အာဏာသိမ်းသမ္မတ ဦးမင်းအောင်လှိုင်သည် ကမ္ဘောဒီးယားနိုင်ငံ၏ ဖိတ်ကြားချက်အရ ယနေ့ စက်တင်ဘာလ ၁၁ ရက် နံနက်ပိုင်းတွင် ကမ္ဘောဒီးယားနိုင်ငံသို့ နိုင်ငံတော်အဆင့် ချစ်ကြည်ရေးခရီးစဉ် စတင်ထွက်ခွာသွားခဲ့သည်။

ယခုကမ္ဘောဒီးယားခရီးစဉ်သည် ဦးမင်းအောင်လှိုင် သမ္မတအဖြစ် တာဝန်ယူပြီးနောက်ပိုင်း ဒေသတွင်း အင်အားကြီး နိုင်ငံများထံမှ သံတမန်ရေးရာ အသိအမှတ်ပြုမှုရရှိရန် ကြိုးပမ်းသည့် ၈ နိုင်ငံမြောက် နိုင်ငံခြားခရီးစဉ် ဖြစ်သည်။

ဦးမင်းအောင်လှိုင်သည ယခင်က အိန္ဒိယ၊ တရုတ်၊ ရုရှား၊ ဘီလာရုစ်၊ လာအို၊ ထိုင်းနှင့် ဗီယက်နမ်နိုင်ငံများသို့ သွားရောက်ခဲ့သည်။

နှစ်ရက်ကြာမည့် ခရီးစဉ်အတွင်း ကမ္ဘောဒီးယားနိုင်ငံ အထက်လွှတ်တော်ဥက္ကဋ္ဌ၊ ယာယီနိုင်ငံခေါင်းဆောင် ဟွန်ဆန်၊ ဝန်ကြီးချုပ် ဟွန်မာနက်တို့နှင့် တွေ့ဆုံကာ နှစ်နိုင်ငံဆက်ဆံရေး ပိုမိုအားကောင်းလာစေရန်၊ အပြန်အလှန် အကျိုးစီးပွားဖြစ်ထွန်းစေမည့် ပူးပေါင်းဆောင်ရွက်မှုများ တိုးချဲ့ရန်နှင့် ဒေသတွင်းနှင့် နိုင်ငံတကာရေးရာများအပေါ် အမြင်ချင်းဖလှယ် ဆွေးနွေးသွားမည်ဖြစ်ကြောင်း ကမ္ဘောဒီးယားနိုင်ငံခြားရေးဝန်ကြီးဌာနက ထုတ်ပြန်သည်။

ကမ္ဘောဒီးယားနိုင်ငံအနေဖြင့် ဦးမင်းအောင်လှိုင်ကို တရားဝင် နိုင်ငံတော်အဆင့် ကြိုဆိုခြင်းမပြုသင့်ဘဲ အပြည်ပြည်ဆိုင်ရာ ရာဇဝတ်ခုံရုံး (ICC) အဖွဲ့ဝင် နိုင်ငံတစ်ခုအနေဖြင့် တာဝန်များကို လိုက်နာရန် လိုအပ်ကြောင်း နိုင်ငံတကာလူ့အခွင့်အရေးအဖွဲ့ဖြစ်သည့် Fortify Rights က ခရီးစဉ်မတိုင်မီ တောင်းဆိုထားသည်။