သျှမ်းပြည်မြောက်ပိုင်းလားရှိုးမြို့တွင် ၂၁၁၃ ခု သျှမ်းနှစ်သစ် ကြိုဆိုသည့်ပွဲတော် ကျင်းပနိုင်ရေးအတွက် မြန်မာနိုင်ငံလုံးဆိုင်ရာ ဗဟိုသျှမ်းစာပေယဉ်ကျေးမှု အဖွဲ့ နှင့် မြို့နယ်အသီးသီးမှသျှမ်းစာပေယဉ်ကျေးမှုအဖွဲ့များ တွေ့ဆုံဆွေးနွေးရာ ဒေသခံများ တင်ပြချက်အရ ဖြစ်ပွားနေသည့် စစ်ရေးပဋိပက္ခများရပ်တန့်ရန်အတွက် ပူးပေါင်းအဖြေရှာကြရန် သျှမ်းပြည်တပ်မတော် ခေါင်းဆောင်နှစ်ဦးထံ တိုက်တွန်းစာပေးပို့လိုက်ကြောင်းသိရသည်။
၂၁၁၃ ခု သျှမ်းနှစ်သစ်ကူးပွဲ စုပေါင်းကျင်းပနိုင်ရေးအတွက် သြဂုတ်လ ၁၇ ရက်နေ့က ကျင်းပနိုင်ရေးအတွက် မြန်မာနိုင်ငံလုံးဆိုင်ရာ ဗဟိုသျှမ်းစာပေယဉ်ကျေးမှု အဖွဲ့ နှင့် သျှမ်းပြည်မြောက်ပိုင်း တောင်ပိုင်းမှ မြို့နယ်က သျှမ်းစာပေ နှင့် ယဉ်ကျေးမှုအသင်းဝင် အကြီးအကဲများ ကိုယ်စားများ သျှမ်းပြည်မြောက်ပိုင်းလားရှိုးမြို့ သျှမ်းစာပေယဉ်ကျေးမှုရုံးတွင် တွေ့ဆုံကြရာ သျှမ်းပြည်မြောက်ပိုင်းအတွင်း ဖြစ်ပွားနေသော စစ်ရေးပဋိပက္ခများရပ်တန့်နိုင်ရေးအတွက် သျှမ်းပြည်တပ်မတော်ခေါင်းဆောင် နှစ်ဦးထံ စာများပေးပို့ခဲ့ခြင်းဖြစ်ကြောင်း မြန်မာနိုင်ငံလုံးဆိုင်ရာ ဗဟိုသျှမ်းစာပေယဉ်ကျေးမှု ဥက္ကဌ စိုင်းတင်ကပြောသည်။
“ကျနော်တို့ ၂၁၁၃ သျှမ်းနှစ်သစ်ကူးပွဲတော်စုပေါင်းကျင်းပရေးအတွက် လားရှိုးမှာ ပထမဆုံးအကြိမ် တွေ့ဆုံ ဆွေးနွေး ခဲ့တာဖြစ်တယ်။ အစည်းအဝေးတက်ရောက်လာတဲ့ နမ္မတူဒေသခံတွေက သူတို့ဒေသတွင်းမှာ တိုက်ပွဲတွေဖြစ်နေတာကြောင့် ဒေသခံတွေ စစ်ဘေးတိမ်းရှောင်နေရတယ်။ လုပ်ငန်းခွင်မဝင်ရတော့ ကောက်ပဲအသစ်တွေရှိမှာမဟုတ်ဘူး။ ဒါကြောင့် ပွဲကျင်းပမယ်ဆိုရင်သူတို့ဘက်ကိုလည်း ငဲ့ကြည့်ပေးဖို့ ဆွေးနွေးလာတယ်။ ဒါကြောင့် ကျနော်တို့ သျှမ်းစာပေယဉ်ကျေးမှုအနေနဲ့ သျှမ်းလက်နက်ကိုင်တပ် ၂ ခုဖြစ်တဲ့ SSPP/SSA နဲ့ RCSS/SSA ရဲ့ခေါင်းဆောင်တွေဆီကို – တိုက်ပွဲတွေ အမြန်ဆုံး ရပ်တန့်နိုင်အောင် ဆွေးနွေးအဖြေရှာပေးဖို့ – စာပေးပို့ရတာဖြစ်တယ်”- ဟု သျှမ်းသံတော်ဆင့်အားပြောသည်။
