သျှမ်းပြည်မြောက်ပိုင်း လားရှိုးမြို့နယ် မိုင်းယော်တိုက်နယ်အတွင်း အစိုးရတပ်နှင့် တအာင်း TNLA တပ်တို့ တိုက်ပွဲဖြစ်ပွါးမှုကြောင့် ဒေသခံလူထု မိုင်းယော်သို့ စစ်ဘေးရှောင် ရောက်ရှိနေကြောင်းသိရသည်။
သြဂုတ်လ ၂၁ ရက် ယနေ့မနက် ၈ နာရီ ၄၅ မိနစ်မှ ၉ နာရှိခွဲကျော်အထိ ပစ်ခတ်တိုက်ခိုက်မှုသံများ၊ လက်နက်ကြီးသံများ ကြားရကြောင်းမိုင်းယော်ဒေသခံများကပြောဆိုသည်။
“မိုင်းယော်တောင်ဘက်အရပ်က လွယ်ပန်ဖီး ဘက်မှာ ပစ်ခတ်မှုအသံကြားရတယ်။ အရင် သကဆဖ ပြည်သူ့စစ် တပ်စခန်းဟောင်းရှိတဲ့တောင်ကြောဘက်မှာတိုက်ကြတာ။ တိုက်ပွဲက လွယ်ပန်ဖီးနဲ့ ၀မ့်ပန်ခုတ်ရွာကြား လောက်မှာဖြစ်လိမ့်မယ်။ ၂ ဖက်တပ်တွေ ရွာဘက်ကို ရောက်ရှိလာလို့ လွယ်ပန်ဖီးက ဒေသခံတချို့ မိုင်းယော်ထဲကိုရောက်လာတယ်။ နီးစပ်ရာဆွေမျိုးတွေဆီမှာခိုလှုံနေကြတာတွေ့တယ်။” – ဟု မိုင်းယော်ဒေသခံ စိုင်းဖှ က သျှမ်းသံတော်ဆင့်အား ပြောသည်။
မိုင်းယော်တိုက်နယ် တောင်ဘက် ခြမ်း ၈ မိုင်ခန့်အကွာရှိတောင်ကြောဘက်တွင် ပစ်ခတ်မှုဖြစ်ပွါးခြင်းဖြစ်ပြီး တိုက်ပွဲကြောင့်သေကြေဒဏ်ရာရမှုသတင်းတော့ မကြားသိရကြောင်း ၊ အဆိုပါ တောင်ကြောတွင် တအာင်းနှင့် တရုတ်လူမျိုးများ နေထိုင်ကြပြီး ပဲ၊ပြောင်း တောင်ယာ စိုက်ပျိုးရေး လုပ်ငန်းလုပ်ကိုင်ကြသည်။
“ပစ်ခတ်မှုတွေခန ခနဖြစ်ရင်ကျမတို့ ရွာဘက်မှာ စျေးသွားရောင်းဖို့တော့ မရဲတော့ဘူး။ ခုနောက်ပိုင်းက ပစ်ခတ်သံတွေက မကြာမကြာဆိုသလိုကြားနေရတာဘဲ။ ၀မ်းရေးအတွက်တော့အခက်အခဲဖြစ်ရတာပေါ့”- ဟု ရွာစျေးနေ့များသို့ စားသောက်ကုန်ပစ္စည်းများ လှည့်ပတ်ရောင်းနေသည့် စျေးသည်အမျိုးသမီးတဦး ကပြောသည်။
မိုင်းယော်တိုက်နယ်ဘက်တွင် အစိုးရစစ်တပ်နှင့် သကဆဖ ဌာနေပြည်သူ့စစ်တို့ အခြေချလှုပ်ရှား နေထိုင်ကြောင်း၊ ယခုနောက်ပိုင်း တအာင်းတပ်ဖွဲ့၊ သျှမ်းတပ်ဖွဲ့များလည်းဝင်ရောက်လှုပ်ရှားလာကြောင်း ဒေသခံများပြောပြချက်အရသိရသည်။
လားရှိုးမြို့အရှေ့မြောက်ဘက် မိုင် ၃၀ ကျော်အကွာရှိ မိုင်းယော်တိုက်နယ် အရှေ့ဘက် ပန်ခါးရွာဘက်တွင်လည်း ပြီးခဲ့သည့်အပတ်က အစိုးရတပ်နှင့် တအာင်းတပ်တို့ ပစ်ခတ်မှုဖြစ်ပွါးခဲ့ပါသေးသည်။
Leave a Comments