မြန်မာနိုင်ငံအတွင်း နိုင်ငံရေးမတည်ငြိမ်မှုနှင့် တိုက်ပွဲဖြစ်ပွားမှုကြောင့် စီးပွားရေး အကြီးအကျယ် ကျဆင်းနေချိန်တွင် အာဏာသိမ်းသမ္မတ ဦးမင်းအောင်လှိုင်သည် ဗီယက်နမ်နိုင်ငံသို့ သွားရောက်ကာ မြန်မာနိုင်ငံရှိ အထူးစီးပွားရေးဇုန်များနှင့် စိုက်ပျိုးရေးကဏ္ဍများတွင် လာရောက်ရင်းနှီးမြှုပ်နှံရန် ဗီယက်နမ်လုပ်ငန်းရှင်များကို ဖိတ်ခေါ်လိုက်သည်။

ယမန်နေ့ စက်တင်ဘာလ ၆ ရက်က ဗီယက်နမ်နိုင်ငံ ဟနွိုင်းမြို့ရှိ Melia Hotel တွင် ကျင်းပသည့် မြန်မာ-ဗီယက်နမ် စီးပွားရေးဖိုရမ်၌ အာဏာသိမ်းသမ္မတ ဦးမင်းအောင်လှိုင်က ယင်းသို့ ပြောကြားခဲ့ခြင်းဖြစ်သည်။

အဆိုပါ ဖိုရမ်သို့ နှစ်နိုင်ငံမှ စီးပွားရေးလုပ်ငန်းရှင် ၆၀၀ ခန့် တက်ရောက်ခဲ့ကြောင်း သိရသည်။

ဦးမင်းအောင်လှိုင်က မြန်မာနိုင်ငံသည် တရုတ်၊ အိန္ဒိယနှင့် အရှေ့တောင်အာရှကို ဆက်သွယ်ပေးသည့် အချက်အချာနေရာတွင် ရှိနေပြီး သီလဝါ၊ ကျောက်ဖြူနှင့် ထားဝယ် အထူးစီးပွားရေးဇုန်များတွင် ရင်းနှီးမြှုပ်နှံရန် အခွင့်အလမ်းများစွာ ရှိသည်ဟု ဆိုသည်။

အထူးသဖြင့် အရှေ့-အနောက် စီးပွားရေးစင်္ကြံ (EWEC) လမ်းကြောင်းပေါ်ရှိ သီလဝါဇုန်သည် ဗီယက်နမ်နိုင်ငံနှင့် တိုက်ရိုက်ချိတ်ဆက်နိုင်မည်ဖြစ်ကြောင်း ၎င်းက ပြောဆိုခဲ့သည်။

သို့သော်လည်း လက်ရှိတွင် မြန်မာနိုင်ငံတဝှမ်း၌ တိုက်ပွဲများ ပြင်းထန်နေခြင်း၊ လျှပ်စစ်မီး မမှန်ခြင်း၊ ကုန်ဈေးနှုန်းနှင့် ငွေကြေးဖောင်းပွမှုဒဏ်များကြောင့် ပြည်တွင်းရှိ လုပ်ငန်းရှင်အများစုမှာ လုပ်ငန်းများ ရပ်နားထားရသကဲ့သို့ နိုင်ငံခြားရင်းနှီးမြှုပ်နှံမှုများလည်း ထွက်ခွာနေသည့် အခြေအနေနှင့် ရင်ဆိုင်နေရသည်။

ဗီယက်နမ် ဒုတိယဝန်ကြီးချုပ် Nguyen Van Thang ကမူ စီးပွားရေးလုပ်ငန်းရှင်များ ကြုံတွေ့နေရသည့် အခက်အခဲများကို နှစ်နိုင်ငံအစိုးရချင်း ပူးပေါင်းဖြေရှင်းရန်နှင့် ရေရှည်တည်တံ့သော စီးပွားရေး ဖြစ်ထွန်းလာရန် တိုက်တွန်းခဲ့သည်။

ယခုခရီးစဉ်အတွင်း စစ်ကောင်စီနှင့် ဆက်စပ်နေသည့် ဆက်သွယ်ရေးလုပ်ငန်းတစ်ခုဖြစ်သည့် Mytel ကိုလည်း နှစ်နိုင်ငံပူးပေါင်းဆောင်ရွက်မှု၏ စံနမူနာအဖြစ် ဖော်ပြခဲ့ကြသည်။

ထို့ပြင် အိန္ဒိယ-မြန်မာ-ထိုင်း သုံးနိုင်ငံ အဝေးပြေးလမ်းမကြီးနှင့် အာဆီယံစီးပွားရေးစင်္ကြံတစ်လျှောက် အခြေခံအဆောက်အအုံဆိုင်ရာ လုပ်ငန်းများတွင် ဗီယက်နမ်လုပ်ငန်းရှင်များ လာရောက်ရင်းနှီးမြှုပ်နှံရန် စစ်ကောင်စီဘက်က ဖိတ်ခေါ်ခဲ့သည်။