ထိုင်းနိုင်ငံ ချင်းမိုင်ခရိုင် ဆန်ဆိုင်းမြို့နယ်ရှိ မယ်ကုံးဆည်တွင် ယမန်နေ့ (မတ်လ ၂၉ ရက်) မွန်းလွဲပိုင်းက အပန်းဖြေရေးကူးနေသည့် အသက် ၂၄ နှစ်အရွယ် သျှမ်းလူငယ်တစ်ဦး ရေနစ်သေဆုံးမှု ဖြစ်ပွားခဲ့ကြောင်း ချင်းမိုင်သတင်း၏ ဖော်ပြချက်အရ သိရသည်။
သေဆုံးသူမှာ သျှမ်းပြည် လဲချားမြို့မှ အသက် ၂၄ နှစ်အရွယ် စိုင်းစံလူ ဖြစ်ပြီး ၎င်းသည့် ချင်းမိုင်ခရိုင် ဒွိုင်စကက် (Doi Saket) မြို့နယ်တွင် အလုပ်လုပ်ကိုင်နေသူ ဖြစ်သည်။
မျက်မြင်သက်သေများ၏ အဆိုအရ ၎င်းသည် သူငယ်ချင်း ၅ ယောက်နှင့်အတူ ရေလာကူးခြင်းဖြစ်ပြီး ရေစီးသန်နေစဉ်အတွင်း ရေထဲသို့ ခုန်ချခဲ့ခြင်းဖြစ်ကြောင်း သိရသည်။
ကယ်ဆယ်ရေးအဖွဲ့များ ရောက်ရှိလာချိန်တွင် ဆည်တာဝန်ရှိသူများနှင့် ညှိနှိုင်းကာ ဆည်ခေတ္တပိတ်ပြီး ရှာဖွေခဲ့ရာ သေဆုံးသူ၏ ရုပ်အလောင်းကို ပြန်လည်တွေ့ရှိခဲ့ကြောင်း သိရသည်။
ကနဦးစစ်ဆေးချက်အရ ဦးခေါင်းတွင် အရာတစ်ခုခုနှင့် ပြင်းထန်စွာ ရိုက်မိထားသည့် ဒဏ်ရာကို တွေ့ရှိခဲ့ရကြောင်း ဆိုသည်။
ရဲတပ်ဖွဲ့နှင့် ကယ်ဆယ်ရေးအဖွဲ့များ၏ အဆိုအရ သေဆုံးသူသည် ရေထဲသို့ခုန်ချစဉ် ကွန်ကရစ်ဘောင် သို့မဟုတ် မာကျောသည့် အရာတစ်ခုခုနှင့် ဦးခေါင်းရိုက်မိကာ သတိလစ်၍ ရေနစ်သွားခြင်း ဖြစ်နိုင်ကြောင်း ပြောထားသည်။
ဆည်တာဝန်ရှိသူများကလည်း လာရောက်လည်ပတ်သူများအနေဖြင့် ဘေးကင်းလုံခြုံရေး စည်းကမ်းချက်များကို လိုက်နာရန်နှင့် မူးယစ်သောက်စားကာ ရေထဲသို့ မဆင်းကြရန် ထပ်မံသတိပေးချက် ထုတ်ပြန်ထားသည်။
Leave a Comments