ထိုင်းနိုင်ငံ၊ အယုဒ္ဓယခရိုင် ဘုန်းကြီးကျောင်းတစ်ခုတွင် သက်တော် ၆၆ နှစ်အရွယ််ရှိ ကျောင်းထိုင်ဆရာတော်ဖြစ်သူမှ ဘုန်းကြီးကျောင်း ရန်ပုံငွေ ဘတ် ၉၂ သန်းကျော် (မြန်မာကျပ် ၁၂ ဘီလီယံ နီးပါး) အလွဲသုံးစားလုပ်မှုဖြင့် ဖမ်းဆီးခံရကြောင်း ထိုင်းသတင်းများတွင်ဖော်ပြသည်။

ယနေ့ (စက်တင်ဘာ ၁၀ ရက်) မနက်အစောပိုင်းတွင် ထိုင်းနိုင်ငံ ဗဟိုစုံစမ်းရေးဗျူရို (CIB) မှ အယုဒ္ဓယ ခရိုင်အတွင်းရှိ Wat Phutthaisawan ဘုန်းကြီးကျောင်းအတွင်း ထိုကျောင်းထိုင်ဆရာတော်အား ဝင်ရောက်ဖမ်းဆီးခဲ့ခြင်းဖြစ်သည်။

စုံစမ်းမှုများအရ ပြီးခဲ့သည့် နှစ်နှစ်ကျော်ကာလအတွင်း ဘုန်းကြီးကျောင်း၏ အမည်အားအသုံးပြု၍ အလှူငွေပြေစာ အစောင် ၂၀ အား အလွဲသုံးစားပြုလုပ်ခဲ့ကြောင်း၊ ထိုအလှူငွေပြေစာ ၂၀ မှ ဘတ် ၉၂ သန်းကျော် ဆုံးရှုံးခဲ့ကြောင်း သိရသည်။

ရဲတပ်ဖွဲ့၏ ပြောကြားချက်အရ အဆိုပါ ငွေများအား ကျောင်းထိုင်ဆရာတော်ဖြစ်သူနှင့် နီးစပ်သည့် အမျိုးသမီးတစ်ဦးထံသို့ လွှဲပြောင်းထားကြောင်း၊ ထိုအမျိုးသမီးမှ အခြားသူများ၏အမည်ဖြင့် ပိုင်ဆိုင်မှုများပြောင်းလဲခြင်း၊ ဖုံးကွယ်ခြင်းတို့ပြုလုပ်ရန် ကူညီခဲ့ကြောင်း သိရသည်။

ထို့ကြောင့် ထိုအမျိုးသမီးကိုလည်း ဖမ်းဆီးခဲ့ပြီး ထပ်မံစစ်ဆေးခဲ့ရာ ၎င်း၏ ဘဏ်အကောင့်တွင် နှစ်စဉ် ဘဏ်သန်းပေါင်း သောင်းနှင့်ချီသော ငွေများအဝင်အထွက်ရှိနေခဲ့ကြောင်း တွေ့ရှိခဲ့ပြီး ငွေကြေးစီးဆင်းမှုလမ်းကြောင်းများနှင့် အခြားပိုင်ဆိုင်မှုများကိုပါပါ ဆက်လက်စစ်ဆေးလျက်ရှိသည်။

ထို့အပြင် ဘုန်းကြီးကျောင်း၏ CCTV များမှတဆင့် အဆိုပါ သက်တော် ၆၆ နှစ်ရှိ ကျောင်းထိုင်ဆရာတော်ဖြစ်သူသည် ၎င်းအမျိုးသမီးနှင့် လိင်ပိုင်းဆိုင်ရာ ဆက်ဆံမှုများပါရှိခဲ့ကြောင်း သိရသည်။

၎င်း ကျောင်းထိုင်ဆရာတော်သည် “Nuea Duang” (ကံကြမ္မာထက်မြင့်သော) ဂျတုခမ် (Jatukam) အဆောင်လက်ဖွဲ့များကြောင့်လည်း ထိုင်းပြည်သူများအကြားတွင် နာမည်ကြီးသော ဆရာတော်တစ်ပါးဖြစ်ကြောင်း ဖော်ပြထားသည်။

ကိုးကား – The Thaiger