သျှမ်းပြည် တောင်ကြီးမြို့နယ် ကျောက်တလုံးကြီးမြို့တွင် ပအိုဝ်းပြည်သူ့စစ်တပ်ဖွဲ့(PNO)မှ ဒေသခံများထံ စစ်မှုထမ်းကြေးအပြင် ၎င်းတို့ပျော်ပါးရန်အတွက်ပါ ငွေကောက်ခံနေကြောင်း သတင်းရရှိသည်။
ပြီးခဲ့သည့် ဇန်နဝါရီလမှစ၍ ကျောက်တလုံးကြီးမြို့နယ်ခွဲတွင် စစ်တပ်လက်အောက်ခံ PNO ပြည်သူ့စစ်အဖွဲ့က ခေါင်းစဉ်အမျိုးမျိုးတပ်ကာ (၆)လတစ်ကြိမ် ငွေကောက်ခံနေပြီး အဆိုပါ ငွေကောက်ခံသည့်ထဲတွင် စစ်ကော်မရှင်တပ်အတွက် လစဉ် စစ်မှုထမ်းကြေးနှင့် သောက်စားပျော်ပါးရန်အတွက်ပါ ငွေထည့်ရသည့်အပြင် ဆောက်လက်စ လူမနေသည့် နေအိမ်များကိုပါ ငွေကောက်ခံနေကြောင်း သိရသည်။
“တိုင်းပြည်က ပျက်စီးနေပြီး ငွေကြေးက ရှာရခက်ပါတယ်ဆို အခွန်အခတွေက များတော့ ပြည်ပမှာ ပင်ပင်ပန်းပန်း အောက်ခြေအလုပ်တွေ လုပ်၊ သူများ ဖိနှိပ်တာခံပြီးမှ ရလာတဲ့ လုပ်အားခကို ရွာအတွက် အခွန်ဆောင်ပေးရတာ။ ကိုယ့်နယ်ကိုယ် ကာကွယ်ပြီး ပြည်သူတွေအတွက် အမှန်တကယ် လုပ်ဆောင်ပေးတဲ့ အဖွဲ့အစည်းဆိုလည်း မဟုတ်ဘူး၊ ခုဟာက ပြည်သူကို အနိုင်ကျင့်ပြီး အတင်းအဓမ္မ ဆက်ကြေးတွေ ပေးဆောင်ခိုင်းနေတာ”ဟု ကျောက်တလုံးကြီးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ပြည်ပတွင် သွားရောက်၍ အလုပ်လုပ်နေသူများသည် အလုပ်၏ဖိအားအပြင် ရပ်ရွာရှိ နေအိမ်မှ လက်နက်ကိုင်တပ်များထံ အခွန်အခ ထပ်မံထည့်ရခြင်းများကြောင့် ဖိအားများပြီး ကိုယ့်ကိုယ်ကိုယ် သေကြောင်းကြံစည်သူများလည်း ရှိကြောင်း ၎င်းအမျိုးသားက ဆက်ပြောသည်။
အလားတူ ဆီဆိုင်မြို့နယ် နောင်ထောဝ်ကျေးရွာဘက်တွင်လည်း စစ်မှုထမ်းကြေးကို (၆)လ တစ်ကြိမ် ကျပ် (၃)သိန်း ပေးဆောင်နေရပြီး တခြားသောအခွန်အခများလည်း PNO ကောက်ခံနေသောကြောင့် အကြိမ်ကြိမ် စုပေါင်းလျှင် ငွေကျပ် (၈)သိန်းနီးပါး ပေးဆောင်နေရကြောင်း ဒေသခံ အမျိုးသားတစ်ဦးက ပြောသည်။
“နောင်ထောဝ်မှာလည်း စစ်မှုထမ်းကြေးကိုပဲ သုံးသိန်း အဲတာကျန်တဲ့ အခွန်တွေမပါသေးဘူး။ အဲအခွန်တွေပါ ပေါင်းလိုက်ရင် (၆)လတစ်ခါဆို ကျပ် (၇)သိန်းကျော် ၈ သိန်းနီးပါး ပေးနေရတယ်။ သူတို့က ဘာကြေးညာကြေးဆိုပြီး စာရွက်နဲ့လာတာ၊ တစ်လတစ်လ သူတို့ကို လုပ်ကြွေးနေရသလိုပဲ”ဟု အဆိုပါ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
ထို့အပြင် PNO က စစ်တပ်နှင့် အပစ်အခတ်ရပ်စဲပြီး အထူးဒေသ(၆) ငြိမ်းချမ်းရေးတည်ဆောက်မှု (၃၅)နှစ်ပြည့်ဟူ၍ (၃)ရက် (၃)ည ပျော်ပွဲရွှင်ပွဲ ပြုလုပ်ရာတွင် ပြည်သူများထံမှ အခွန်ကောက်သည့် ငွေများဖြင့် ပျော်ပါးကြကြောင်းနှင့် စစ်ကော်မရှင်တပ် လစဉ်ပျော်ပါးရန်အတွက်ပါ အခွန်ပေးဆောင်နေရကြောင်း အဆိုပါ အမျိုးသမီးတစ်ဦးက ပြောသည်။
ပြီးခဲ့သည့် ၂၀၂၅ ခုနှစ်တွင် ကျောက်တလုံးကြီးမြို့နယ်ခွဲဘက်တွင် တစ်နှစ်လျှင် ငွေကျပ် တစ်သိန်းခွဲသာ ပေးဆောင်ရသော်လည်း ယခု၂၀၂၆ ခုနှစ်တွင် ငွေကျပ် (၈)သိန်းကျော် ပေးဆောင်နေကြရသည်။
ပြီးခဲ့သည့် ၂၀၂၄ ခုနှစ် ဖေဖော်ဝါရီလတွင် စစ်ကော်မရှင်ဘက်မှ စစ်မှုထမ်းဥပဒေကို အတည်ပြု ထုတ်ပြန်ပြီးနောက် သျှမ်းပြည်အတွင်းရှိ လူငယ်များသည် နိုင်ငံရပ်ခြားသို့ ပြောင်းရွှေ့ အလုပ်လုပ်ကိုင်ခဲ့ကြပြီး မြန်မာတစ်နိုင်ငံလုံးတွင် စစ်မှုထမ်းကြေးများ၊ တိုင်းရင်းသားလက်နက်ကိုင် ထိန်းချုပ်နယ်မြေများတွင်လည်း ဆက်ကြေးများ လစဉ် ထည့်ဝင်နေကြရကြောင်း သိရသည်။
Leave a Comments