သျှမ်းပြည်မြောက်ပိုင်း မူဆယ်မြို့တွင် လုယက်မှု မှ ပစ်ခတ်မှုဖြစ်ပွားခဲ့ပြီး သက်ဆိုင်မှုမရှိသည့် ပြည်သူ တစ်ဦး သေဆုံးခဲ့ရကြောင်း သတင်းသိရသည်။

ဖြစ်စဥ်မှာ ယမန်နေ့ ဧပြီလ ၂၁ ရက် မနက် ၇ နာရီဝန်းကျင်တွင် မူဆယ်မြို့ ကောင်းမူတုံရပ်ကွက်မှ ပင်လုံလမ်းသွယ် ၂ တွင် ဈေးမှ ဆိုင်ကယ်စီးပြီး ပြန်လာသော အမျိုးသမီးနှစ်ဦးကို အမျိုးသားနှစ်ဦးက လိုက်လံလုယက်ခဲ့ကြောင်းသိရသည်။

“ဈေးကနေ ပြန်လာတဲ့ အဲ့အမျိုးသမီးနှစ်ယောက်ရဲ့ နောက်ကို တခြားဆိုင်ကယ်စီး အမျိုးသားနှစ်ယောက်က လိုက်လာပြီး နောက်က လိုက်စီးလာတဲ့ အမျိုးသမီးရဲ့ ဆွဲကြိုးကိုလုယူသွားတာ၊ အဲ့အမျိုးသမီးဆိုင်ကယ် ပေါ် ကနေ တလိမ့်ခေါက်ကွေးကျသွားတယ်၊ ရိုက်နှက်တာလည်း ခံရတယ်” ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

လုယက်ခံရသည့် အမျိုးသမီး၏ အော်ဟစ်အကူအညီတောင်းဆိုမှုများကြောင့် ပတ်ဝန်းကျင်ရှိ ရပ်ကွက်တွင်း လုံခြုံရေးယူနေသည့် ပြည်သူ့စစ်နှစ်ဦးမှ သေနတ်ပစ်ဖောက်ရာ လုယက်သူကို မထိဘဲ လမ်းဘေးတွင် ရှိနေသည့် အမျိုးသားတစ်ဦးကို ကျည်ထိမှန်ကာ သေဆုံးသွားရကြောင်း သိရသည်။

“ပြည်သူ့စစ်က သေနတ်ပစ်လိုက်တာ လမ်းဘေးရပ်နေတဲ့ စုံတွဲထဲက အမျိုးသားကို ကျည်ထိသွားတယ်၊ သူတို့က ဒီအတိုင်းလမ်းသွားလမ်းလာရင်းနဲ့ သူတို့ရှေ့မှာ လုယက်မှုဖြစ်တော့ ဆက်မသွားပဲ အခြေအနေကို ရပ်ကြည့်နေ တယ်လို့ထင်ရတယ်၊ သူ့ခေါင်းပိုင်းကို ကျည်ထိပြီး ပွဲချင်းပြီးသေပါတယ်” ဟု အထက်ပါ အမျိုးသားက ပြောသည်။

ပြည်သူ့စစ်တပ်ဖွဲ့ဝင်တို့၏ ပစ်ခတ်မှုကြောင့် အသက် (၂၀) ကျော် အပြစ်မဲ့ ပြည်သူတစ်ဦး အသက်ဆုံးရှုံးခဲ့ ရသော်လည်း လုယက်မှု ပြုလုပ်သည့် အမျိုးသားနှစ်ဦးကို ဖမ်းဆီးနိုင်ခြင်းမရှိသည့် အပြင် အမျိုးသမီး၏ ဆွဲကြိုးလည်း ဆုံးရှုံးလိုက်ရကြောင်း သိရသည်။

ထို့အပြင် ဆွဲကြိုးလုယက်ခံရစဥ် ရိုက်နှက်မှုပါ ခံရသည့်အတွက် အဆိုပါ အမျိုးသမီးက ထိခိုက်ဒဏ်ရာများ ရရှိသွားကြောင်းလည်း သိရသည်။

မူဆယ်မြို့သည် တိုင်းရင်းသားလက်နက်ကိုင် တပ်ဖွဲ့များ စုံလင်များပြားလှသည့်အပြင် အဖွဲ့အစည်းများလည်း စုံလင်သည့်အတွက် မူးယစ်ဆေးဝါးများ၊ လောင်းကစားဝိုင်းများ၊ လုယက်ဓားပြတိုက်မှုများနှင့် တခြား တရားမဝင် လုပ်ရပ်များ မကြာခဏ ဖြစ်ပွားလေ့ရှိသည့် ဒေသဖြစ်ကြောင်းလည်း သိရသည်။

ထို ဖြစ်ပွားခြင်းနှင့် ပက်သက်ပြီး မူဆယ်မြို့၏ လက်ရှိအခြေအနေများသည် အိမ်အပြင်ထွက် သွားလာခြင်းအပြင် အိမ်တွင်းရှိနေသော်လည်း လုံခြုံမှု မရှိသလို ခံစားနေရကြောင်း မူဆယ်မြို့တွင်း ရပ်ကွက်နေ အမျိုးသမီးတစ်ဦးက သျှမ်းသံတော်ဆင့်ကို ပြောဆိုထားသည်။

ပြည်သူ့စစ်တပ်ဖွဲ့ဝင်တို့၏ ပစ်ခတ်မှုကြောင့် အပြစ်မဲ့ ပြည်သူ အမျိုးသားတစ်ဦး သေဆုံးခဲ့ရခြင်းနှင့် လုယက်သူတို့၏ နောက်ဆက်တွဲသတင်းများနှင့် ပက်သက်ပြီး နောက်ဆက်တွဲ တာဝန်ယူမှု တာဝန်ခံမှုများကို သျှမ်းသံတော်ဆင့်မှ ဆက်လက်စုံစမ်းလျက်ရှိနေပါသည်။