သျှမ်းပြည်အရှေ့ပိုင်းရှိ တရုတ်မြေရှားသတ္တုတွင်းများတွင် လူကုန်ကူးခံထားရသည့် အွန်လိုင်းငွေလိမ်ဂိုဏ်း (ကျားဖြန့်) မှ မြန်မာအလုပ်သမားများကို ကျွန်အဖြစ် အဓမ္မခိုင်းစေနေကြောင်း ရှမ်းလူ့အခွင့်အရေးမဏ္ဍိုင် (SHRF) က မေလ ၁၈ ရက်နေ့တွင် ထုတ်ပြန်ခဲ့သည်။

ထိုင်း-မြန်မာနယ်စပ်အနီး မိုင်းဆတ်မြို့နယ်တောင်ပိုင်းရှိ တရုတ်ကုမ္ပဏီတစ်ခု လုပ်ကိုင်နေသော မြေရှားသတ္တုတွင်းများကို တာချီလိတ်မြို့မှ လူကုန်ကူးခံရသည့် မြန်မာအလုပ်သမားများကို အဓမ္မခိုင်းစေနေခြင်း ဖြစ်ကြောင်း ဆိုသည်။

လွတ်မြောက်လာသူ ကိုသက် (အမည်လွှဲ) ၏ ပြောကြားချက်အရ ၎င်းသည် တာချီလိတ်ရှိ “ဝ”ပြည်သွေးစည်း ညီညွတ်ရေးတပ်မတော် (UWSA) ပိုင် ရောင်နီဦးဝင်းအတွင်းရှိ ကျားဖြန့်ကုမ္ပဏီ၌ အလုပ်လုပ်ကိုင်နေစဉ် မတရားစွပ်စွဲခံရပြီးနောက် မိုင်းယွန်းရှိ တရုတ်မြေရှားသတ္တုတွင်းသို့ ရောင်းစားခံခဲ့ရခြင်း ဖြစ်သည်ဟု ဆိုသည်။

ထိုလူကုန်ကူးမှုဖြစ်စဉ်တွင် စစ်ကော်မရှင်၏ လူကုန်ကူးမှုတားဆီးနှိမ်နင်းရေးရဲတပ်ဖွဲ့မှ ရဲအရာရှိတစ်ဦး ကိုယ်တိုင် ပါဝင်ပတ်သက်နေပြီး ၎င်းတို့အား တာချီလိတ်မှ မိုင်းဆတ်သို့ ပို့ဆောင်ရာတွင် အကူအညီပေးခဲ့ကြောင်း ကိုသက်က ပြောဆိုထားကြောင်း ထုတ်ပြန်ချက်၌ ဖော်ပြထားသည်။

သတ္တုတွင်း၌ ဖမ်းဆီးထားစဉ်အတွင်း ကိုသက်အပါအဝင် အကျဉ်းသား ၃၀ ခန့်ကို UWSA စစ်သားများက စောင့်ကြပ်ကာ သံခြေကျင်းခတ်၍ အလုပ်ကြမ်းများ ခိုင်းစေခဲ့ပြီး ထွက်ပြေးရန် ကြိုးပမ်းသူများကိုလည်း လူအများရှေ့တွင် ရိုက်နှက်နှိပ်စက်ခြင်းများ ပြုလုပ်ခဲ့ကြောင်း သိရသည်။

သျှမ်းပြည်ရှိ သယံဇာတနှင့် မြေယာများကို ရာဇဝတ်ဂိုဏ်းများနှင့် ဆက်နွှယ်နေသော နိုင်ငံခြားရင်းနှီးမြှုပ်နှံသူများထံ လွှဲပြောင်းပေးထားခြင်းသည် အလွန်စိုးရိမ်ဖွယ်ရာ ဖြစ်နေကြောင်း SHRF ၏ ထုတ်ပြန်ချက်တွင် သတိပေးထားသည်။

ထို့အပြင် အဆိုပါသတ္တုတွင်းများသည် ပတ်ဝန်းကျင်ထိန်းသိမ်းရေး စည်းမျဉ်းများကို လုံးဝလိုက်နာခြင်း မရှိဘဲ နယ်စပ်ဖြတ်ကျော် မြစ်ချောင်းများကို အဆိပ်သင့်စေကာ ရေထုညစ်ညမ်းမှုများ ဖြစ်ပေါ်စေလျက်ရှိကြောင်း ဆိုသည်။

ထိုဖြစ်ရပ်သည် စစ်ကော်မရှင်နှင့် လက်နက်ကိုင်အဖွဲ့အစည်းအချို့သည် တရားမဝင် ရာဇဝတ်ဂိုဏ်းများမှတစ်ဆင့် လူငယ်များကို ကျွန်ပြု၍ သယံဇာတများကို အဆမတန် ထုတ်ယူနေခြင်း ဖြစ်ကြောင်း SHRF က ထောက်ပြထားသည်။