သျှမ်းပြည်တောင်ပိုင်း ရွာငံမြို့နယ်နယ် ကဇက်ကျေးရွာအနီးတွင် စစ်တပ်အရာရှိကြီးများ၏ အကာအကွယ်ဖြင့် တရားမဝင် မြေနီတူးဖော်မှုများ ကျယ်ကျယ်ပြန့်ပြန့် လုပ်ဆောင်နေသဖြင့် ဒေသခံတောင်သူများ၏ စိုက်ပျိုးမြေများ ပျက်စီးဆုံးရှုံးနေကြောင်း ဒေသခံများထံမှ သိရသည်။
အဆိုပါ မြေနီတူးဖော်မှုကို ကိုညီဆိုသူက ဦးဆောင်ကာ တူးဖော်နေခြင်းဖြစ်ပြီး ၎င်းသည် အရှေ့ပိုင်းတိုင်းစစ်ဌာနချုပ် ဒု-တိုင်းမှုး၏ ခွင့်ပြုချက်ရရှိထားကြောင်း ဆိုကာ တားဆီးသည့် ဒေသခံရွာသားများနှင့် တောင်သူများကို ခြိမ်းခြောက်ပြောဆိုနေကြောင်း ဒေသခံတစ်ဦးက ပြောသည်။
“လူကြီးတွေ ခွင့်ပြုထားတာ၊ ဘယ်ရွာသားမှ လာမပြောနဲ့။ ကြိုက်တဲ့သူဆီ သွားတိုင်လို့ရတယ်။ မကြောက်လို့ လုပ်နေတာ” ဟု ဆိုကာ ဒေသခံများအပေါ် ဖိအားပေးနေကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
တရားမဝင် မြေနီတူးဖော်မှုကြောင့် မြေဆီလွှာ ထိန်းသိမ်းမှုစနစ်များ ပျက်စီးပြီး သီးနှံစိုက်ပျိုးရေးကို တိုက်ရိုက်ထိခိုက်စေကာ ရေရှည်တွင် စိုက်ပျိုးမြေများ ဆုံးရှုံးမည့်အရေးကို တောင်သူများက စိုးရိမ်နေကြကြောင်း သိရသည်။
ရွာငံမြို့နယ်သည် လက်ရှိတွင် စစ်ကောင်စီတပ်နှင့် PDF များအကြား စစ်ရေးလှုပ်ရှားမှုများရှိနေသည့် နယ်မြေဖြစ်သဖြင့် ဒေသခံများမှာ နှစ်ဖက်စလုံးကို ကြောက်လန့်နေရသည့်ကြားမှ ယခုကဲ့သို့ အနိုင်ကျင့်ခံနေရခြင်း ဖြစ်ကြောင်း ဒေသခံများက ပြောသည်။
တူးဖော်ရရှိသည့် မြေနီများကို ကျောက်ဆည်မြို့ရှိ ဘိလပ်မြေစက်ရုံများသို့ တင်ပို့နေခြင်းဖြစ်ပြီး ထိုသို့ သယ်ဆောင်ရာတွင် အဆင်ပြေစေရန် မြို့နယ်အဆင့် ဌာနဆိုင်ရာများကို လာဘ်ပေးကာ တရားမဝင် ပို့ဆောင်နေခြင်းဖြစ်ကြောင်း ခိုင်လုံသော သတင်းရင်းမြစ်များက ဆိုသည်။
လက်ရှိတွင် နစ်နာနေသော တောင်သူများက ၎င်းတို့ကိုယ်စား မြို့နယ်လွှတ်တော်အမတ်များထံ အကြောင်းကြားထားပြီး အဆိုပါ တရားမဝင် လုပ်ငန်းကို ချက်ချင်းတားဆီးပေးရန်နှင့် လွှတ်တော်တွင် မေးမြန်းပေးရန် တင်ပြထားကြောင်း သိရသည်။
သို့သော်လည်း လက်ရှိအချိန်အထိ တစ်စုံတစ်ရာ အရေးယူဆောင်ရွက်ပေးမှု မရှိသေးဘဲ မြေနီတူးဖော်မှုများ ဆက်လက်လုပ်ဆောင်နေဆဲဖြစ်ကြောင်း ဒေသခံများက ပြောသည်။
Leave a Comments