ချင်းရိုင်ခရိုင်၊ မယ်ချန် (Mae Chan) နယ်မြေအတွင်း ဆယ်ကျော်သက်လူငယ်များကို ဘတ်ငွေ ၁၂,၀၀၀ ဖြင့် ငှားရမ်းကာ မူးယစ်ဆေးဝါးသယ်ဆောင်ခိုင်းသည့် သံသယရှိသူ ၄ ဦးနှင့်အတူ ဘတ်သန်းနှင့်ချီတန်ဖိုးရှိ စိတ်ကြွဆေးပြား ၅ သိန်းကျော်နှင့် ကီတမင်း ၁၀ ကီလိုဂရမ်ကို သိမ်းဆည်းရမိခဲ့ကြောင်း ချင်းမိုင်သတင်းတွင်ဖော်ပြသည်။

ဇွန်လ ၈ ရက်နေ့ နံနက် ၇ နာရီခန့်တွင် မယ်ချန်နယ်မြေ၊ Chom Sawan တိုက်နယ်ရှိ လမ်းမတစ်ခုပေါ်၌ ရဲတပ်ဖွဲ့က စစ်ဆေးရေးဂိတ်ဖွင့်လှစ်ထားစဉ် သံသယဖြစ်ဖွယ် ဆိုင်ကယ်တစ်စီးဖြင့် တွေ့ရသည်။

ဆိုင်ကယ်မောင်းနှင်သူသည် ရဲတပ်ဖွဲ့ကို မြင်သည့်အခါ လမ်းဘေးခြုံပုတ်ထဲသို့ အိတ်တစ်အိတ် လွှင့်ပစ်ကာ လှည့်ပြန်မောင်းနှင်ထွက်ပြေးရန် ကြိုးပမ်းခဲ့သဖြင့် ရဲအရာရှိများက နောက်မှ လိုက်လံဖမ်းဆီးခဲ့သည်။

ထိုလွှင့်ပစ်ခဲ့သည့် အိတ်အတွင်းမှ ယာဘဆေးပြား ၂၀၀,၀၀၀ ခန့် ကို သိမ်းဆည်းရမိခဲ့သည်။

ဖမ်းဆီးရမိသူလူငယ်နှစ်ဦးမှာ အသက် ၁၄ နှစ်အရွယ် ၁၆ နှစ်အရွယ်သာရှိသေးကြောင်းသိရသည်။

၎င်းတို့အား စစ်ဆေးမေးမြန်းရာတွင် မယ်ဆိုင်မှ “စရွိုင်း” (Sroi) ဟုခေါ်သည့် အမျိုးသမီးတစ်ဦးက မယ်ဆိုင်ရှိ ဘန်ချောင်မှ မူးယစ်ဆေးဝါးများကို ဘန်ဒူးတိုက်နယ်ရှိ Huay Pla Kang Temple ဘုရားကျောင်းရှေ့သို့ သယ်ဆောင်ပေးရန် တစ်ခေါက်လျှင် ထိုင်းဘတ် ၁၂,၀၀၀ ဖြင့် ငှားရမ်းခဲ့ခြင်းဖြစ်ကြောင်း ဝန်ခံခဲ့သည်။

၎င်းတို့သည် ရဲဂိတ်များကို ရှောင်ကွင်းရန် ကျေးလက်လမ်းဘေးလမ်းများကို အသုံးပြုမောင်းနှင်လာခဲ့ခြင်းဖြစ်ပြီး၊ ယခုမတိုင်မီကလည်း တစ်ကြိမ် အောင်မြင်စွာ သယ်ဆောင်ပေးခဲ့ဖူးကြောင်း ထွက်ဆိုခဲ့သည်။

မယ်ချန်ရဲတပ်ဖွဲ့သည် ချင်းရိုင်ခရိုင်ဥပဒေစိုးမိုးရေးအဖွဲ့၊ ဘန်ဒူးရဲတပ်ဖွဲ့တို့နှင့် ချက်ချင်းပူးပေါင်းကာ နံနက် ၁၀ နာရီခန့်တွင် မူးယစ်ဆေးဝါး လွှဲပြောင်းရယူမည့် ဘုရားကျောင်းအနီး၌ စောင့်ဆိုင်းခဲ့သည်။ ပစ္စည်းလာရောက်ယူဆောင်သည့် ဆိုင်ကယ်နှစ်စီးအနက် တစ်စီးကို ပိတ်ဆို့ကာ အသက် ၁၇ နှစ်အရွယ် နှင့် အသက် ၂၃ နှစ်အရွယ် လူငယ် ၂ ဦး တို့ကို ထပ်မံဖမ်းဆီးနိုင်ခဲ့သည်။

သံသယရှိသူများ၏ ထွက်ဆိုချက်အရ ၎င်းတို့သည် မူးယစ်ဆေးဝါးများကို မယ်ယောင်း (Mae Yao) တိုက်နယ်၊ Ban Thung Luang ရှိ “အာချာ” (Ah-Cha) (သို့မဟုတ်) “နိုင်စွန်” (Nai Song) ဆိုသူ၏ တိုက်ခန်းတွင် သိုလှောင်ရန် လာရောက်ယူဆောင်ခြင်း ဖြစ်ကြောင်း သိရသည်။

ရဲတပ်ဖွဲ့က အဆိုပါ တိုက်ခန်းကို ချက်ချင်း ဝင်ရောက်စီးနင်း ရှာဖွေခဲ့ရာ အခန်းအတွင်း ဝှက်ထားသည့် ယာဘဆေးပြား ၃၇၀,၀၀၀၊ အဖြူရောင်ပုံဆောင်ခဲ ကီတမင်း ၁၀ ကီလိုဂရမ် တို့ကို သိမ်းဆည်းရမိခဲ့သည်။

ရဲတပ်ဖွဲ့က ၎င်းတို့ ၄ ဦးစလုံးကို ခွင့်ပြုချက်မရှိဘဲ ဖြန့်ဖြူးရောင်းချရန်အတွက် မူးယစ်ဆေးဝါး လက်ဝယ်ထားရှိမှု၊ အမျိုးသားလုံခြုံရေးနှင့် အများပြည်သူကို ဘေးအန္တရာယ်ဖြစ်စေသည့် ကုန်သွယ်မှုမြောက်ခြင်းတို့ဖြင့် စွဲချက်တင်ထားပြီး၊ လွတ်မြောက်နေဆဲဖြစ်သော ဂိုဏ်းခေါင်းဆောင်များနှင့် ကွန်ရက်တစ်ခုလုံးကို အမြစ်ပြတ်ချေမှုန်းနိုင်ရန် အထူးလုပ်ငန်းအဖွဲ့ဖြင့် ဆက်လက် ခြေရာခံလျက် ရှိကြောင်း သိရသည်။

ကိုးကား – Chiang Mai News