ထိုင်းနိုင်ငံ ချင်းမိုင်မြို့ရှိ ချင်းမိုင်တက္ကသိုလ်အနီးတွင် မြန်မာနိုင်ငံသားများ ဦးစီးဖွင့်လှစ်ထားသည့် မျက်မှန်ဆိုင်ကို ထိုင်းရဲတပ်ဖွဲ့က ဝင်ရောက်စီးနင်းခဲ့ပြီး၊ အလုပ်လုပ်ကိုင်ခွင့် (Work Permit) မရှိသည့် မြန်မာနိုင်ငံသား ၅ ဦးကို ဖမ်းဆီးအရေးယူခဲ့ကြောင်း Chiang Mai News တွင်ဖော်ပြသည်။

အဆိုပါစီးနင်းမှုကို ကမ္ဘာလှည့်ခရီးသွားရဲဗျူရို၊ တပ်ဖွဲ့ခွဲ (၂) မှ ရဲမှူး Awirut Sukyaem ဦးဆောင်သည့်အဖွဲ့နှင့် ချင်းမိုင်ခရိုင် အလုပ်အကိုင်ရှာဖွေရေးရုံးတို့ ပူးပေါင်းဆောင်ရွက်ခဲ့ခြင်းဖြစ်သည်။

၎င်းမျက်မှန်ဆိုင်သည် ထိုင်းနိုင်ငံသား ဝန်ဆောင်မှုပေးရန် ငြင်းဆန်နေကြောင်း တိုင်ကြားချက်များ ရရှိခဲ့သဖြင့် ရဲတပ်ဖွဲ့က စုံစမ်းခဲ့ခြင်းဖြစ်သည်။

ရဲအရာရှိများသည် ဖောက်သည်အဖြစ် ဟန်ဆောင်ကာ ဆိုင်သို့သွားရောက်၍ မျက်စိစမ်းသပ်ရန် တောင်းဆိုခဲ့သော်လည်း ဆိုင်ဝန်ထမ်းများက “ဆရာဝန်က ထိုင်းဘာသာစကားဖြင့် မပြောနိုင်” ဟု အကြောင်းပြကာ ဝန်ဆောင်မှုပေးရန် ငြင်းဆန်ခဲ့ပြီး အခြားဆိုင်သို့သာသွားရန် ပြောကြားခဲ့သည်။

ဝန်ဆောင်မှုပေးရန် ငြင်းဆန်ခံရပြီးနောက် တာဝန်ရှိသူများက ဆိုင်အတွင်းသို့ ဝင်ရောက်စစ်ဆေးရာတွင် မျက်စိစမ်းသပ်ခြင်းနှင့် ဆိုင်လုပ်ငန်းများကို လုပ်ကိုင်နေသည့် မြန်မာနိုင်ငံသား ၅ ဦးကို တွေ့ရှိခဲ့ရသည်။

ဖမ်းဆီးရမိသူ ၅ ဦးအနက် တစ်ဦးသည် ကုမ္ပဏီ၏ အုပ်ချုပ်မှုဒါရိုက်တာ (Managing Director) ဟု ဆိုသော်လည်း ခိုင်လုံသော အလုပ်လုပ်ကိုင်ခွင့်လက်မှတ် (Work Permit) တစ်စုံတစ်ရာ မရှိပေ။

အဆိုပါဆိုင်မှာ ဖွင့်လှစ်ထားသည်မှာ (၂) လခန့်ရှိပြီဖြစ်ပြီး၊ ချင်းမိုင်မြို့ရှိ မြန်မာအသိုင်းအဝိုင်းများကြားတွင်သာ အဓိကထား ကြော်ငြာဝန်ဆောင်မှုပေးနေခြင်းဖြစ်သည်။

လက်ရှိတွင် အာဏာပိုင်များက ဖမ်းဆီးရမိသူများကို အောက်ပါပုဒ်မများဖြင့် အမှုဖွင့်ထားသည် –

1. နိုင်ငံခြားသားအလုပ်သမားများ စီမံခန့်ခွဲမှုဆိုင်ရာ ပုဒ်မ ၈: အလုပ်လုပ်ကိုင်ခွင့်လက်မှတ်မရှိဘဲ သို့မဟုတ် ခွင့်ပြုထားသည့် ဘောင်ကျော်လွန်၍ အလုပ်လုပ်ကိုင်မှု။
2. အလုပ်ရှင်အဖြစ် တရားမဝင်လုပ်သားငှားရမ်းမှု: MD အဖြစ် ဆောင်ရွက်သူကို အလုပ်လုပ်ကိုင်ခွင့်မရှိသော နိုင်ငံခြားသားများကို ငှားရမ်းမှုဖြင့် ထပ်ဆောင်းအရေးယူထားသည်။

ဖမ်းဆီးရမိသူ မြန်မာနိုင်ငံသား ၅ ဦးလုံးကို ဆက်လက်အရေးယူနိုင်ရန် ချင်းမိုင်မြို့၊ Chang Phueak ရဲစခန်း သို့ လွှဲပြောင်းအပ်နှံထားကြောင်း သတင်းရရှိသည်။

ကိုးကား – Chiang Mai News