ကချင်ပြည်နယ်အတွင်းရှိ သျှမ်းများစုပေါင်းကာ ၂၁၁၂ ခုနှစ် သျှမ်းနှစ်သစ်ကူးပွဲတော်ကို ဟိုပင်မြို့နယ် ၀မ့်ဆတ်ကွန်းရွာတွင် ကျင်းပရာ စာပေဟောပြောပွဲကိုပါ ပထမဆုံးအကြိမ်ကျင်းပ ခဲ့ကြောင်းသိရသည်။

ပွဲတော်ကို နို၀င်ဘာလ ၁၇ ရက်မှ ၁၉ ရက်အထိကျင်းပခဲ့ခြင်းဖြစ်ပြီး စာပေဟောပြောပွဲပါကျင်းပခဲ့ရာ သျှမ်းစာပေယဉ်ကျေးမှုအသင်းများ၊ အုပ်ချုပ်ရေးအာဏာပိုင်များအပြင် သျှမ်းစာရေးဆရာ ခူးဟင်း ကာဟန်း ကလည်း သျှမ်းနှစ်သစ်ကူးသမိုင်းနှင့် စာပေအကြောင်းခေါင်းစဉ်ပါ ၀င်ရောက်ဟောပြောခဲ့သည်။

“ကချင်ပြည်နယ်ထဲက ၉ မြို့နယ်မှာ သျှမ်းစာပေယဉ်ကျေးမှုအသင်းတွေကနေ စုပေါင်းပြီတော့ တနှစ် တနေရာစီ လည့်ပတ်ပြီး ပွဲစုပေါင်းကျင်းပဖို့ သဘောတူထားတဲ့အလျောက်ကျနော်တို့ဒီနှစ် ဟိုပင်မှာကျင်းပဖို့ အလှည့်ကျတာဖြစ်ပါတယ်။ ရထားသံရိုးပိုင်း အနေနဲ့ ပထမ ဆုံးအကြိမ်ဘဲ။ အဲဒီ့ပွဲမှာ ကျနော့်အနေနဲ့က သျှမ်းနှစ်သစ်ကူးသမိုင်းဆိုတဲ့ခေါင်းစဉ်နဲ့အတူ ပညာရေးပိုင်းဆိုင်ရာခေါင်းစဉ် ကိုဟောပြောပါတယ်။ မိမိ စာပေနဲ့ဘာသာစကားကိုအသုံးပြုပြီးတော့ ဘဝအတွက် ဗဟုသုတဆိုင်ရာ ပညာရပ်တွေကိုလေ့လာ သင်ယူ သွားနိုင်ဖို့က လူမျိုးတမျိုးအတွက်အရေးကြီးဆုံး အချက်တချက်ဖြစ်တယ်ဆိုတဲ့အကြောင်း ကျနော် ပြောကြားသွားခဲ့ပါတယ်။” – ဟု သျှမ်းသံတော်ဆင့်အားပြောပြသည်။

လက်ရှိတွင် သျှမ်းနှစ်သစ်ကူးပွဲတော်အား ပျော်ပွဲရွှင်ပွဲများဖြင့်ကျင်းပလျှက်ရှိကြပြီး စာပေအပိုင်းတွင် မေ့ကျန် နေကြကြောင်း ထို့အတွက် ပျော်ပွဲနှင့်အတူ သမိုင်း ဘာသာ စာပေအကြောင်းဟောပြောပွဲများ ပါတွဲလျက် ကျင်းပစေလိုကြောင်း ခူဟင်း ကာယန်းကတိုက်တွန်းခဲ့သည်။

“သျှမ်းနှစ်သစ်ကူးပွဲတော်ကျင်းပတဲ့ ရည်ရွယ်ချက်ကတော့ အနုပညာ ၊ စာပေ ၊ ယဉ်ကျေးမှု ထိန်းသိမ်း ဖို့အတွက် ။ သို့ပေမယ့် အဲလိုလုပ်ရင်းလုပ်ရင်း စာပေအပိုင်းမေ့သွားကြတယ်။ နှစ်သစ်ကူးရင် ပျော်ပွဲ ရွှင်ပွဲအတွက်သက်သက်မဟုတ်ဘဲနဲ့ ဒီကနေ့ကျနော်တို့အားနည်းချက်ကဘာလဲ။ ကျနော်တိို့ နောက်ကျ နေသေးတာကဘာလဲ ဆွေးနွေးသုံးသပ်ပြီးတော့ ဥပမာ သမိုင်း၊ နိုင်ငံရေး ၊ ကျန်းမာရေး ဆေးပညာ စတဲ့ ခေါင်းစဉ်အသီးသီး တွေကို သက်ဆိုင်ရာကျွမ်း ကျင်ပညာရှင်ကြီး တွေကိုဖိတ်ပြီး ပြောခိုင်းမယ်။ နားထောင် တဲ့သူက မိမိကြိုက်တဲ့ ဘာသာရပ် ကိုရွေးပြီး သွားနားထောင်မယ်။သျှမ်းစာပေ ယဉ်ကျေး မှုအဖွဲ့ကနေပြီး အဲဒီဟောပြောခဲ့တဲ့ စာတမ်းတွေကိုစုပြီး စာအုပ်အဖြစ်ထုတ်ဝေပေးမယ်။ လူတိုင်းလက်ထဲရောက် အောင်ဖြန့် ဝေကြမယ်ဆိုရင် စာပေယဉ်ကျေးမှု ထိန်းသိမ်းရာကိုရောက်သလို သျှမ်းပြည်သားတွေလည်း ဗဟုသုတကြွယ်ဝ မယ်။ အဘက်ဘက်ကအကျိုးရှိတယ်လေနော်”- ဟု ပြောဆိုသည် ။

၂၁၁၂ ခု သျှမ်းနှစ်သစ်ကူးပွဲတော်ကို သျှမ်းပြည်တွင်းမြို့နယ်အသီးသီးတို့တွင်အပြင် စစ်ကိုင်းတိုင်း ခန္တီးမြို့နယ်၊ ဟုမ္မလင်းမြို့နယ်၊ နမ့်တော၊ မုံရွာ၊ ဖောင်းပြင်၊ ရန်ကုန်၊ မန္တလေး အပါအဝင် ဂျပန်၊ ကိုးရီးယား၊ စင်္ကာပူ၊ အင်္ဂလန်၊ အမေရိကန်ရောက် သျှမ်းလူမျိုးများက အသီးသီးကျင်းပခဲ့ကြသည်။ စစ်ကိုင်းတိုင်း တမူးမြို့တွင် ကျင်းပသည့် သျှမ်းနှစ်သစ်ကူးပွဲတော်မှာ အိန္ဒိယနိုင်ငံ အာဟုံ အာသံပြည်နယ်ဘက်မှ သျှမ်းလူမျိုးများလည်း လာရောက်ပါ၀င်ပူးပေါင်းခဲ့ကြသည်။