သျှမ်းပြည်တောင်ပိုင်း ရွာငံမြို့နယ် ကျောက်ပိဇပ်ကျေးရွာနှင့် ကိုးဆူကျေးရွာကြားရှိ ပြည်သူပိုင်မြေများကို ခြံခတ်ပြီး သတ္တုပြန်လည်တူးဖော်ရန် ပြင်ဆင်နေကြောင်း သတင်းရရှိသည်။

ပြီးခဲ့သည့် ၂၀၁၀ခုနစ် အစောပိုင်းကာလတွင် ရွာငံမြို့နယ်တွင် အဆိုပါ သတ္တုတွင်းများမှ ခဲ၊ ငွေ စသည့် သတ္တုအမျိုးအစားများကို တူးဖော်ခဲ့ကြပြီး ဒေသခံများ၏ ကန့်ကွက်မှုကြောင့် သော်လည်းကောင်း၊ အခြေအနေ အမျိုးမျိုးကြောင့်သော်လည်းကောင်း တူးဖော်မှု ရပ်ဆိုင်းခဲ့ကြသည်။

ထိုနောက်၂၀၂၆ ဧပြီလ ပထမပတ်မှစ၍ ရွာငံမြို့နယ် ကျောက်ပိဇပ်ရွာနှင့် ကိုးဆူရွာကြားရှိ အဆိုပါ သတ္တုတွင်းဟောင်း အနီးတစ်ဝိုက် ပြည်သူပိုင်ဆိုင်သည့် မြေနေရာများကို ကုမ္ပဏီတစ်ခုမှ ခြံခတ်သွားပြီး သတ္တုတူးဖော်ရန် ပြန်လည်ပြင်ဆင်နေကြောင်း ဒေသခံများက ပြောသည်။

“ဒီသတ္တုတွင်းက မလုပ်တော့တာ ကြာပြီ။ အခုမကြာသေးဘူး အဲနားက မြေတွေကို ခြံလာခတ်ပြီး တွင်းတူးသွားတာ၊ ကျနော့်ခြံလည်း နည်းနည်းတောင် ပါသေးတယ်။ ရွာခံတွေကိုလည်း အသိမပေးဘူး၊ ခြံပိုင်ရှင်တစ်ချို့နဲ့ ပေါင်းပြီး လာလုပ်သွားတာ။ အရင်က တရုတ်ကုမ္ပဏီက လာလုပ်တယ်၊ အခုလည်း တရုတ်တွေလည်း ပါမယ်ထင်တယ်”ဟု ရွာငံဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အဆိုပါ သတ္တုတွင်းကြောင့် ဒေသခံအများစုမှာ ရေအဆိပ်သင့်ခြင်း၊ မြေဆီလွှာပျက်စီးခြင်းများ ဖြစ်ပေါ်မည်ကို စိုးရိမ်သောကြောင့် သဘောတူညီမှု ရယူသင့်ကြောင်း အဆိုပါ အမျိုးသားက ဆက်ပြောသည်။

ယခင် ဆယ်စုနှစ်ကျော်က တူးဖော်ခဲ့သော သတ္တုတွင်းမှာ ဒေသခံများ၏ မြေနေရာကို အနည်းငယ်မျှသာယူ၍ ကျယ်ပြန့်မှုမရှိခဲ့သော်လည်း ယခု ၂၀၂၆ ခုနှစ် ဧပြီလတွင် အဆိုပါသတ္တုတွင်းနေရာကို တူးဖော်ရန် ပြင်ဆင်နေပြီး ပြည်သူများ၏ မြေနေရာကိုပါ ချဲ့ထွင်လာနေကြောင်း သိရသည်။

ထိုသို့ လုပ်ဆောင်ခဲ့သည့် ကုမ္ပဏီကို သျှမ်းသံတော်ဆင့်မှ ဆက်လက်စုံစမ်းနေပြီး သတ္တုတွင်းများကို ပြန်လည်တူးဖော်မည်ဆိုပါက သက်ဆိုင်ရာ အာဏာပိုင်များမှ တာဝန်ယူဖြေရှင်း ပေးစေလိုပြီး ပြည်သူများ၏ ဘဝရှေ့ရေးကိုလည်း ကြည့်ပေးစေလိုကြောင်း ဒေသခံများက တောင်းဆိုသည်။

“ကျမတို့ကတော့ သဘောမတူဘူးပေါ့နော်၊ ဟိုးအရင်က အမေတို့ လက်ထက်တုန်းကဆို သတ္တုလာတူးတုန်းက မြေတွေလည်း ပျက်စီးတယ်။ ရေတွေလည်း မသန့်တာတွေ ကြုံရတယ်၊ ကောင်းကျိုး ဘာမှမရှိဘူး ဆိုတော့ သဘောမတူဘူး။ ဒီပြဿနာကို သက်ဆိုင်ရာ တာဝန်ရှိသူတွေက လာရောက်ဖြေရှင်းပေးစေလိုတယ်”ဟု ရွာငံဒေသခံ အသက် (၃၀)ကျော် အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ခေတ်ကာလ အနေထားအရ နိုင်ငံရေးမတည်ငြိမ်မှုနှင့် ဥပဒေစိုးမိုးမှု မရှိသည်ကို အခွင့်ကောင်းယူပြီး ယခင် ၂၀၁၅ ခုနှစ်တွင် မတူးဖော်လိုက်ရသည့် သတ္တုတွင်းများကို ယခု စစ်ကော်မရှင်လက်ထက်တွင် တရုတ်ကုမ္ပဏီများနှင့် ပူးပေါင်းကာ ပြန်လည်တူးဖော်ရန် ပြင်ဆင်နေခြင်း ဖြစ်ကြောင်း ဒေသခံများက ပြောသည်။

အလားတူ ရွာငံမြို့နယ် ကဇက်ကျေးရွာတွင်လည်း တရားမဝင် မြေနီများကို တူးဖော်၍ (၁၂)ဘီးကားများဖြင့် တင်ဆောင်၍ ကျောက်ဆည်ဘက်သို့ ပို့ဆောင်နေကြောင်း သိရသည်။