သျှမ်းပြည်တောင်ပိုင်း ကျေးသီးမြို့နယ် မိုင်းနင်းကျေးရွာအုပ်စု နောင်ယုန်းကျေးရွာထဲတွင် စစ်ကောင်စီက ပြည်သူပိုင်နွားကို လာရောက်ပစ်ခတ်ပြီး ပိုင်ရှင်ကိုလည်း ဓားဖြင့် ပြန်လည်ခုတ်ခဲ့ကြောင်း စုံစမ်းသိရသည်။
ယမန်နေ့ ( ဩဂုတ် ၃၁) ရက် နေ့လည် (၁) နာရီ ဝန်းကျင်တွင် စစ်ကောင်စီက ပြည်သူပိုင်နွားကို သေနတ်ဖြင့် ပစ်နေသည်ကို ပိုင်ရှင်ကတွေ့ရှိပြီး တားမြစ်ရာမှ ဓားဖြင့်ခုတ်ခဲ့ပြီး လည်ပင်းတွင် ဒဏ်ရာရရှိခဲ့ကြောင်း သိရသည်။
“သူက နွားသွားရှာချိန်မှာ စစ်တပ်က သေနတ် နဲ့ သူ့နွားကို ပစ်နေတာတွေ့တော့ သွားတားတာ။ စကားလည်းများကြမလားမသိဘူး။ နွားပိုင်ရှင်နားပါလာတဲ့ ဓားနဲ့ သူတို့က ပိုင်ရှင်ကို ပြန်ခုတ်တာ။ လည်ပင်းနား ဒဏ်ရာရသွားတယ်။ အခုတော့ ကျေးသီးဆေးရုံမှာ ဆေးကုသနေတယ်” ဟု ကျေးသီးမြို့ ဒေသခံ အမျိုးသားတစ်ဦးက ပြောသည်။
အဆိုပါ ဒဏ်ရာရရှိခဲ့သည့် ဦးရွှေပွန်းသည် အသက် (၆၀) ရှိနေပြီး လည်ပင်းမှာ ၁၀ ချက်နီးပါးချုပ်လိုက်ရကြောင်း သိရသည်။
ထိုသို့ ဓားခုတ်ခဲ့သည့် စစ်ကောင်စီတပ်သည် တပ်မ ၁၃၁ ဖြစ်ကြောင်း ဒေသခံများ ပြောပြချက်အရသိရသည်။
လက်ရှိမှာ ဓားခုတ်ခဲ့သည့် တပ်သားကို ဖမ်းဆီးထားခြင်းဖြစ်ကြောင်း တပ်မ တာဝန်ရှိသူက လာရောက်ပြောခဲ့ကြောင်း၊ ထို့အပြင် လျော်ကြေးငွေ ပေးမည်ဟုပြောဆိုသော်လည်း ယနေ့ထိသွားပေးခြင်းမရှိသေးပေ။
“ သူက အသက်ကြီးပြီ။ လည်ပင်းမှာ ၁၀ ချက် လောက်ချုပ်လိုက်ရတယ်။ စစ်ကောင်စီဘက်က တပ်မအဖွဲ့က လာတောင်းပန်တာရှိတယ်။ ဖမ်းလိုက်ပြီလို့တော့ပြောတယ်။ တကယ်ဖမ်းမဖမ်းတော့မသိဘူး။ လျော်ကြေးလာပေးမယ်လည်း ပြောတယ်။ ဘယ်နေ့ဘယ်ချိန်မှာ လာပေးမလဲ လို့ မပြောဘူး” ဟု ကျေးသီးမြို့နယ် ဒေသခံ အမျိုးသားတစ်ဦး ကပြောသည်။
လက်ရှိမှာ ဦးရွှေပွန်းသည် ဆေးကုသရန်အတွက် ဆေးစရိတ် အခက်ခဲရှိနေကြောင်း သိရသည်။
