သျှမ်းပြည် လားရှိုးမြို့ပေါ်တွင် စစ်ကောင်စီက ညနေ (၆)နာရီကျော် နေအိမ်အပြင်ထွက်သူများကို သေနတ်ပစ် ခြိမ်းခြောက်မှုများ ပြုလုပ်နေကြောင်း စုံစမ်းသိရသည်။

သျှမ်းပြည် လားရှိုးမြို့ပေါ်တွင် ယခုရက်တစ်ပတ်အတွင်း၌ စစ်ကောင်စီက ည ၆ နာရီမှစတင်ပြီး နေအိမ်အပြင် မထွက်ရန် လော်စပီကာဖြင့် လိုက် ကြေညာခဲ့သည်။

ထို့နောက် ညအချိန်အပြင်ထွက်သူများကို စစ်ကောင်စီ၏ တပ်သားမျာက သေနတ်ဖြင့် လိုက်လံပစ်ခတ် ခြိမ်းခြောက်နေကြောင်း လားရှိုးမြို့ အသက် ၄၀နှစ်အရွယ်ရှိ ‌ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“နေ့လည်တွေဆိုရင် ကားနဲ့ ည၆ နာရီကျော်ရင် အပြင်မထွက်ဖို့ပြောတယ်။ ထွက်ရင် အရေးယူမယ် ပြောတယ်။ သူတို့ရဲ့စကားအလှပေါ့ တကယ်တမ်းကြတော့ ပစ်သတ်တာပဲ။ အခုဆိုရင် ပိုဆိုးလာတယ်” ဟု ၎င်းဒေသခံအမျိုးသားကပြောသည်။

ထို့ပြင် မတ် ၁၀ ရက် ညနေ (၆)နာရီတွင်လည်း လားရှိုးမြို့ ရပ်ကွက် (၅)ဘက်တွင် စစ်ကောင်စီ၏ တပ်သားများ အပြင်ထွက်သည့် အမျိုးသားတစ်ဦးကို သေနတ်ဖြင့် ပစ်လိုက်ကာ ခြေထောက်ထိမှန်သွားကြောင်း လားရှိုးဒေသခံအမျိုးသားက ထပ်လောင်းပြောသည်။

“ ကျနော်ကြားရတာတော့ စစ်သားက သေနတ်နဲ့ပစ်လိုက်လို့ အမျိုးသားတစ်ဦး ခြေထောက်ထိမှန်သွားတယ် လို့ပြောတယ်။ အတိအကျတော့ ပြောလို့မရဘူး။ ညဆိုရင်လူတွေ အပြင်မထွက်ရဲဘူး” ဟု ၎င်းအမျိုးသားက ဆိုသည်။

အရှေ့မြောက် တိုင်းစစ်ဌာနချုပ် (ရမခ)မှ လားရှိုးမြို့နယ်တွင်၂၀၂၃ နိုဝင်ဘာလ ၁၅ ရက်တွင် မာရှယ်လော စတင်ထုတ်ပြန်ခဲ့ပြီး ည ၆ နာရီမှ နံနက် ၆ နာရီအတွင်း ညမထွက်ရအမိန့် မလိုက်နာသူများကို ဖမ်းဆီးအရေးယူမည်ဖြစ်ကြောင်း ကြေညာချက်ထုတ်ခဲ့သည်။

ထို့ကြေညာချက်ထုတ်ပြီးနောက် ယခုနှစ် နှစ်လကျော်အတွင်း လူ ၆ ဦးထက်မနည်းကို စစ်ကောင်စီက ပစ်သတ်ခဲ့ကြောင်း သိရသည်။

ယခုရက်ပိုင်းတွင်လည်း စစ်ကောင်စီဘက်မှ လားရှိုးလူငယ်များကို ဦးတည်ပြီး စစ်ဆေးမှု တင်းကြပ်ခြင်း၊ ဖမ်းဆီးမေးမြန်းခြင်းများလည်း ပြုလုပ်နေပြီး၊ ဖုန်းများလည်း စစ်နေကြောင်း ကိုယ်တိုင်ကြုံတွေ့ခဲ့သည့် အသက် (၂၅)နှစ်အရွယ် အမျိုးသား တစ်ဦးက သျှမ်းသံတော်ဆင့်ကိုပြောသည်။

“ဒီရက်ပိုင်းက စစ်ဆေးတာပိုတင်းကြပ်လာတယ်။ဆိုင်ကယ်တွေစစ်တယ်၊ဖုန်းတွေစစ်တယ်။ပီရင် လူကိုမေး အတင်းကြပ်မေးတာ။နာရီဝက်လောက်‌ခေါ်ထားခံရတယ်။”ဟု ၎င်းက ပြောသည်။

လားရှိုးမြို့နယ်တွင် စစ်ကောင်စီတပ်ဖွဲ့အပြင် ပြည်သူ့စစ်အဖွဲ့၊ တိုင်းရင်းသားလက်နက်ကိုင်များ ဖြစ်ကြသည့် SSPP/SSA၊ TNLA ၊ MNDAAစသည့်ဖြင့် လက်နက်ကိုင်တပ်ဖွဲ့များ လှုပ်ရှားနေသည်။