သျှမ်းပြည်တောင်ပိုင်းတွင် ကား၊ ဆိုင်ကယ် အရောင်းအဝယ်လုပ်သူ နှစ်ဉီး တိုက်ခိုက်ခံရပြီး တစ်ဉီး သေဆုံးပြီးနောက် ကားအရောင်းအဝယ် လုပ်သူများ အိမ်တိုင်ရာရောက် ပို့ဆောင်ပေးသည့် ဝန်ဆောင်မှု မပြုလုပ်ရဲတော့ကြောင်း သတင်းရရှိသည်။

တောင်ကြီးမြို့နှင့် အေးသာယာမြို့ရှိ ဆိုင်ကယ်နှင့် ကားအရောင်းဆိုင်များသည် စစ်အာဏာသိမ်းပြီးနောက်ပိုင်း ခေတ်ကာလ အခြေအနေအရ အွန်လိုင်းလူမှုကွန်ရက် စာမျက်နှာပေါ်တွင် ကြော်ငြာရောင်းချပြီး အိမ်တိုင်ရာရောက် ပို့ဆောင်ပေးသည့် ဝန်ဆောင်မှု ပြုလုပ်ခဲ့သည်။

ပြီးခဲ့သည့် ဖေဖော်ဝါရီလ ၁၄ ရက်တွင် အေးသာယာမြို့၌ နေထိုင်သည့် ကားအရောင်းအဝယ် ပြုလုပ်သူ ညီအစ်ကိုနှစ်ဉီး ဓားထိုးခံရပြီး အသက် ၂၀ အရွယ်ရှိ လူငယ်တစ်ဦးမှာ အဆိုပါ ဓားဒဏ်ရာဖြင့် သေဆုံးခဲ့ကြောင်း တောင်ကြီးဒေသခံများထံမှ သိရသည်။

ထိုဖြစ်စဉ် ဖြစ်ပွားပြီးနောက် ကားအရောင်းအဝယ် လုပ်ဆောင်နေသူ အမျိုးသားတစ်ဉီးက “ဟိုတလောက တစ်ယောက် အသတ်ခံရပြီး ကားလာပြဖို့ ခေါ်ရင် မသွားတော့ဘူး။ လမ်းမှာ ဆိုင်ကယ် စီးသွားရင်တောင် ဘယ်အချိန် အလုခံရမလဲ စိတ်ပူနေရတယ်။ ခေတ်ကလည်း မကောင်းတော့ဘူး၊ ဘာမှ လုံခြုံတယ်လို့ မခံစားရတော့ဘူး”ဟု ပြောသည်။

ထို့အပြင် လိုင်စင်မဲ့ ကားနှင့် ဆိုင်ကယ်များကို အွန်လိုင်းပေါ်တွင် တင်ရောင်းလျှင်လည်း စစ်ကော်မရှင် လက်အောက်ခံ ရဲများက စုံစမ်းပြီး ကားဝယ်မည်ဟုဆို၍ အသွင်ယူ ဖမ်းဆီးမှုများလည်း ရှိနေကြောင်း သိရသည်။

“အခုက လုယက်မှု ကြောက်ရသလို အွန်လိုင်းမှာလည်း ရဲတွေကို ကြောက်ရတယ်။ နောက်ပြီး မသမာတဲ့ လူတွေကိုလည်း ကြောက်နေရတယ်” ဟု တောင်ကြီးဒေသခံ ၎င်းအမျိုးသားက ထပ်လောင်းပြောသည်။

ဆက်လက်ပြီး တောင်ကြီး-ကလော ပြည်ထောင်စုလမ်းမကြီးတွင် ဆိုင်ကယ် လုယက်သူများ ရှိနေသောကြောင့် တစ်ယောက်တည်း ဆိုင်ကယ်မစီးသွားသင့်ကြောင်း ဒေသခံများက အသိပေးထားသည်။

“ယောကျာ်းလေးဖြစ်ဖြစ် မိန်းကလေးဖြစ်ဖြစ် တစ်ယောက်တည်း ဆိုင်ကယ် မစီးသွားသင့်တော့ဘူး၊ ခေတ်ကြီးက လုံခြုံတာ မဟုတ်ဘူး။ နေရာတိုင်းမှာ လူစိမ်းတွေ အပြည့်ပဲ၊ ဘယ်သူ့မှ ယုံလို့ မရတော့ဘူး။ ခုတလောက ဆိုင်ကယ်၊ ကား လုခံရတာ ခပ်စိပ်စိပ် ကြားလာရတယ်”ဟု တောင်ကြီးဒေသခံ အမျိုးသားတစ်ဦးက ပြောသည်။

ပြီးခဲ့သည့် ဖေဖော်ဝါရီလ ပထမပတ်အတွင်း ကလော-တောင်ကြီး လမ်းပိုင်းတွင် သက်လတ်ပိုင်းအရွယ် အမျိုးသားအုပ်စုက ခရီးသွားရင်း ဆိုင်ကယ် ပျက်နေသည်ဟုဆို၍ လမ်းတွင်လာသည့် ကားတစ်စီးကို တားပြီး အကူအညီတောင်းဟန်ဖြင့် ကားလုယက်သွားကြောင်း ဒေသခံများထံမှ သိရသည်။