တရုတ်နိုင်ငံသို့ အလုပ်အကိုင် ရရှိမည်ဟုဆိုကာ ပွဲစားများက မူဆယ်မြို့သို့ လိမ်လည်ခေါ်ဆောင်ခဲ့သည့် အသက် ၂၀ နှစ်အရွယ် အမျိုးသမီးငယ်တစ်ဦးကို လူမှုကူညီရေး ပရဟိတအဖွဲ့က ကယ်တင်နိုင်ခဲ့ကြောင်း သတင်းသိရသည်။

ယမန်နေ့ (ဧပြီလ ၆ ရက်) ည ၁၁ နာရီခန့်တွင် မြန်မာ-တရုတ်နယ်စပ်ရှိ မူဆယ်မြို့ပတ်လမ်း ဟိုနားကျေးရွာအနီး လမ်းပေါ်တွင် အဝတ်အစားများ ပေကျံလျက် ပြေးလွှားနေသည့် အဆိုပါ အမျိုးသမီးငယ်ကို မေတ္တာပန်းခင်း ပရဟိတအသင်းက တွေ့ရှိခဲ့ခြင်း ဖြစ်သည်။

အသက် (၂၀) နှစ်အရွယ်သာ ရှိသေးသည့် အဆိုပါ မိန်းကလေးသည် ဧရာဝတီတိုင်း ဝါးခယ်မမြို့နယ်မှ သျှမ်းပြည် လားရှိုးမြို့သို့ အလုပ်လုပ်ရန် ရောက်ရှိနေစဉ် ပွဲစားများ၏ စည်းရုံးမှုဖြင့် မူဆယ်မြို့ဘက်သို့ ရောက်ရှိလာခြင်းဖြစ်ကြောင်း သွားရောက်ကူညီခဲ့သည့် မေတ္တာပန်းခင်း ပရဟိတအသင်းမှ တာဝန်ရှိသူတစ်ဦးက ပြောသည်။

“သူ့နောက်ကျောတွေမှာ ရိုက်ခံထားရတဲ့ ဒဏ်ရာတွေ အများကြီးရှိတယ်။ မိန်းကလေးဆိုတော့ အကုန် မကြည့်မိပေမယ့် သူလှန်ပြတဲ့ နေရာမှာတွေတင် တော်တော်များနေပြီ” ဟု ပရဟိတအသင်းမှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။

ထို့အပြင် ပွဲစားများက အဆိုပါ မိန်းကလေး၏ လက်ကိုင်ဖုန်းကို သိမ်းဆည်းထားပြီး ပြင်ပနှင့် အဆက်အသွယ် ဖြတ်တောက်ထားကြောင်း ဆိုသည်။

ထိုအမျိုးသမီးငယ်၏ ပြောကြားချက်အရ ၎င်းနှင့်အတူ အခြားလူ ၂၀ ဉီးသည် တရုတ်နိုင်ငံသို့ သွားရောက် အလုပ်လုပ်ကိုင်ရန် ပွဲစားများ၏ စီစဉ်မှုဖြင့် မူဆယ်မြို့ရှိ ခြံဝင်းတစ်ခုအတွင်း အကျယ်ချုပ်သဘော ထိန်းသိမ်းခံထားရကြောင်း ဆိုသည်။

ထွက်ပြေးလွတ်မြောက်လာသည့် မိန်းကလေးသည် တရုတ်နိုင်ငံသို့ သွားရောက်ရန် ကျန်းမာရေး ဆေးစစ်မှု မအောင်မြင်သောကြောင့် ပွဲစားများ၏ ပစ်ပယ်ခြင်းကို ခံခဲ့ရပြီး မူဆယ်မြို့တစ်နေရာတွင် ထိန်းသိမ်းခံထားရသည့် ခြံဝင်းမှ ထွက်ပြေးခဲ့ခြင်း ဖြစ်ကြောင်း မေတ္တာပန်းခင်း ပရဟိတအသင်းက ပြောသည်။

“ဒီမိန်းကလေးက စိတ်ဝေဒနာ နည်းနည်း ခံစားနေရတဲ့အတွက် ပွဲစားတွေက ဂရုမစိုက်ဘဲ ပစ်ထားခဲ့တာလို့ သိရတယ်။ အပြင်ပေးမထွက်တဲ့ နေရာကနေ သူက ခိုးထွက်လာတာ” ဟု အထက်ပါ တာဝန်ရှိသူတစ်ဦးက ထပ်လောင်းပြောသည်။

လက်ရှိတွင် ထွက်ပြေးလွတ်မြောက်လာသည့် မိန်းကလေးကို ဆွေမျိုးနှင့် ချိတ်ဆက်ပေးနိုင်ခဲ့ပြီး ယနေ့ (ဧပြီလ ၇ ရက်) နံနက်ပိုင်းတွင် မူဆယ်မြို့မှ လားရှိုးသို့ ခရီးသည်တင်ယာဉ်ဖြင့် ဘေးကင်းစွာ ပြန်လည်ပို့ဆောင်ပေးခဲ့ပြီးဖြစ်ကြောင်း သိရသည်။

အလားတူ မတ်လ ၂၃ ရက် ညပိုင်းတွင်လည်း မူဆယ်မြို့တွင် အလုပ်အကိုင် ရရှိမည်ဟုဆိုကာ လိမ်လည်ခေါ်ဆောင်ခံရပြီး ပြည့်တန်ဆာအလုပ်သို့ အတင်းအဓမ္မ စေခိုင်းခံနေရသည့် အသက် (၂၀) ဝန်းကျင် အမျိုးသမီး (၃) ဦးကို လူမှုကူညီရေး ပရဟိတအသင်းတစ်ခုက ကယ်တင်နိုင်ခဲ့သည်။

“ရှင်းရှင်းပြောရရင် ဒီကိစ္စတွေက ပွဲစားတွေနဲ့ လက်နက်ကိုင်တွေ ပေါင်းလုပ်တာဗျ။ ဒါကြောင့် လူတွေက အမှန်အတိုင်း မပြောရဲကြတာ။ ဒီမြို့က အသက်ကို ဉာဏ်စောင့်ရတဲ့မြို့၊ အကုန်ဖွင့်ပြောလိုက်ရင် ကျနော်တို့ အတွက်ပါ အန္တရာယ်ရှိနိုင်တယ်” ဟု မူဆယ်မြို့ခံတစ်ဦးက သျှမ်းသံတော်ဆင့်ကို ပြောသည်။

လက်ရှိ စီးပွားရေး အကြပ်အတည်းများကြားတွင် နယ်စပ်ဒေသသို့ အလုပ်အကိုင်ရှာဖွေရန် လာရောက်ကြသည့် လူငယ်အမျိုးသမီးများအနေဖြင့် ပွဲစားများ၏ မက်လုံးပေး ဖြားယောင်းမှုများကို အထူးသတိထားရန် လူမှုကူညီရေး ပရဟိတအသင်းနှင့် ဒေသခံများက တိုက်တွန်းထားသည်။