သျှမ်းပြည်မြို့တော် တောင်ကြီးမြို့တွင် သင်္ကြန်ကာလအပြီး လိုင်စင်မဲ့ယာဉ်များ၊ စုံ-မ သတ်မှတ်ချက် မှားယွင်းမှုများ ဖမ်းဆီးနေပြီး ယာဉ်အစီးရေ (၃၀)ကျော် ဖမ်းဆီးခံရကြောင်း သတင်းရရှိသည်။

ယမန်နေ့ (ဧပြီလ ၂၀ ရက်)တွင် တောင်ကြီးမြို့ အရှေ့မြို့ပတ်လမ်း အလယ် ဘီအိုစီ စက်သုံးဆီဆိုင်ရှေ့နှင့် ဗိုလ်ချုပ်လမ်းဘက်တွင် စစ်ကော်မရှင် လက်အောက်ခံ ယာဉ်ထိန်းရဲများနှင့် ရဲတပ်ဖွဲ့ဝင်များက လိုင်စင်မဲ့ယာဉ်နှင့် စုံ၊မ ရက်အလိုက် ယာဉ်များကို ဖမ်းဆီးခဲ့ကြောင်း သိရသည်။

ထိုသို့ ဖမ်းဆီးခံရသည့် ယာဉ်အစီး (၃၀)ကျော်ကို ငွေကြေးဖြင့် ပြန်ရွေးခိုင်းပြီး တစ်ချို့သော ယာဉ်များကို အပြီးသိမ်းဆည်းလိုက်ကြောင်း တောင်ကြီးဒေသခံများက ပြောသည်။

“မနေ့က ဆီသွားတန်းတာ အဲ့နားမှာ ဖမ်းနေတာ အုပ်စုလိုက်ပဲ၊ သူတို့ဖမ်းထားတဲ့ ကားနဲ့ ဆိုင်ကယ်ကို သုံးဆယ်ကျော်လောက် ရှိမယ်။ တချို့ကျတော့ စုံ၊မ ဖမ်းတာဆို ပိုက်ဆံ သုံးသိန်းလောက်ပေးပြီး ပြန်ရွေးရင် ရတယ်လို့ ပြောတယ်။ လိုင်စင်မပါရင်တော့ အကုန်သိမ်းတာတဲ့ ပေးမရွေးတော့ဘူးပြောတယ်”ဟု တောင်ကြီးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထိုသို့ ဖမ်းဆီးနေသောကြောင့် ပြည်သူများ အသွားအလာ သတိပြုကြရန်နှင့် စုံ၊မ ရက်အလိုက်ဆိုင်ကယ်မောင်းနှင်ပြီး သတိဖြင့် သွားလာကြရန် အဆိုပါ အမျိုးသမီးက ဆက်ပြောသည်။

ထို့အပြင် တောင်ကြီးမြို့၌ စက်သုံးဆီဝယ်ယူသည့် စနစ် ပြန်လည် ကန့်သတ်လိုက်သောကြောင့် တစ်ပတ်လျှင် နှစ်ကြိမ်သာ ဆီဖြည့်ခွင့်ရပြီး စုံ၊မ မခွဲပဲ ဆီဖြည့်ခွင့်ရသောကြောင့် ဒေသခံအများစုမှာ ဆီသွားတန်းရာ စုံ၊မ ရက်အလိုက်ပါ အဖမ်းခံနေရကြောင်း သိရသည်။

“သင်္ကြန်မတိုင်ခင်က စုံ၊မ မခွဲဘူး သွားတန်းလို့ရတယ်။ အခုသင်္ကြန်ပြီးတော့ စုံ၊မ ပြန်ဖမ်းနေတာ အရမ်းရှုပ်တယ်။ အရေးကြီးလို့ အပြင်ထွက်မယ်ဆို စုံ၊မ ပြန်စစ်ရအုံးမယ်၊ ဆီကလည်း တစ်ပတ်မှာမှ နှစ်ကြိမ်ဆိုတော့ အဆင်မပြေဘူးလေနော”ဟု တောင်ကြီးမြို့ခံ အမျိုးသားတစ်ဦးက ပြောသည်။

ယခုလက်ရှိ တောင်ကြီးမြို့တွင် စက်သုံးဆီ တစ်လီတာလျှင် အနိမ့်ဆုံး ၅၀၀၀ ကျပ်မှ အမြင့်ဆုံး ၈၅၀၀ အထိ ရှိနေပြီး လိုင်စင်မဲ့ယာဉ်များအတွက် ပြင်ပ ပေါက်ဈေး တစ်လီတာလျှင် ငွေကျပ် တစ်သောင်းခွဲအထိ ရှိနေပြီ ဖြစ်သည်။