အဆိုပါ ပေးစာတွင်- သျှမ်းပြည်မြောက်ပိုင်းရှိ မိဘပြည်သူများမှာ စစ်ဘေးစစ်ဒဏ်ကိုမပြတ်ခံနေရပြီး လယ်ယာခြံမြေနှင့် နေရပ်ကိုစွန့်ခွါကာ စစ်ဘေးရှောင်နေရကြောင်း၊ လယ်ယာမဆင်းရသဖြင့် လာမည့်နှစ်တွင် ၀မ်းရေးအတွက် စိတ်ပူရကြောင်း၊ ထို့အပြင် အမျိုးသားရေးအတွက် ဆောင်ရွက်နေသော အဖွဲ့အစည်းအသီးသီးထံ ကူညီထောက်ပ့ံမှုပေးနိုင်မည်မဟုတ်ကြောင်း ၊ ရည်မှန်းချက်တူပြီး သဘောထားခြင်းမတိုက်ဆိုင်ရုံဖြင့် လက်နက်ကိုင်ကာပြသနာဖြေရှင်း နေရသည်မှာ မိဘပြည်သူမှ ၀မ်းနည်း နေရကြောင်း ၊ အနာဂတ်မျိုးဆက်သစ်များအတွက် ရုပ်ဆိုးသောသမိုင်းမထားရှိသင့်ကြောင်း ပါရှိပါသည်။
“စာပေယဉ်ကျေးမှုအဖွဲ့ဆိုပေမယ့် အချင်းချင်းမသင့်မြတ်ကြရင်လည်း စာပေယဉ်ကျေးမှုထိန်းသိမ်းရေး လုပ်ငန်းလုပ်နိုင်မှာ မဟုတ်တဲ့အတွက် အချင်းချင်းပြေပြေလည်လည်ညှိနှိုင်းကြဖို့၊ အလေးအနက်ထားပြီး အဖြေရတဲ့အထိ ငြိမ်းချမ်းစွာဖြေရှင်းကြဖို့ ခေါင်းဆောင် ၂ ဦးဆီကိုစာပေးပို့ရတာဖြစ်ပါတယ် ” – ဟု စိုင်းတင်ကပြောသည်။
သျှမ်းပြည်မြောက်ပိုင်း သျှမ်းပြည်တပ်မတော် RCSS/SSA နှင့် တအာင်းပလောင်လွတ်မြောက်ရေးတပ်မတော် PSLF/TNLA တို့အကြားဖြစ်ပွားနေသော စစ်ရေးပဋိပက္ခတွင် ၄င်း၏မဟာမဟိတ်ဖြစ်သည့် PSLF/TNLA တပ်ဘက် သျှမ်းပြည်တပ်မတော် SSPP/SSA မှာ ပါ၀င်တိုက်ခိုက်သည်ဆိုသည့်သတင်း ထွက်ရှိလာခဲ့သည်။ ထိုဖြစ်စဉ်အပေါ် သျှမ်းလူထုတဝမှမ်းလုံးသာမက သျှမ်းသံဃာတော်ကြီးများပါ သျှမ်းပြည်ကြီးနှင့်တကွ ပြည်ထောင်စုတဝှမ်းလုံးငြိမ်းချမ်းစေရန် ဆက်တိုက် ဆုတောင်းမေတ္တာပို့တ ပွဲများပြုလုပ်လာခဲ့သည်။
