သျှမ်းပြည်တောင်ပိုင်း ဟိုပုံးမြို့နယ် ညောင်ပင်ကျေးရွာမှ ရွာသူကြီး အပါအဝင် ဒေသခံ (၁၂)ဦးသည် မြေသိမ်းရန် ကန့်ကွက်မှုကြောင့် စစ်တပ်က ဖမ်းဆီးခဲ့ပြီး ယနေ့အထိ ပြန်မလွှတ်ပေးသေးကြောင်း သတင်းရရှိသည်။

ပြီးခဲ့သည့် မတ်လ ၃၀ ရက်တွင် ပအိုဝ်းပြည်သူ့စစ်(PNO) လက်အောက်ခံ မြေပွဲစားများ၊ စစ်ကော်မရှင်တပ်သားနှင့် ၎င်း၏ လက်အောက်ခံ ရဲများ အပါအဝင် အထွေထွေအုပ်ချုပ်ရေးမှူး အရာရှိများက ဒေသခံ၏ နေအိမ်များကို ဘူဒိုဇာဖြင့် ဖျက်ဆီးရန် လာရောက်ခဲ့သဖြင့် ဒေသခံများက ကန့်ကွက်ခဲ့ကြသည်။

ထိုသို့ကန့်ကွက်ခဲ့သောကြောင့် ဒေသခံ (၁၂)ဦးဖမ်းဆီးခံခဲ့ရပြီး ဒေသခံများ ညောင်ပင်ကျေးရွာမှ ပြောင်းရွှေ့ပေးလျှင် ဖမ်းဆီးထားသူများကို ပြန်လွှတ်ပေးမည်ဟုဆိုသော်လည်း ယနေ့အထိ ပြန်မလွှတ်ပေးသေးကြောင်း သိရသည်။

“ပြောင်းရွှေ့ရန် သဘောတူတယ်ဆိုတဲ့ လက်မှတ်ထိုးပေးရင် ဖမ်းထားတဲ့ သူတွေကို ပြန်လွှတ်ပေးမယ်လို့ ပြောတော့ ရွာသားတွေက မတတ်သာတဲ့အဆုံး လက်မှတ်ထိုးခဲ့ကြတယ်၊ ဒါပေမဲ့ အခုထိ ပြန်မလွှတ်ပေးသေးဘူး၊သူတို့က ကတိမတည်ဘူး။ ကျနော်တို့ ပြည်သူတွေပဲ နောက်ဆုံးဒုက္ခရောက်ကြတာ၊ ဆုတ်လည်းစူး စားလည်းရူးဆိုတာ ဒါမျိုးကို ပြောတာ။”ဟု ဟိုပုံးဒေသခံ အမျိုးသားတစ်ဦးက ပြောသည်။

အဆိုပါ ညောင်ပင်ကျေးရွာတွင် အိမ်ခြေ(၂၀၀)ကျော်ရှိပြီး စစ်ကော်မရှင်တပ်က ဖယ်ပေးရန် အတင်းဖိအားပေး လက်မှတ်ထိုးခိုင်းသောကြောင့် ‌ဒေသခံများ ယခုအချိန်တွင် နေစရာ နေရာများ မရှိကြဘဲ ဒုက္ခရောက်နေကြောင်း ၎င်းအမျိုးသားက ထပ်လောင်းပြောသည်။

ထို့အပြင် အသိမ်းခံရသော မြေသည် အစိုးရပိုင်မြေဖြစ်၍ ပြန်ပေးသင့်ကြောင်းနှင့် အစိုးရ ချမှတ်ထားသော ဥပဒေကို လိုက်နာဖို့လိုကြောင်း ပအိုဝ်းပြည်သူ့စစ် (PNO)၏ သတင်းနှင့်ပြန်ကြားရေး ခွန်ဆန်းအောင်မှ ၎င်း၏ လူမှုကွန်ယက် စာမျက်နှာမှာ ဖော်ပြထားသည်။

“ဖွဲ့စည်းပုံအခြေခံဉပဒေထဲမှာလည်း ပါပြီးသားဘဲ ရေပေါ်ရေအောက် လေပေါ်လေအောက် နိုင်ငံတော် ပိုင်တယ် ဆိုတဲ့အကြောင်း သူများက ဥပဒေနဲ့ သွားတာ၊ နောက်တစ်ချိန် လေးငါးခြောက် နှစ်ကျရင် အဲနေရာက အခု သူများသိမ်းသွားလို့ ဆုံးရှုံးသွားတဲ့ မြေနေရာထက် ပိုပြီးတော့ စျေးကြီးသွားလိမ့်မယ်။ မြို့ပြစီမံကိန်း ပြီးသွားရင် အဲဒီက လူတွေက သာယာတဲ့ နေရာမှာ အလိုလို ရှိပြီးသား ဖြစ်သွားမယ်။ သူများက ဉပဒေနဲ့ လုပ်တာဖြစ်တဲ့အတွက် ငါတို့က သူများ လုပ်တာကို လိုက်နာဖို့ လိုတယ်။ အဲကြောင့် သူများပြောင်းရွေ့ခိုင်းတဲ့နေရာကို ပြောင်းရွှေ့ပေးဖို့ လိုတယ်။”ဟု အဆိုပါ ခွန်ဆန်းအောင်က ၎င်း၏ လူမှုကွန်ရက် စာမျက်နှာတွင် တင်ထားသည်။

ဟိုပုံးဒေသခံများက ၎င်းတို့ မဲပေးရွေးချယ်ထားသော လွှတ်တော်ကိုယ်စားလှယ်များက ပြည်သူများ၏ အခက်ခဲများကို တာဝန်ယူဖြေရှင်းပေးမှုမရှိဘဲ မျက်ကွယ်ပြုထားသောကြောင့် မည်သည့်အဖွဲ့ကိုမှ ယုံကြည်မှုမရှိဘဲ ကိုယ့်အားကိုယ်ကိုးကာ ပြည်သူများဖြေရှင်းနေရကြောင်း ဒေသခံများက ပြောသည်။

လွန်ခဲ့သည့် ၁၉၉၂ ခုနှစ်တွင် ဟိုပုံး-လွိုင်လင် လမ်းမကြီးမှ မြေဧက နှစ်သောင်းနီးပါးကို စစ်တပ်မှ သိမ်းဆည်းခဲ့ပြီး ၂၀၁၅ ခုနှစ်တွင် စစ်ကော်မရှင်မှ ပအိုဝ်းပြည်သူ့စစ် (PNO) မှတစ်ဆင့် ဒေသခံများထံသို့ လွှဲပြောင်းခဲ့သော်လည်း ပအိုဝ်းပြည်သူ့စစ် (PNO) က ဒေသခံများကို မပေးဘဲ ပွဲစားများနှင့် အကွက်ရိုက်ရောင်းချ မှုများ ရှိခဲ့သည်ဟု သိရသည်။

ပြီးခဲ့သည့် ၂၀၂၅ ခုနှစ် အတွင်း ဟိုပုံးမြို့နယ် အထွေထွေ အုပ်ချုပ်ရေးဦးစီးဌာနမှ မြို့ဦးကွက်သစ် နှင့် နောင်တောင်းကျေးရွာရှိ နေအိမ် (၂၀၀)ကျော်ကို ဖယ်ရှားပေးရန် ဆင့်စာ(၃)ကြိမ်ကြိမ်တိုင်တိုင် ပေးပို့ခဲ့ကြောင်း သိရသည်