ချင်းမိုင်မြို့ မြန်မာနိုင်ငံသားတစ်ဦး တရားမဝင် အလှပြင်ဆိုင်ဖွင့်လှစ်ကာ လုပ်ကိုင်နေကြောင်း ပြည်သူလူထု၏ သတင်းပေးချက်အရ သက်ဆိုင်ရာပူးပေါင်းအဖွဲ့က ဝင်ရောက်စီးနင်းခဲ့ပြီး၊ ခွင့်ပြုချက်ထက် ကျော်လွန်လုပ်ကိုင်မှုဖြင့် မြန်မာလုပ်သားတစ်ဦးနှင့် အလုပ်ရှင်ကို ဖမ်းဆီးအရေးယူလိုက်ကြောင်း ချင်းမိုင်သတင်းတွင်ဖော်ပြသည်။

ယနေ့ (မေလ ၂၆ ရက်) နံနက် ၁၁ နာရီခန့်တွင် ချင်းမိုင်မြို့ အလုပ်အကိုင်ရှာဖွေရေးရုံးနှင့် ချင်းမိုင်လူဝင်မှုကြီးကြပ်ရေး၊ စုံစမ်းစစ်ဆေးရေးအဖွဲ့များ ပူးပေါင်းကာ ပါဒက် တိုက်နယ်ရှိ အဆိုပါ စီးပွားရေးလုပ်ငန်းကို ရှောင်တခင် ဝင်ရောက်စစ်ဆေးခဲ့သည်။

စစ်ဆေးမှုအတွင်း အလုပ်ရှင် ထိုင်းနိုင်ငံသား ၁ ဦးနှင့် နိုင်ငံခြားသား မြန်မာလုပ်သား ၁ ဦးတို့ကို ဖမ်းဆီးခဲ့သည်။

အာဏာပိုင်များ၏ စစ်ဆေးချက်အရ မြန်မာနိုင်ငံသား လုပ်သားမှာ ခွင့်ပြုထားသော အခွင့်အရေးအတိုင်းအတာထက် ကျော်လွန်၍ လုပ်ကိုင်ခြင်း၊ အလုပ်ရှင်ကို နိုင်ငံခြားသားတစ်ဦးအား ခွင့်ပြုထားသော အခွင့်အရေးအတိုင်းအတာထက် ကျော်လွန်၍ အလုပ်လုပ်ကိုင်ခွင့်ပြုခြင်း စသည့် ဥပဒေများဖြင့် အရေးယူထားကြောင်းသိရသည်။

ထိုင်းနိုင်ငံ၏ တည်ဆဲဥပဒေအရ ၎င်းဥပဒေချိုးဖောက်မှုများအတွက် ပြစ်ဒဏ်များမှာ ဘတ် ၅,၀၀၀ မှ ၅၀,၀၀၀ အထိ ဒဏ်ငွေချမှတ်ခံရနိုင်သည့်အပြင် မိမိနိုင်ငံသို့ ပြည်နှင်ဒဏ် (Deportation) ပေးခြင်း ခံရနိုင်သည်။

ထိုင်း အလုပ်ရှင်များအနေဖြင့် တရားမဝင်လုပ်သား ခန့်ထားလျှင် တစ်ဦးလျှင် ဘတ် ၁၀,၀၀၀ မှ ၁၀၀,၀၀၀ အထိ ဒဏ်ငွေဆောင်ရမည် ဖြစ်သည်။

အကယ်၍ ထပ်မံပြစ်မှုကျူးလွန်ပါက ရာဇဝတ်ကြောင်းအရ တရားစွဲဆိုခံရမည့်အပြင် နိုင်ငံခြားသားလုပ်သား ငှားရမ်းခွင့်ကိုပါ ယာယီပိတ်ပင်သွားမည် ဖြစ်သည်။

လက်ရှိတွင် ဖမ်းဆီးရမိသူ နှစ်ဦးစလုံးကို ဥပဒေလုပ်ထုံးလုပ်နည်းအတိုင်း ထိရောက်စွာ အရေးယူနိုင်ရန် ချင်းမိုင်ရဲစခန်းမှ စုံစမ်းစစ်ဆေးရေးအရာရှိများထံ လွှဲပြောင်းအပ်နှံထားပြီး ဖြစ်သည်။

ချင်းမိုင်ပြည်နယ် အလုပ်အကိုင်ရှာဖွေရေးရုံးကလည်း လုပ်ငန်းရှင်များအနေဖြင့် နိုင်ငံခြားသားလုပ်သား ငှားရမ်းခြင်းဆိုင်ရာ ဥပဒေများကို တိကျစွာလိုက်နာကြရန် အလေးအနက် သတိပေးထားပြီး၊ မိမိတို့ပတ်ဝန်းကျင်တွင် ဥပဒေချိုးဖောက်သည့် သဲလွန်စများတွေ့ရှိလျှင် သက်ဆိုင်ရာဌာနများထံ ချက်ချင်း သတင်းပေးပို့ကြရန် ပြည်သူလူထုကို တိုက်တွန်းထားသည်။

ကိုးကား – เสพข่าวเชียงใหม่ (Chiang Mai News)