သျှမ်းပြည်တောင်ပိုင်း၊ ညောင်ရွှေမြို့နယ် စံကားအင်း အနောက်ဘက်ကမ်းရှိ ကျောက်တန်းကျေးရွာတွင် PNO ပြည်သူ့စစ်မှ အရက်မူးပြီး သေနတ်ပစ်ဖောက်ရာ အိမ်ရှင်အမျိုးသားတစ်ဉီး သေနတ်ထိမှန်သွားခဲ့ကြောင်း သတင်းရရှိသည်။
ပြီးခဲ့သည့် မတ်လ (၂၂) ရက်တွင် စစ်ကောင်စီ လက်အောက်ခံ ပအိုဝ်းပြည်သူ့စစ် PNO တပ်ရင်း (၇) မှ တပ်သားများသည် ကျောက်တန်းကျေးရွာရှိ ဦးထွန်းခင် နေအိမ်တွင် လာရောက်တည်းခိုပြီး သောက်စားပျော်ပါးရာမှ သေနတ်ပစ်ဖောက်လိုက်သဖြင့် အိမ်ရှင်ဖြစ်သူ အသက် ၅၀ အရွယ်ရှိ ဦးထွန်းခင် ကို ကျည်ထိမှန်သွားခဲ့သည်။
သေနတ်ကျည်ထိမှန် ဒဏ်ရာရသွားသည့် ဦးထွန်းခင်ကို တောင်ကြီးဆေးရုံသို့ ပို့ဆောင်၍ ဆေးကုထားရကြောင်း ညောင်ရွှေဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။
“သူတို့ (PNO) ကျောက်တန်းရွာလာပြီး မူးပြီး သေနတ်ဖောက်သွားတာ။ ဦးထွန်းခင်ကို သေနတ်မှန်သွားတော့ ခုတောင်ကြီး ဆေးရုံကို ပို့ထားရတာ။ သူတို့က အဲ့လိုပဲ ကင်းလှည့်ပြီး ကျေးရွာတွေမှာ ဝင်ဝင်အိပ်တာ၊ အိမ်ရှင်တွေက ထမင်းချက်ကျွေးရတာပေါ့။ သူတို့ကို ကြောက်နေရတယ်” ဟု ၎င်းဒေသခံ အမျိုးသားက ပြောသည်။
ထို့အပြင် PNO တပ်သားများ သည် စံကားအင်းဒေသ ဘီလူးချောင်း အနောက်ဘက်ကမ်းရှိ လမ်းမကြီးပေါ် ဖြတ်သန်းသွားသော ကားနှင့် ဆိုင်ကယ်များကို စစ်ဆေးကာ ငွေတောင်းခံခြင်း၊ ကျေးရွာသို့ ကင်းပတ်လှည့်ခြင်းများ လုပ်နေချိန် ကျေးရွာဒေသခံများမှ ထမင်းချက်ကျွေး ရကြောင်းလည်း ၎င်းက ဆက်ပြောသည်။
ဆက်လက်ပြီး စစ်ကောက်စီလက်အောက်ခံ PNA ပြည်သူ့စစ်သည် စံကားကျေးရွာဘက်တွင် ဆေးရုံ၊ လှေဆိပ် နှင့် တံတားတို့တွင် ဂိတ်ဖွင့်ထားပြီး လှေဆိုက်ကပ်လာလျှင် လှေအမျိုးအစားပေါ် မူတည်၍ ငွေကောက်ခံနေသောကြောင့် ဒေသခံများ အခက်အခဲ ဖြစ်နေကြသည်။
“သူတို့က ပိုက်ဆံကောက်လို့ရမယ့် နေရာတွေမှာ ဂိတ်ဖွင့်ထားတာ။ လှေဆိုရင် Honda လှေဆိုရင် ကျပ် (၅၀၀၀) ၊ စက်လှေအကြီးဆိုရင် ကျပ်(၁၀၀၀၀) ပေးရတယ်။ ကုန်ပစ္စည်းတွေပါရင် ပစ္စည်းခတွေပါ ပိုကောက်တယ်။ သူတို့က ဒီလိုပိုက်ဆံကောက်လေ ကျနော်တို့ ပြည်သူတွေ ပိုခက်ခဲလေ” ဟု စံကားအင်း ဒေသခံ အမျိုးသားတစ်ဦးက ပြောသည်။
ထို့အပြင် မတ်လ (၂၄) ရက်တွင်လည်း စစ်ကောင်စီနှင့် ပအိုဝ်းပြည်သူ့စစ် PNO တို့ က တိုက်ပွဲဖြစ်ပွားခြင်းမရှိဘဲ အင်းလေးတောင်ဘက်ခြမ်းရှိ ဘုရားတောင်ကျေးရွာ ရပ်ကွက်(၃)ကို ဒရုန်းဖြင့် ဗုံးကြဲတိုက်ခိုက်ခြင်းကြောင့် နေအိမ်တစ်လုံး ပျက်စီးသွားခဲ့ရကြောင်း ဒေသခံများထံမှ သိရသည်။
ယခုရက်ပိုင်းတွင် ညောင်ရွှေမြို့နယ် အင်းလေးဒေသတွင် စက်သုံးဆီများကို အကန့်အသတ်ဖြင့်သာ ရောင်းချနေပြီး ကန့်သတ်မှုထက် ပိုသုံးလျှင် ငွေပိုပေးနေရသောကြောင့် စက်လှေသမားများ အခက်အခဲဖြစ်နေကြသည်ဟု သိရသည်။
Leave a Comments