သျှမ်းပြည် ဆီဆိုင်မြို့နယ်တွင် မိုးကြိုးစက်ကွင်း ထိမှန်ခြင်းကြောင့် နွားအကောင်ရေ ၅၀ ခန့် သေဆုံးခဲ့ကြောင်း စုံစမ်းသိရသည်။

ယမန်နေ့ (မေလ ၂၁ ရက်) နေ့လယ် ၂ နာရီခန့်တွင် ဆီဆိုင်မြို့နယ် ကောင်ဝါးတောင်ရွာရှိ တောင်ယာအနီးတွင် နွားအုပ်လိုက် ကျက်စားနေချိန် မိုးကြိုးစက်ကွင်း ထိမှန်ခဲ့ခြင်းကြောင့် နွား အကောင်ရေ ၅၀ ခန့် သေဆုံးခဲ့ရကြောင်း ဆီဆိုင်မြို့နယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“မနေ့က ဒီဘက်မှာက မိုးတွေလေတွေဆိုတော့ လယ်ယာထဲ လွတ်ထားတဲ့ နွားတွေကို ပြန်စုတဲ့ အချိန်ထင်တယ်။ သစ်ပင်အောက်မှာရှိတဲ့ အဲ့နွား ၄၉ ကောင်လောက်က မိုးကြိုးပစ်လို့ သေသွားတာ။ စုပြီး မွေးထားကြတဲ့ နွားတွေ၊ တချို့ကလည်း ဒီတိုင်း လယ်ယာမှာ သုံးဖို့ မွေးသလို တချို့ကလည်း စီးပွား‌‌ရေးလုပ်ဖို့ မွေးထားကြတာ”ဟု ဆီဆိုင်မြို့နယ် ဒေသခံအမျိုးသားတစ်ဦးက ပြောသည်။

အဆိုပါ မိုးကြိုးပစ်ခံရပြီး သေဆုံးသွားသည့် နွားအကောင်ရေ ၅၀ ခန့်သည် ဆုံးရှုံးမှုတန်ဖိုး သိန်း ၇၀၀ ထပ်မနည်း ရှိနိုင်ပြီး လက်ရှိ နွားတစ်ကောင်၏ ခန့်မှန်းတန်ဖိုးသည် ကျပ် ၁၀ သိန်းမှ ၁၅ သိန်းဝန်းကျင်အထိ ရှိကြောင်း ဒေသခံများထံမှ သိရသည်။

မိုးတွင်းကာလတွင် ကွင်းပြင်၊ တောင်ယာနှင့် သစ်ပင်အောက်တွင် မိုးကြိုးအန္တရာယ် သတိထားရန် လိုအပ်ပြီး တိုက်မြင့် အဆောက်အဦများတွင်လည်း မိုးကြိုးအန္တရာယ် ရှိနိုင်ခြင်းကြောင့် အထူးသတိထားရန် လိုအပ်သည်။