုင်အဖွဲ့တွေရှိနေသေးတယ်။ လားရှိုးဖက်သွားမယ်ဆိုရင်လည်း အီနိုင်းဘက်မှာရေကြီးနေတယ်။အဲဒါကြောင့်ဘယ်မှမသွားရဲဘဲ ဒီမှာဘဲရှိနေသေးတယ်။ တိုက်ပွဲကလည်းမန်စံနဲ့သိပ်မဝေးတော့ တကယ်လို့တိုက်ပွဲပြင်းထန်လာမယ်ဆိုရင် ဘယ်လိုလုပ်ရမလဲမသိတော့ဘူး။ ”- ဟု စစ်ဘေးရှောင်များကူညီရေးကော်မတီ စိုင်းဘဉာဏ်က သျှမ်းသံတော်ဆင့်အားပြောသည်။

မန်စံ-မိုင်းမုတွင်အပြင် သီပေါမြို့ ပန်ဆပေဘုန်းကြီးကျောင်းတွင် ၄၅၆ ဦး၊ မန်လီဘုန်းကြီးကျောင်းတွင် ၄၂၂ ဦးနှင့် အောင်မင်္ဂလာဘိုးတော်ဘုန်းကြီးကျောင်းတွင် ၂၄၉ ဦး ရောက်ရှိနေကြောင်း သိရသည်။

သီပေါမြို့နယ် SNLD ကျားခေါင်းပါတီမြို့နယ် အတွင်းရေးမှူး စိုင်းလောဝ်ဆိုင်က- “အခု သီပေါ ဘိုးတော်ကျောင်း တိုက်မှာတော့ နေရာမရှိတော့ဘူး။ ပြည့်ပြီ။ ထပ်ရောက်လာရင်တော့ တာတေ ဘုန်းကြီးကျောင်းမှာ စီစဉ်ပေးရပါလိမ့်မယ်။ ဒီရောက်လာတဲ့အထဲမှာလည်း တီဘီရောဂါသည်တဦးပါလာတယ်။ အခုသူ့ကိုသီပေါဆေးရုံကိုပို့လိုက်ပြီ။ ”- ဟု သျှမ်းသံတော်ဆင့်အားပြောသည်။

တိုက်ပွဲကြောင့် စစ်ရှောင်သူများတွင် မန်စံကျောင်းတိုက်တွင် မျက်မမြင်တဦးနှင့် မသန်စွမ်းသူတဦး၊ မန်စံ ကမ္မဌာန်းကျောင်းတွင်မသန်စွမ်း ၃ ဦး ပါရှိကြောင်းလည်း သိရပါသည်။

နမ္မတူမြို့နယ်တွင် အစိုးရတပ်နှင့် မြောက်ပိုင်းမဟာမိတ်တပ်ဖွဲ့ ၊ သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော်တို့အကြားတိုက်ပွဲများဖြစ်ပွါးခဲ့ရာဒေသခံပြည်သူလူထုမှာတနှစ်ပတ်လုံးစစ်ဘေးရှောင်နေရသည်။ နမ္မတူမြို့နယ်အတွင်း RCSS/SSA နှင့်ဖြစ်ပွါးသောတိုက်ပွဲများတွင် သျှမ်းပြည်တိုးတက်ရေးပါတီ သျှမ်း ပြည်တပ်မတော် SSPP/SSA ပါ၀င်သည်ဟု တအာင်း TNLA ပြန်ကြားရေးဌာနမှ ကြေငြာချက်များ ထုတ်ပြန် ခဲ့သော်လည်း သျှမ်းပြည်တပ်မတော် SSPP/SSA ဘက်ကမူ ငြင်းချက်ထုတ်ခြင်း၊ အတည်ပြု ပြောဆိုခြင်း မရှိခဲ့ပေ။

Leave a Comments

- Advertisement -spot_img

Latest article