သျှမ်းပြည်တောင်ပိုင်း ဟိုပုံးမြို့နယ် ညောင်ပင်ကျေးရွာမှ မြေသိမ်းရန်ကန့်ကွက်သည့် ဒေသခံ (၁၂)ဦးကို စစ်ကော်မရှင်တပ်က ဖမ်းဆီးခဲ့ပြီး (၆)ဦးသာ ပြန်လွှတ်ပေးကြောင်း သတင်းရရှိသည်။

ပြီးခဲ့သည့် မတ်လ (၃၀)ရက် ညပိုင်းတွင် ပအိုဝ်းပြည်သူ့စစ်(PNO) လက်အောက်ခံ မြေပွဲစားများ၊ စစ်ကော်မရှင်တပ်သားနှင့် ၎င်း၏ လက်အောက်ခံ ရဲများ အပါအဝင် အထွေထွေအုပ်ချုပ်ရေးမှူးက ဒေသခံ၏ နေအိမ်များကို ဘူဒိုဇာဖြင့် ဖျက်ဆီးရန် လာရောက်ခဲ့၍ ဒေသခံများက ကန့်ကွက်ခဲ့ကြသည်။

ထိုသို့ကန့်ကွက်ခဲ့သောကြောင့် ဒေသခံ (၁၂)ဦးဖမ်းဆီးခံခဲ့ရပြီး ဒေသခံများ ညောင်ပင်ကျေးရွာမှ ဒေသခံများ ပြောင်းရွှေ့ရန် လက်မှတ်ထိုးပေးလျှင် ပြန်လွှတ်ပေးမည်ဟုဆို၍ ဖိအားပေးသောကြောင့် လက်မှတ်ထိုးခဲ့သော်လည်း (၆)ဦးသာ ပြန်လည် လွတ်မြောက်လာသေးကြောင်း သိရသည်။

“သူတို့ကတော့ အတင်းဖိအားပေးနေတော့ မပြောင်းပေးလို့မှ မရတာ၊ လက်မှတ်ထိုးပေးထားလည်း (၆)ဦးပဲ လွှတ်ပေးသေးတယ်၊ ကျန်တဲ့သူတွေကို ခုထိမလွှတ်ပေးသေးဘူး။ ဥပဒေက ပြည်သူဘက်မှာမရှိဘူး၊ ပြည်သူတွေအားကိုးရတဲ့ ခေါင်းဆောင်ဆိုတာလည်း မရှိတော့ဘူး၊ လက်နက်ကိုင်တဲ့သူတွေကို ပြည်သူတွေက ကြောက်နေရတာ၊ အာဏာက သူတို့လက်ထဲမှာဆိုတော့ သူတို့သဘောပေါ့။”ဟု ဟိုပုံးဒေသခံ အမျိုးသားတစ်ဦးက ပြောသည်။

ထို့အပြင် မလွတ်မြောက်သေးသည့် ဒေသခံ (၆)ဦးကို အမြန်ဆုံးပြန်လည်လွှတ်ပေးစေလိုကြောင်းနှင့် ဒေသခံများ၏ အိုးမဲ့ အိမ်မဲ့ ဖြစ်နေမှုကို သက်ဆိုင်ရာတာဝန်ရှိသူများက မျက်ကွယ်မပြုထားသင့်ကြောင်း အဆိုပါ ဒေသခံ အမျိုးသားတစ်ဦးက ထပ်လောင်းပြောသည်။

အဆိုပါ ညောင်ပင်ကျေးရွာတွင် အိမ်ခြေ(၂၀၀)ကျော်ရှိပြီး စစ်ကော်မရှင်တပ်က ဖယ်ပေးရန် အတင်းဖိအားပေး လက်မှတ်ထိုးခိုင်းသောကြောင့် ‌ဒေသခံများပြောင်းရွှေ့နေကြရပြီး နေစရာနေရာမရှိတော့ဘဲ ဒုက္ခရောက်နေကြသည်ဟု သိရသည်။

“ကျမတို့ဒီမြေပေါ်မှာ နေလာခဲ့တာ နှစ်ပေါင်း (၃၀)ကျော်ရှိနေပြီ၊ ဒီမြေပေါ်မှာပဲ အနာဂတ်တွေတည်ဆောက်ခဲ့ကြတာ၊ အခုတော့ အိမ်နဲ့ ခြံနဲ့ နေခဲ့တဲ့ ဘဝကနေ အိုးမဲ့ အိမ်မဲ့ဘဝကို ရောက်နေရပြီ၊ ပွဲစားတွေက ဒီမြေကို တပ်ပိုင်မြေမှန်းသိရင် ဘာလို့ပြည်သူတွေကို လိမ်ရောင်းခဲ့တာလဲ ပွဲစားတွေကပဲ သူတို့ရောင်းတဲ့ မြေကိုသူတို့ပြန်သိမ်းပြီး ပြည်သူတွေကို နှင်ထုတ်နေပြီ၊ ကျမတို့ရဲ့ အနာဂတ်လည်းပျက်စီးကုန်ပြီ။”ဟု ဟိုပုံးဒေသခံ အမျိုးသမီးတစ်ဦးက ပြောသည်။

လွန်ခဲ့သည့် ၁၉၉၂ ခုနှစ်တွင် ဟိုပုံး-လွိုင်လင် လမ်းမကြီးမှ မြေဧက နှစ်သောင်းနီးပါးကို စစ်တပ်မှ သိမ်းဆည်းခဲ့ပြီး ၂၀၁၅ ခုနှစ်တွင် စစ်ကော်မရှင်မှ ပအိုဝ်းပြည်သူ့စစ် (PNO) မှတစ်ဆင့် ဒေသခံများထံသို့ လွှဲပြောင်းခဲ့သော်လည်း ပအိုဝ်းပြည်သူ့စစ် (PNO) က ဒေသခံများကို မပေးဘဲ ပွဲစားများနှင့် အကွက်ရိုက်ရောင်းချ မှုများ ရှိခဲ့သည်ဟု သိရသည်။

ပြီးခဲ့သည့် ၂၀၂၅ ခုနှစ် အတွင်း ဟိုပုံးမြို့နယ် အထွေထွေ အုပ်ချုပ်ရေးဦးစီးဌာနမှ မြို့ဦးကွက်သစ် နှင့် နောင်တောင်းကျေးရွာရှိ နေအိမ် (၂၀၀)ကျော်ကို ဖယ်ရှားပေးရန် ဆင့်စာ(၃)ကြိမ်ကြိမ်တိုင်တိုင် ပေးပို့ခဲ့ကြောင်း သိရသည်