ထိုင်းနိုင်ငံ ချင်းမိုင်မြို့ရှိ Chan Phueak ဈေးအတွင်း အလုပ်လုပ်ကိုင်နေသည့် သျှမ်း (တိုင်ယိုင်) အလုပ်သမား ၁၂ ဦးကို အများပြည်သူအား စိတ်အနှောင့်အယှက်ဖြစ်စေမှုနှင့် အလုပ်သမားဥပဒေ ဖောက်ဖျက်မှုတို့ဖြင့် ဧပြီလ ၈ ရက်နေ့က အာဏာပိုင်များက ဖမ်းဆီးလိုက်ကြောင်း သတင်းရရှိသည်။

ဖြစ်စဉ်မှာ Chan Phueak ဈေးအတွင်း အလုပ်လုပ်ကိုင်နေသော ရွှေ့ပြောင်းအလုပ်သမားအချို့သည် ဆိုင်ကယ်ကို အိတ်ဇောသံ ဆူညံစွာဖြင့် အရှိန်ပြင်းမောင်းနှင်ခြင်း၊ ပတ်ဝန်းကျင်ကို စိတ်အနှောင့်အယှက်ဖြစ်စေခြင်းနှင့် လုံခြုံရေးဆိုင်ရာ စိုးရိမ်ရမှုများ ရှိနေခြင်းကြောင့် အဆိုပါဈေးအနီး နေထိုင်သူများက အုပ်ချုပ်ရေးရုံးသို့ တိုင်ကြားခဲ့ခြင်း ဖြစ်သည်။

ချင်းမိုင်မြို့နယ် အုပ်ချုပ်ရေးမှူး Mr. Warut Wisitsin ၏ ညွှန်ကြားချက်အရ မြို့နယ်အုပ်ချုပ်ရေးအဖွဲ့၊ ရဲတပ်ဖွဲ့နှင့် လူဝင်မှုကြီးကြပ်ရေးအဖွဲ့တို့ ပူးပေါင်းကာ ဧပြီလ ၈ ရက်နေ့တွင် ကွင်းဆင်းစစ်ဆေးခဲ့ကြောင်း သိရသည်။

စစ်ဆေးမှုများအရ ဈေးအရှေ့ရှိ စားသောက်ဆိုင်များတွင် အလုပ်လုပ်ကိုင်နေသည့် သျှမ်းအလုပ်သမား ၁၂ ဦးသည် နိုင်ငံကူးလက်မှတ်နှင့် အလုပ်လုပ်ကိုင်ခွင့် လက်မှတ်များ ရှိနေသော်လည်း ၎င်းတို့၏ လက်ရှိအလုပ်ရှင်နှင့် အလုပ်လုပ်ကိုင်ရာ နေရာကို သက်ဆိုင်ရာ အလုပ်သမားဌာနသို့ အကြောင်းကြားရန် ပျက်ကွက်ခဲ့ကြောင်း ဆိုသည်။

လက်ရှိတွင် ဖမ်းဆီးခံရသူ ၁၂ ဦးလုံးကို Chan Phueak ရဲစခန်းသို့ ပို့ဆောင်ထားပြီး ဥပဒေကြောင်းအရ ဆက်လက်အရေးယူသွားမည် ဖြစ်သည်။

ထိုင်းနိုင်ငံရောက် ရွှေ့ပြောင်းအလုပ်သမားများအနေဖြင့် စာရွက်စာတမ်း အထောက်အထား အပြည့်အစုံ ရှိရုံတင် မကဘဲ ထိုင်းနိုင်ငံ ဥပဒေများနှင့် စည်းကမ်းချက်များကိုပါ လိုက်နာရန် လိုအပ်ကြောင်း ရွှေ့ပြောင်းအလုပ်သမားများအရေး ကူညီဆောင်ရွက်သူများက တိုက်တွန်းထားသည်။