သျှမ်းပြည်တောင်ပိုင်း၊ တောင်ကြီးမြို့ ပြည်နယ်အားကစားကွင်း ဘေးပတ်ပတ်လည်တွင် ဖြိုလက်စ တိုက်ခန်း၊ ဆိုင်ခန်းများထဲတွင် စည်းကမ်းမဲ့ အမှိုက်နှင့် မစင်စွန့်ပစ်မှုများကြောင့် အနီးပတ်ဝန်းကျင်မှ ဒေသခံများ အနှောင့်အယှက် ဖြစ်နေကြောင်း စုံစမ်းသိရသည်။

ပြီးခဲ့သည့် မတ်လ(၂၁)ရက်နေ့မှ စတင်ပြီး စစ်ကော်မရှင်လက်အောက်ခံ သျှမ်းပြည်‌နယ် အစိုးရအဖွဲ့မှ ဦးဆောင်ပြီး တောင်ကြီးမြို့ ပြည်နယ်အားကစားကွင်း ပတ်လည်ရှိ ဆိုင်ခန်း၊ တိုက်ခန်းများကို အင်အားသုံးကာ ဖြိုချ ဖျက်ဆီးခဲ့သည်။

ထိုသို့ ဖြိုဖျက်ထားသည့် ဆိုင်ခန်းများထဲတွင် အိမ်ခြေရာမဲ့များနှင့် လမ်းသွားလမ်းလာများမှ မစင်စွန့်ခြင်း၊ အပေါ့သွားခြင်းနှင့် အမှိုက်များ စည်းကမ်းမဲ့ လာရောက်စွန့်ပစ်ခြင်းတို့ကြောင့် အနီးပတ်ဝန်းကျင်ရှိ မြို့ခံများမှာ အနံဆိုးများ အနှောက်အယှက် ဖြစ်နေကြောင်း သိရသည်။

“ဖြိုမယ်ဆိုလည်း အကုန် ဖြိုလိုက်ပေါ့နော်၊ အခုက အမိုးပဲဖြို ဘေးက နဲနဲပဲ ဖြိုပြီး ဒီတိုင်းထားခဲ့တော့ လမ်းဘေးနေသူတွေက အဲထဲမှာ ဝင်အိပ်လိုက် မစင်စွန့်လိုက် အမှိုက်လာပစ်သွားလိုက်ဆိုတော့ အရမ်းနံတယ်။ အဆင်မပြေဘူး ကြာကြာနေရင် ရောဂါရနိုင်တယ်”ဟု တောင်ကြီးမြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထို့အပြင် မြို့ခံများ ကြုံတွေ့နေရသည့် အနံ့ဆိုးပြဿနာကို သက်ဆိုင်ရာ အဖွဲ့အစည်းများက လာရောက်ရှင်းလင်းမှုများ လုပ်ဆောင်ပေးစေလိုကြောင်း အဆိုပါ အမျိုးသမီးက ထပ်လောင်းပြောသည်။

ပြီးခဲ့သည့် မတ်လ (၂၀)ရက်နေ့က အပြီးပြောင်းရွှေ့ခဲ့ရသော အားကစားကွင်းဘေး ပတ်ပတ်လည်မှ ဆိုင်ခန်းပိုင်ရှင်များနှင့် တိုက်ခန်းနေ ပင်စင်စားများမှာ သက်ဆိုင်ရာဌာနမှ စီစဉ်ပေးသော တိုက်ခန်းများတွင် ပြောင်းရွှေ့နေထိုင်နေရပြီး အဆင်မပြေမှုများနှင့် ကြုံတွေ့နေရကြောင်း သိရသည်။

“တချို့ကျတော့လည်း တောင်ကြီးမြို့တွင်းပဲ ဆိုတော့ အဆင်ပြေတာပေါ့၊ ကျနော်တို့က မြို့အစွန်ရောက်သွားတော့ အဆင်မပြေဘူး၊ သူတို့ပေးနေမယ့် တိုက်ခန်းကလည်း ခုထိ ဆောက်လို့ မပြီးသေးတော့ နေစရာက ဖြစ်သလို ရှာနေရတာပေါ့။ မြို့ထဲမှာလည်း အခန်းငှားခတွေက ဈေးအရမ်းကြီးတယ်”ဟု နေရာပြောင်းရွှေ့ခဲ့ရသည့် ဆိုင်ခန်းပိုင်ရှင် အမျိုးသားတစ်ဦးက ပြောသည်။

အဆိုပါ ဈေးဆိုင်ခန်း၊ တိုက်ခန်းများ နေရာတွင် နိုင်ငံတကာ အဆင့်မီ အားကစားကွင်း၊ အားကစားရုံနှင့် ရေကူးကန်၊ လူငယ်ရေးရာ စင်တာများ တည်ဆောက်သွားမည်ဟု အကြောင်းပြပြီး တိုက်ခန်းနေ ပင်စင်စားများကို မတ်လအတွင်း အတင်းအဓမ္မ ဖယ်ရှားခိုင်းခဲ့သည်။