ချင်းမိုင်မြို့ရှိ ဈေးသည်ဇနီးမောင်နှံနှစ်ဦးသည် မိသားစုနှင့်အတူ မူကထ အကင် သွားရောက်စားသုံးစဉ် “ဟွိုင်ဝမ်” ဟုခေါ်သော ပင်လယ်ခရုအတွင်းမှ ကမ္ဘာ့အရှားပါးဆုံးနှင့် တန်ဖိုးအကြီးဆုံးစာရင်းဝင် “မီလိုပုလဲ” ဟု ယူဆရသည့် လိမ္မော်ရောင်ပုလဲတစ်လုံးကို ထူးထူးခြားခြား တွေ့ရှိခဲ့ကြောင်း ချင်းမိုင်သတင်းတွင်ဖော်ပြသည်။

ချင်းမိုင်မြို့ Siriwattana ဈေး မှ ဈေးသည်အမျိုးသမီး ချာလီတာ (Ms. Chalita Phueakcharoen) ၏ ပြောပြချက်အရ ပြီးခဲ့သည့် မတ်လ ၁၉ ရက်နေ့က ၎င်းတို့ဇနီးမောင်နှံနှင့် ကလေးငယ်သည် မယ်ရင် (Mae Rim) ရှိ မူကထ ဘူဖေးဆိုင်တစ်ဆိုင်သို့ သွားရောက်စားသုံးခဲ့ကြသည်။

ခရုကင်နေစဉ်အတွင်း ချာလီတာက ၎င်း၏ခင်ပွန်းအား “ကံကောင်းလို့ ပုလဲလေးဘာလေး အထဲကတွေ့ရင် အကြွေးတွေအကုန် ဆပ်လို့ရမှာပဲ” ဟု နောက်ပြောင်ပြောဆိုခဲ့ရာ၊ ပြောပြီးပြီးချင်းမှာပင် ခင်ပွန်းဖြစ်သူက ခရုကင်ကို ဝါးမိရာမှ မာကျောသောအရာတစ်ခုကို ကိုက်မိပြီး ပြန်ထွေးထုတ်ခဲ့သည်။

ထိုအရာမှာ ခဲလုံးမဟုတ်ဘဲ လုံးဝန်းပြောင်လက်နေသည့် ပဲစေ့ခန့်အရွယ်အစားရှိ ထူးခြားသော လိမ္မော်ရောင် အရာဝတ္ထုတစ်ခု ဖြစ်နေသဖြင့် မီလိုပုလဲဖြစ်နိုင်ကြောင်း ချက်ချင်း သံသယဝင်ခဲ့ကြသည်။

၎င်းဈေးသည်အမျိုးသမီးသည် ပြည်တွင်းပြည်ပသတင်းများကို စဉ်ဆက်မပြတ် ဖတ်ရှုလေ့ရှိသူဖြစ်သဖြင့် ၎င်းပုလဲ၏ ထူးခြားသော ပုံသဏ္ဍာန်နှင့် တောက်ပမှုကို ကြည့်ကာ မီလိုပုလဲအစစ်အမှန်ဖြစ်မည်ဟု ယုံကြည်နေသည်။

လက်ရှိတွင် ၎င်းပုလဲအား တရားဝင်ကျောက်မျက်ရတနာ အသိအမှတ်ပြုချက်ရယူနိုင်ရန် ထိုင်းနိုင်ငံ ကျောက်မျက်နှင့် ရတနာကုမ္ပဏီအဖွဲ့ (GIT) သို့မဟုတ် အခြားသော ကျွမ်းကျင်သူများထံ ပေးပို့စစ်ဆေးရန် ပြင်ဆင်လျက်ရှိသည်။

မီလိုပုလဲအစစ်အမှန်အဖြစ် စစ်ဆေးတွေ့ရှိပါက မိသားစု၏ အကြွေးများကို ဆပ်နိုင်ရန်အတွက် စိတ်ဝင်စားသည့် စုဆောင်းသူများထံ ချက်ချင်း ပြန်လည်ရောင်းချသွားရန် အသင့်ရှိကြောင်း သိရသည်။

မီလိုပုလဲများသည် လူသားများက မွေးမြူဖန်တီး၍မရဘဲ ပင်လယ်ခရုများမှ သဘာဝအတိုင်းသာ ဖြစ်တည်လာသည့် ကမ္ဘာပေါ်တွင် အရှားပါးဆုံးနှင့် စျေးအကြီးဆုံး ကျောက်မျက်ရတနာများ ဖြစ်ကြသည်။

၎င်းတို့၏ ထူးခြားချက်မှာ ကြွေထည်ကဲ့သို့ ပြောင်လက်ချောမွေ့ပြီး မျက်နှာပြင်ပေါ်တွင် “မီးတောက်ကဲ့သို့” အရောင်အဆင်းများ ရှိနေတတ်ခြင်း ဖြစ်သည်။

အရောင်အသွေးအားဖြင့် အဝါဖျော့၊ အညိုရောင်မှသည် လိမ္မော်ရောင်အထိ ရှိတတ်ပြီး၊ ကမ္ဘာတစ်ဝန်းရှိ ကျောက်မျက်စုဆောင်းသူများ အလိုချင်ဆုံးနှင့် တန်ဖိုးအမြင့်မားဆုံးအရောင်မှာ မှည့်နေသော သင်္ဘောသီးအရောင်ကဲ့သို့ စူးရှတောက်ပသည့် လိမ္မော်ရောင် ဖြစ်ကြောင်း သိရသည်။

ကိုးကား – Chiang Mai News