သျှမ်းပြည်မြောက်ပိုင်း နမ့်ခမ်းနှင့် မူဆယ်မြို့နယ်တို့တွင် စက်သုံးဆီ တစ်လီတာကို ၁၂၀၀၀ ကျပ်အထိ ပေးဝယ်နေရပြီး အကန့်အသတ်ဖြင့်သာ ရောင်းချပေးနေကြောင်း သတင်းရရှိသည်။
TNLA ထိန်းချုပ်ထားသည့် နမ့်ခမ်းမြို့နယ်ရှိ စက်သုံးဆီဆိုင်များ အားလုံးနီးပါး ပိတ်ထားပြီး တစ်ရက်လျှင် စက်သုံးဆီဆိုင် တစ်ဆိုင်သာ ဖွင့်လှစ်ကာ စက်သုံးဆီများကိုလည်း အကန့်အသတ်ဖြင့်သာ ရောင်းပေးနေကြောင်း နမ့်ခမ်းမြို့နယ် ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“မနေ့ (မတ်လ ၂၄ ရက်) ကဆိုရင် စက်သုံးဆီဆိုင်က တစ်ဆိုင်ပဲဖွင့်တယ်။ ဆီကတော့ (၁၂၀၀၀) ကျပ်နဲ့ရောင်းနေတာ၊ အကန့်အသတ်နဲ့ပဲ ရောင်းပေးတယ်။တချို့ရက်တွေလည်း ဆိုင်က နှစ်ဆိုင်တော့ ဖွင့်တယ်၊ အပြင်မှာ ဒီတိုင်း ရေသန့်ဘူးနဲ့ ပြန်ရောင်းတဲ့ဟာတွေကတော့ ဈေးကြီးတယ်”ဟု နမ့်ခမ်းမြို့ ဒေသခံ အမျိုးသားတစ်ဦးက ပြောသည်။
အဆိုပါ နမ့်ခမ်းမြို့နယ်ရှိ လမ်းဘေးဈေးဆိုင်များနှင့် အပြင် မှောင်ခိုရောင်းချနေသည့် စက်သုံးဆီများသည် တစ်လီတာလျှင် (၂၀၀၀၀) ကျပ် အထိဈေးနှုန်း မြင့်တက်နေကြောင်း သိရသည်။
အလားတူ စစ်ကော်မရှင်ထိန်းချုပ် မူဆယ်မြို့နယ်တွင်လည်း စက်သုံးဆီ တစ်လီတာလျှင် ၁၂၀၀၀ ကျပ်အထိဈေးနှုန်းမြင့်တက်နေပြီ ဆီများကို အကန့်အသတ်ဖြင့်သာ ရောင်းချပေးကြောင်း မူဆယ်မြို့နယ် ဒေသခံ အမျိုးသားတစ်ဦးက ဆက်ပြောသည်။
“ဆီကတော့ ၁၂၀၀၀ အထိ ဈေးရှိတယ်။ ကားတစ်စီးကို ၁၀ လီတာလောက်ထိပဲ ထည့်ပေးတယ်။ ဖွင့်တာ ဆီဆိုင်တွေကလည်း နည်းတယ်”ဟု မူဆယ်မြို့နယ် ဒေသခံအမျိုးသားတစ်ဦးက ပြောသည်။
တရုတ်-မြန်မာနယ်စပ်ရှိ နမ့်ခမ်းမြို့နယ်နှင့် မူဆယ်မြို့နယ်တို့တွင် ယခင်က စက်သုံးဆီ တစ်လီတာလျှင် ၄၈၀၀ ကျပ် မှ ၅၀၀၀ ဝန်းကျင်ခန့်သာ ပေးဝယ်ရကြောင်း ဒေသခံများက ပြောသည်။
အရှေ့အလယ်ပိုင်း စစ်ပွဲအခြေအနေကြောင့် ကမ္ဘာ့ စက်သုံးဆီ သယ်ယူခွင့် ကန့်သတ်ခံထားရပြီး မြန်မာနိုင်ငံ အပါအဝင် နိုင်ငံအများစုတွင်လည်း စက်သုံးဆီ ဈေးနှုင့်မြင့်တက်ကာ အကန့်အသတ်ဖြင့် ရောင်းချနေရကြောင်း သိရသည်။
TNLA ထိန်းချုပ် နမ့်ခမ်းမြို့နယ်သည် တရုတ်နိုင်ငံမှ တင်သွင်းသည့် စက်သုံးဆီများကို အဓိက မှီခို အသုံးပြုနေရကြောင်း သိရသည်။
Leave a Comments