ထိုင်းနိုင်ငံ၊ ချွန်ပူရီခရိုင် စည်ပင်သာရေးဌာန၏ ကလေးထိန်းကျောင်းတခုအတွင်း ပစ်ခတ်မှုဖြစ်ပွားခဲ့ပြီး အမျိုးသမီးတဉီးသေဆုံးကြောင်း သတင်းရရှိသည်။

ယနေ့ (စက်တင်ဘာ ၉ ရက်) မနက်ပိုင်းတွင် ထိုင်းနိုင်ငံ၊ ချွန်ပူရီခရိုင်အတွင်းရှိ၊ နောင်ပလာလိုင် (Nong Pla Lai) ကလေးထိန်းကျောင်းတွင် သေနတ်ပစ်ခတ်မှုဖြစ်ပွားခဲ့ပြီး အသက် ၄၈ နှစ်အရွယ် အမျိုးသမီးတဉီး သေဆုံးခဲ့ပြီး သေနတ်သမားဟု သံသယရှိသူ ရဲအရာရှိတစ်ဦး မှာထွက်ပြေးလွတ်မြောက်နေကြောင်း သိရသည်။

မျက်မြင်သက်သေများ၏ အဆိုအရ အမျိုးသားတဉီးမှ ကျောင်းအတွင်းသို့ ကားဖြင့်ဝင်ရောက်လာခဲ့ပြီး သေဆုံးသူအမျိုးသမီးဖြစ်သူနှင့် စကားပြောခဲ့ကြောင်း ထို့နောက်တွင် သေနတ်သံတချက်ကြားခဲ့ကြောင်း ကျောင်းစားသောက်ဆိုင်အနီးတွင် သေဆုံးသူအမျိုးသမီးကို တွေ့ရှိခဲ့ရသည်။

ပစ်ခတ်မှုကြောင့် ကျောင်းတွင်ရှိနေသော ကလေးငယ်အချို့ လန့်ဖြန့်၊ ငိုယိုခြင်းများရှိခဲ့ပြီး ကျောင်းရှိကလေးငယ် ၄၄ ဦးလုံး ဘေးအန္တရာယ်ကင်းရှင်းကြောင်း ရဲတပ်ဖွဲ့က ထုတ်ပြန်သည်။

သေနတ်သမားဟု ယူဆရသူမှာ သေဆုံးသူအမျိုးသမီး၏ ခင်ပွန်းဖြစ်သူ ရဲအရာရှိတဉီးဖြစ်ကြောင်းသိရသည်။​

လက်ရှိတွင် ထိုသံသယရှိသူ ရဲအရာရှိ၏နေအိမ်တွင် ပိတ်ဆို့မှုများပြုလုပ်ထားပြီး အာဏာပိုင်များမှ လက်နက်ချခိုင်းရန် ကြိုးပမ်းနေကြောင်း ထိုင်းသတင်းများတွင် ဖော်ပြသည်။

ပစ်ခတ်မှုဖြစ်ပွားရသည့်အကြောင်းအရင်းအား ရဲတပ်ဖွဲ့မှ ဆက်လက်စုံစမ်းစစ်ဆေးနေဆဲဖြစ်သည်။

ယခုဖြစ်စဉ်သည် ၂၀၂၆ ခုနှစ်အတွင်း ထိုင်းနိုင်ငံစာသင်ကျောင်းများတွင် တတိယမြောက်ပစ်ခတ်မှုဖြစ်ပြီး၊ ပြီးခဲ့သည့် ဩဂုတ်လ ၇ ရက်က နွန်သဘူရီမြို့ အထက်တန်းကျောင်းတစ်ခုတွင် အသက်၁၄ နှစ်အရွယ်ကျောင်းသားတစ်ဦး၏ ကျောင်းတွင်းပစ်ခတ်မှုကြောင့် လူ ၉ ဦးသေဆုံးခဲ့ပြီး ၂၃ ဦးထက်မနည်း ဒဏ်ရာရရှိခဲ့သည်။

ထို့အပြင် ပြီးခဲ့သည့် စက်တင်ဘာလဆန်းကလည်း ကမ်ဖန်ဖတ်ခရိုင်ရှိ စာသင်ကျောင်းတစ်ခုအတွင်း အသက် ၁၄ နှစ်အရွယ်ကျောင်းသားတစ်ဦးမှ သေနတ်ပစ်ခတ်မှုဖြစ်ပွားခဲ့သေးသည်။

ထိုကဲ့သို့ ကျောင်းတွင်းပစ်ခတ်မှုများ ခပ်စိပ်စိပ်ဖြစ်ပွားလာသည့်အတွက် ကျောင်းသား ကလေးငယ်များနှင့် ဒေသခံပြည်သူများကြားတွင် လုံခြုံရေးစိုးရိမ်ပူပန်မှုများ ပိုမိုမြင့်တက်လာနေပြီး သေနတ်ကိုင်ဆောင်ခွင့် ဥပဒေများကို ပိုမိုတင်းကျပ်ရန် တောင်းဆိုမှုများထွက်ပေါ်နေသည်။

ကိုးကား – Khaosod English